ADផ្ទាំងផ្សព្វផ្សាយពាណិជ្ជកម្ម

ម្នាក់ៗព្រលឹងចុងសក់! ឆេះកន្លែងស្តុកសំរាមជាប់អគាររោងចក្រ

4 ឆ្នាំ មុន

ភ្នំពេញ
១៧ ខែ មីនា ឆ្នាំ ២០២០ ម៉ោង ១៦:១៣

រាជធានីភ្នំពេញ ៖ អាជ្ញាធរនិងសមត្ថកិច្ចខណ្ឌកំបូលនិងសង្កាត់កន្ទោកបានចេញទៅអន្តរាគមន៍ភ្លាមៗ ព្រមទាំងបានទាក់ទងហៅរថយន្តពន្លត់អគ្គិភ័យចំនួន៣គ្រឿងចេញទៅកាន់ទីតាំងរោងចក្រផលិតកាបូបមួយកន្លែង បន្ទាប់ពីទទួលបានព័ត៌មានមកថា មានអគ្គិភ័យឆាបឆេះទីតាំងស្តុកសំរាម ដែលស្ថិតនៅជាប់ជញ្ជាំងអគាររោងចក្រ ហើយបុគ្គលិកនៅទីនោះនាំគ្នាប្រើបំពង់ពន្លត់អគ្គិភ័យបាញអស់ជាង១០បំពង់ទៅហើយមិនរលត់ទៀតនោះ និងមានការព្រួយបារម្ភខ្លាចឆេះរាលចូលទៅដល់ក្នុងអគាររោងចក្រទាំងមូល។ ហេតុការណ៍ខាងលើនេះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី១៧…

ហេតុការណ៍ខាងលើនេះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី១៧ ខែមិនា ឆ្នាំ២០២០ នៅក្នុងរោងចក្រផលិតកាបូបយីហោ QY BAG &LUGGAGE(CAMBODIA) CO.,LTD ដែលមានទីតាំងស្ថិតនៅក្នុងភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ។

តាមប្រភពព័ត៌មានបានឲ្យដឹងថា នៅមុនពេលកើតហេតុ ខណៈដែលកម្មករកំពុងចូលទៅធ្វើការបណ្ដើរៗក្រោយពីហូបបាយថ្ងៃត្រង់រួចនោះ ស្រាប់តែមានការឆាបឆេះទីតាំងស្តុកសំរាមដែលមានកម្ទេចក្រណាត់និងជ័រ ព្រមទាំងសំរាមជាច្រើនប្រភេទទៀតដែលស្ថិតនៅជាប់ជញ្ជាំងអគាររោងចក្រផ្នែកខាងក្រោយ ។ ពេលនោះបានបង្កឲ្យមានការភ្ញាក់ផ្អើលយ៉ាងខ្លាំង ភ្លាមៗនោះបុគ្គលិករោងចក្របាននាំគ្នាយកបំពង់ពន្លត់អគ្គិភ័យបាញ់ពន្លត់អស់ជាង១០បំពង់ ប៉ុន្តែមិនរលត់ឡើយ ទើបរាយការណ៍សុំជំនួយពីអាជ្ញាធរនិងសមត្ថកិច្ចខណ្ឌកំបូល ខណៈនោះអាជ្ញាធរបានចេញអន្តរាគមន៍និងហៅរថយន្តពន្លត់អគ្គិភ័យចំនួន៣គ្រឿងចេញទៅកាន់ទីតាំងរោងចក្រផលិតកាបូបនោះ។

តាមប្រភពដដែលបានបន្តទៀតថា ការឆាបឆេះខាងលើមិនទាន់ពីមូលហេតុនៅឡើយទេ ហើយគពុំដឹងថាមានអ្នកលួចដុត ឬបោះកន្ទុយបារីចោលផ្ដេសផ្ដាស់ ឬមកពីអ្វីឲ្យពិតប្រាកដនោះទេ ក្រោយពេលទៅដល់រថយន្តពន្លត់អគ្គិភ័យបានបាញ់ទឹកអស់១រថយន្ត ទើបភ្លើងរលត់ទៅវិញទាំងស្រុង ។ ប៉ុន្តែហេតុការណ៍នេះពិតជាបង្កឲ្យមានការភិតភ័យខ្លាំងណាស់ ព្រោះទីតាំងដែលត្រូវភ្លើងឆេះនោះគឺស្ថិតនៅជាប់អគាររោងចក្រដែលមានដាក់ម៉ាសុីនសង្វាក់ផលិតកម្ម និងគ្រឿងផ្សំផ្សេងៗ ព្រមទាំងវត្ថុធាតុដើមសម្រាប់ផលិតកាបូបនិងផលិតផលសម្រេចជាច្រើនទៀតផងដែរ។ សំណាងខ្លាំងណាស់ដែលពន្លត់ទាន់ពេល ប្រសិនបើពន្លត់អត់ទាន់ទេ ហើយភ្លើងឆេះរាលដល់អគាររោងចក្រនេះវិញ នឹងបង្កមហន្តរាយធំជាក់ជាមិនខានឡើយ៕ (កែសម្រួលដោយ ៖ ធីតា)