ខេត្តកំពង់ចាម ៖ ស្ថាប័នជំនាញគ្រប់ជាន់ថ្នាក់បានធ្វើការប្រជុំជាបន្ទាន់មួយដោយធ្វើឡើងនាព្រឹកថ្ងៃទី១៧ មីនា ឆ្នាំ២០២០ នៅសាលប្រជុំតូចសាលាខេត្តកំពង់ចាម។ក្នុងនោះគ្រោងនឹងពង្រីកអាគាររបេងមានចំនួនប្រមាណ៤០បន្ទប់សម្រាប់ដាក់អ្នកជំងឺកូវីដ-19 បន្ថែមពីលើអាគារចាស់ចំនួន៥ សរុបកើនដល់៤៥បន្ទប់ ព្រោះតាមទូរលេខរបស់ក្រសួងសុខាភិ បាលចេះតែមានការកើនឡើងគួរឲ្យព្រួយបារម្ភ។
លោកវេជ្ជបណ្ឌិតគីមសួរ ភិរុណ ប្រធានមន្ទីរសុខាភិបាលខេត្តមានប្រសាសន៍ឲ្យដឹងថាសព្វថ្ងៃនេះបន្ទប់សម្រាប់សង្គ្រោះអ្នកជំងឺ Covid-19 មានចំនួនតែ៥បន្ទប់នៅក្នុងមន្ទីរពេទ្យខេត្តកំពង់ចាម ដែលស្ថិតនៅដាច់ដោយឡែកពីគេ។
ជាក់ស្ដែងមាននាវាដឹកអ្នកដំណើរចម្រុះជាតិសាសបានមកចូលចតនៅច្រាំងទន្លេក្រុងកំពង់ចាមកាលពីល្ងាចថ្ងៃទី៩មីនា២០២០ ។ តាមរយៈការធ្វើតេស្តនៅវិទ្យាស្ថានប៉ាស្ទ័របានរកឃើញស្ត្រីចំណាស់ជនជាតិអង់គ្លេសម្នាក់មានផ្ទុកCovid-19 ក្រោយមកទៀតក៏បានរកឃើញពីរនាក់ប្ដីប្រពន្ធជនជាតិអង់គ្លេសមានផ្ទុកជំងឺនេះទៀត។តែត្រូវបានបញ្ជូនទៅសង្គ្រោះបន្តនៅរាជធានីភ្នំពេញ។
លោកប្រធានមន្ទីរសុខាភិបាលខេត្តកំពង់ចាម មានប្រសាសន៍បន្តថា ដោយឡែកអ្នកដំណើរនៅលើនាវាទេសចរណ៍នោះត្រូវបាននាំមកសម្រាកនៅសណ្ឋាគារមេគង្គមាត់ទន្លេ រយៈពេល១៤ថ្ងៃដើម្បីតាមដានមើលជំងឺបន្តទៀត។រហូតមកដល់ថ្ងៃទី២៣មីនានឹងត្រូវយកសំណាកទាំងអស់ទៅពិនិត្យនៅវិទ្យាស្ថានប៉ាស្ទ័រម្ដងទៀតប្រសិនណាបើមិនមានវីរុសcovid-19នឹងត្រូវឲ្យធ្វើដំណើរត្រឡប់ទៅកាន់ប្រទេសរបស់ខ្លួនវិញ។
ដោយសារតែមានក្តីកង្វល់ចំនួនអ្នកជំងឺត្រូវបានក្រសួង សុខាភិបាលរកឃើញជាបន្តបន្ទាប់និងមានចំនួនកើនឡើងនៅតាមបណ្ដាខេត្តក្រុងផ្សេងៗទៀតក្នុងប្រទេសកម្ពុជា ។ ជាមួយនោះរូបលោកនឹងមានគោលការណ៍ពង្រីកអគារសម្រាប់អ្នកជំងឺរបេងដែលមានចំនួន៤០បន្ទប់នឹងត្រូវធ្វើការជួសជុលជាបន្ទាន់ហើយអ្នកជំងឺដែលមានគ្នាមិនដល់១០នាក់ផងនោះនឹងត្រូវឲ្យទៅសម្រាកនៅបន្ទប់ផ្សេងទៀត(អ្នករបេង)។
ក្រោយពីជួសជុលរួច អគារទាំងនេះសម្រាប់ដាក់ព្យាបាលអ្នកជំងឺcovid-19។សូមបញ្ជាក់ថាអ្នកដំណើរនៅលើនាវារួមនឹងក្រុមគ្រូពេទ្យដែលទៅយកសំណាងនិងអ្នកបាញ់ថ្នាំសម្លាប់មេរោគនៅលើនាវាទេសចរណ៍មានគ្នាចំនួន ២៣នាក់ក៏ស្ថិតនៅក្រោមការតាមដានរយៈពេល១៤ថ្ងៃដែរ។
លោកអ៊ុន ចាន់ដា អភិបាលនៃគណៈអភិបាលខេត្តមានប្រសាសន៍ឲ្យដឹងថា យើងត្រូវតែធ្វើការសាមគ្គីគ្នាជាធ្លុងមួយដើម្បីប្រយុទ្ធប្រឆាំងនឹងជំងឺcovid-19 ធ្វើយ៉ាងណាកុំឲ្យមានការរីករាលដាលនៅតាមសហគមន៍ក៏ដូចជានៅក្នុងខេត្តកំពង់ចាមបន្តទៀត ។ អ្នកដំណើរចម្រុះជាតិសាសន៍ដែលបានមកស្នាក់នៅលើសណ្ឋាគារមេគង្គរហូតមកដល់ពេលនេះរយៈ ពេល៨ថ្ងៃហើយសុខភាពម្នាក់ៗល្អជាធម្មតា ក្រោមការយកចិត្តទុកដាក់ពីសំណាក់របស់ក្រុមគ្រូពេទ្យ។ហើយរាល់ការចំណាយស្ថិតនៅលើអាជ្ញាធរជាអ្នករាប់រងដោះស្រាយទាំងស្រុងនេះជាកិច្ចការមនុស្សធម៌។
លោកអ៊ុន ចាន់ដាអភិបាលខេត្តមានប្រសាសន៍បន្តថា ដើម្បីការពារកុំអោយឆ្លងជំងឺcovid-19 ដោយត្រូវបានអនុវត្តចាប់ពីថ្នាក់ដឹកនាំរហូតដល់មន្ត្រីថ្នាក់ក្រោមកន្លែងធ្វើការធ្វើយ៉ាងណាត្រូវមានអាកុលសម្រាប់លាងដៃនិងម៉ាសពាក់ផងដែរ ។ ជាមួយនោះមេរោគអាចតោងជាប់នៅឯកសារពិសេសបន្ទប់ដែលមានបំពាក់ម៉ាស៊ីនត្រជាក់មេរោគនេះនៅបានយូរម៉ោងហើយថែមទាំងងាយចម្លងពីមនុស្សម្នាក់ទៅម្នាក់ទៀតប្រសិនណាបើយើងមិនចេះសម្អាតនិងអនាម័យ។
ជាមួយនោះលោកប្រធានមន្ទីរព័ត៌មានខេត្តកំពង់ចាម ត្រូវតែបង្កើត sport សម្រាប់ធ្វើការអប់រំជាសំឡេងដែលមានរយៈពេល១៥នាទី ក្រោយពីបង្កើតបានហើយនឹងត្រូវចំលងចែកចាយទៅតាមបណ្ដាលស្រុក-ក្រុងទាំង១០និងមានការបែងចែកទៅដល់សាលាឃុំនិងទីវត្តអារាមចាក់តាមមេក្រូ ក្នុងនោះមានតាមវិហារអ៊ីស្លាម វិហាយេស៊ូគ្រីស្ទ បំផុសឲ្យបងប្អូនប្រជាពលរដ្ឋត្រូវចេះអនាម័យនិងបង្កើនការប្រុងប្រយ័ត្នឲ្យបានខ្ពស់ធ្វើយ៉ាងណាចៀសវាងកុំឲ្យឆ្លងជំងឺ covid-19 ដរាបណារហូតដល់តែជំងឺនេះស្ងប់ស្ងាត់ទើបយើងឈប់សម្រាក៕ (កែសម្រួលដោយ ៖ ធីតា)
ចែករំលែកព័តមាននេះ