ប្រទេសអ៊ីតាលី ៖ ផ្នែកការពារស៊ីវិលអ៊ីតាលីប្រកាសថា តុល្យការនៃការឆ្លងរាលដាលវីរុសCOVID-19 កាន់តែធ្ងន់ដោយមនុស្ស៣៤៩នាក់ទៀតស្លាប់ក្នុងរយៈពេល២៤ម៉ោងចុងក្រោយនេះ ដែលមានការកើនឡើង១៩,៣% នាំឲ្យចំនួនអ្នកបាត់បង់ជីវិតសរុបក្នុងប្រទេសនេះឡើងដល់២.១៥៨នាក់ហើយ។
ចំនួនសរុបនៃអ្នកឆ្លងដែលជំរឿនឃើញក្នុងប្រទេសអឺរ៉ុបនេះ ដែលរងការប៉ះពាល់ខ្លាំងជាងគេដោយសារវីរុស បានឡើងដល់២៧.៩៨០នាក់ទល់នឹង២៤.៧៤៧នាក់នាពេលមុននេះ។ ទោះបីយ៉ាងណាទីភ្នាក់ងារការពារស៊ីវិលអ៊ីតាលីបញ្ជាក់ថា គេនៅរង់ចាំបណ្ដាទិន្នន័យមកពីតំបន់POUILLES ភាគខាងត្បូងប្រទេស និងមកពីតំបន់TRENTEភាគខាងជើងប្រទេសទៀត។ ក្នុងចំណោមមនុស្សដែលឆ្លងវីរុស១.៨៥១នាក់កំពុងទទួលការព្យាបាលបន្ទាន់ ទល់នឹង១.៦៧២នាក់នាពេលមុននេះ រួចមនុស្ស២.៧៤៩នាក់បានព្យាបាលជាទាំងស្រុង ទល់នឹង២.៣៣៥នាក់នាពេលមុននេះ។
ចំណែកប្រទេសចិនវិញនឹងបញ្ជូនពួកអ្នកជំនាញការពេទ្យបន្ថែមទៀតទៅកាន់អ៊ីតាលី ហើយនឹងធ្វើអ្វីគ្រប់បែបយ៉ាង ដើម្បីផ្ដល់សម្ភារពេទ្យនិងជំនួយច្រើនប្រភេទទៀតទៅកាន់អ៊ីតាលី។ នេះជាការអះអាងរបស់ប្រធានាធិបតីចិនលោកស៊ីជីនពីង ក្នុងឱកាសនៃការសន្ទនាតាមទូរស័ព្ទរបស់លោក ជាមួយនាយករដ្ឋមន្ត្រីអ៊ីតាលីលោកGIUSEPPE CONTE៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ