ខេត្តព្រះសីហនុ ៖ បុរសជាជនជាតិថៃម្នាក់ មានប្រពន្ធជាជនជាតិខ្មែរ ត្រូវបានសមត្ថកិច្ចកងរាជអាវុធហត្ថស្រុកព្រៃនប់សហការជាមួយកងរាជអាវុធហត្ថស្នាក់ការ៤០១ ធ្វើការឃាត់ខ្លួនជាមួយអាវុធខ្លីមួយដើម និងយកមកកាន់មូលដ្ឋានអាវុធហត្ថស្រុកព្រៃនប់ បន្ទាប់ពីបុរសជនជាតិថៃរូបនេះត្រូវបានស្ត្រីជាប្រពន្ធប្តឹងចោទប្រកាន់ពីបទបំផ្លាញទ្រព្យសម្បត្តិក្នុងផ្ទះ។
ហេតុការណ៍ខាងលើនេះបានកើតឡើងកាលពីវេលាម៉ោង៧និង៣០នាទីព្រឹកថ្ងៃទី១៧ ខែមិនា ឆ្នាំ២០២០ នៅក្រុមទី៤ ភូមិស្វាយ ឃុំតានៃ ស្រុកព្រៃនប់ ខេត្តព្រះសីហនុ ។
តាមសមត្ថកិច្ចករាជអាហត្ថមូលដ្ឋានស្រុកព្រៃនប់បានឲ្យដឹងថា បុរសជនជាតិថៃដែលបានឃាត់ខ្លួនខាលើឈ្មោះ ប៊ុនម៉ា ប៊ុនមី អាយុ៤៥ឆ្នាំ មុខរបរជាអ្នកបើកទូក ស្នាក់នៅភូមិឃុំកើតហេតុខាងលើ ។ ចំណែកស្ត្រីជាប្រពន្ធ ជនជាតិខ្មែរ មិនស្គាល់ឈ្មោះនោះទេ ។
តាមប្រភពដដែលបានបន្តថា មូលហេតុដែលធ្វើអោយជនសង្ស័យឈានដល់ការប្រើអំពើហិង្សាបំផ្លាញទ្រព្យសម្បត្តិក្នុងផ្ទះ គឺដោយសារក្រោយពេលផឹកស៊ីស្រវឹង កាលពីយប់ថ្ងៃទី១៦ មិនា លុះព្រឹកឡើងត្រូវបានសមត្ថកិច្ចឃាត់ខ្លួនតែម្ដង ។
បច្ចប្បន្ន ជនសង្ស័យរួមទាំងអាវុធខ្លីចំនួនមួយដើម ត្រូវសមត្ថកិច្ចបញ្ជូនទៅការិយាល័យបទល្មើសព្រហ្មទណ្ឌកងរាជអាវុធហត្ថខេត្តព្រះសីហនុ ដើម្បីអនុវត្តបន្តតាមផ្លូវច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ