កញ្ញា លីលី សីញ (Lilly Singh) ជាកូនជនអន្តោប្រវេសន៍ជនជាតិឥណ្ឌាដែលបានប្តូរទៅរស់នៅប្រទេសកាណាដា បានអះអាងថាខ្លួនមានអត្តចរិកដូចមនុស្សប្រុសតាំងពីក្មេងដែលធ្វើឲ្យកញ្ញាងប់ងល់នឹងកីឡាកាស ។
ពេលនៅវ័យក្មេង កញ្ញាមានចំណូលចិត្តក្នុងផ្នែកសម្តែង និងច្រៀងបែប Hip Hop ឲ្យមិត្ត និងបងស្រីទស្សនា ។ កញ្ញាធ្លាប់បាននិយាយក្នុងបទសម្ភាសន៍មួយកាលពីឆ្នាំ ២០១៧ ថា «ក្មេងគ្រប់ៗគ្នាចង់ក្លាយជាវេជ្ជបណ្ឌិត វិស្វករ អ្នកវិទ្យាសាស្ត្រ តែឪពុកម្តាយរបស់ខ្ញុំប្រាប់គេថា កូនស្រីពួកយើងចង់ក្លាយជា Rapper» ។
កញ្ញាបានបញ្ចប់ការសិក្សាផ្នែកចិត្តវិទ្យានៅសាកលវិទ្យាល័យ New York University កាលពីឆ្នាំ ២០១០ និងបានត្រលប់មកធ្វើការក្នុងប្រទេសកាណាដា វិញតែកញ្ញាបានប្រាប់មកថាពេលនោះកញ្ញាមិនមានគោលដៅក្នុងជីវិតច្បាស់លាស់ទេ ។មិនយូរប៉ុន្មានកញ្ញា សីញ បានងាកមកចាប់អារម្មណ៍ YouTube និងតាមដានមើលវីដេអូរបស់ ជេណា ម៉ាបល (Jenna Marbles) ដែលជា YouTuber ម្នាក់ទៀតដ៏ល្បីឈ្មោះ ។ នៅអាយុ ២២ឆ្នាំ កញ្ញា សីញ ក៏បានសម្រេចចិត្តបង្ហោះវីដេអូដំបូងរបស់កញ្ញាក្រោមឈ្មោះថា Superwoman ។
វីដេអូរបស់កញ្ញាដំបូង គឺជាវីដេអូកំប្លែងដែលឆ្លុះបញ្ចាំងពីវប្បធម៌ឥណ្ឌា ។ ក្នុងរយៈពេលមួយថ្ងៃ វីដេអូនោះទទួលបានអ្នកទស្សនាដល់ទៅ ១០,០០០ដង ហើយតាំងពីពេលនោះមក កញ្ញាបានវិនិយោគពេលវេលា និងថវិកាកាន់តែច្រើនលើ YouTube ។ នៅខែធ្នូ ឆ្នាំ ២០១៥ កញ្ញាបានចាកចេញពីប្រទេសកាណាដា និងប្តូរមករស់នៅ Los Angeles ក្នុងសហរដ្ឋអាមេរិក និងបាននិយាយថា «ខ្ញុំដឹងថាខ្ញុំត្រូវតែចាកចេញដើម្បីដើរបានកាន់តែឆ្ងាយក្នុងអាជីពរបស់ខ្ញុំ និងដើម្បីសម្រេចក្តីសុបិនរបស់ខ្ញុំ» ។
តាំងពីពេលនោះមក កញ្ញាកាន់តែមានប្រជាប្រិយភាពថែមទៀត រហូតបានក្លាយជាតារាសម្តែងក្នុងភាពយន្តមួយរបស់ YouTube Red និងរកចំណូលបានរាប់ពាន់ដុល្លារពីការសហការជាមួយនឹងប្រេនល្បីៗជាដើម ។
នៅឆ្នាំ ២០១៧ កញ្ញារកចំណូលបាន ១០.៥លានដុល្លារ និងត្រូវបានទស្សនាវដ្តី Forbs រាប់ចូលក្នុងចំណោមតារា YouTube ទាំង ១០ ដែលរកចំណូលបានច្រើនជាងគេលើលោក ។
នៅខែវិច្ឆិកា ឆ្នាំ ២០១៨ កញ្ញាបានប្រាប់ដល់អ្នកគាំទ្រលើ YouTube ថាកញ្ញាបានធ្វើអ្វីដដែលៗអស់ ៨ឆ្នាំមកហើយដែលធ្វើឲ្យកញ្ញាហត់នឿយទាំងផ្លូវចិត្ត ផ្លូវកាយ និងផ្លូវអារម្មណ៍ ។
នៅខែកុម្ភៈ ឆ្នាំ ២០១៩ កញ្ញាបានប្រកាសលើ Twitter របស់ខ្លួនថាកញ្ញាជាមនុស្សដែលស្រលាញ់មនុស្សទាំងពីរភេទ ហើយខែមីនា ឆ្នាំ ២០១៩ មានសេចក្តីប្រកាសថាកញ្ញានឹងក្លាយជាពិធីករនៃកម្មវិធី Late Night Show ដ៏ល្បីក្នុងសហរដ្ឋអាមេរិកដែលបានចាប់ផ្តើមផ្សាយនៅខែកញ្ញា ឆ្នាំ ២០១៩ ៕ កែសម្រួលដោយ ៖ សុឃាក់
ចែករំលែកព័តមាននេះ