រាជធានីភ្នំពេញ ៖ ឃ្លាំងស្តុកនិងដំឡើងរថយន្តរបស់ក្រុមហ៊ុន MITSUBISIH ត្រូវបានអគ្គិភ័យឆាបឆេះយ៉ាងសន្ធោសន្ធៅអស់ប្រមាណជាង២ម៉ោង បណ្តាលឱ្យសម្ភារគ្រឿងបំលាស់និងរថយន្តសេ៊រីទំនើបជាច្រើនគ្រឿងរងការខូចខាត ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោងប្រមាណ៣រសៀលថ្ងៃទី១៦ ខែមីនា ឆ្នាំ២០២០…
រាជធានីភ្នំពេញ ៖ ឃ្លាំងស្តុកនិងដំឡើងរថយន្តរបស់ក្រុមហ៊ុន MITSUBISIH ត្រូវបានអគ្គិភ័យឆាបឆេះយ៉ាងសន្ធោសន្ធៅអស់ប្រមាណជាង២ម៉ោង បណ្តាលឱ្យសម្ភារគ្រឿងបំលាស់និងរថយន្តសេ៊រីទំនើបជាច្រើនគ្រឿងរងការខូចខាត ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោងប្រមាណ៣រសៀលថ្ងៃទី១៦ ខែមីនា ឆ្នាំ២០២០ នៅចំណុចទីតាំងក្រុមហ៊ុន ដែលស្ថិតនៅតាមបណ្តោយ មហាវិថីសហព័ន្ធរុស្ស៊ី ទន្ទឹមស្ពានអាកាសផ្សារដីហុយក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ទាក់ទិនការកើតមានអគ្គិភ័យនេះ គេពុំទាន់ដឹងថា បណ្តាលមកពីអ្វីនោះទេ តែគេមានការសង្ស័យថា បណ្តាលមកពីទុស្សេខ្សែភ្លើង ។ តាមព័ត៌មានឱ្យដឹងថា នៅមុនពេលកើតហេតុ មានការឆ្លងចរន្តអគ្គិសនីបែកផ្កាភ្លើង ហើយក៏ក្លាយជាអគ្គិភ័យឆាបឆេះតែម្តង ។ នៅរសៀលនោះ គេឃើញភ្លើងបានឆាបឆេះយ៉ាងសន្ធោសន្ធៅផ្សែងហុយទៅលើអាកាសបង្កការភ្ញាក់ផ្អើលមួយចំហៀងរាជធានីភ្នំពេញ ។ ភ្លាមៗគេឃើញរថយន្តពន្លត់អគ្គិភ័យបានទៅអន្តរាគមន៍បាញ់ពន្លត់ ។
តាមនគរបាលបានឱ្យដឹងថា នៅក្នុងហេតុការណ៍នោះ រថយន្តពន្លត់អគ្គិភ័យចំនួន៤៣គ្រឿង បានទៅអន្តរាគមន៍បាញ់ពន្លត់រហូតដល់វេលាម៉ោង៥ ទើបភ្លើងបានរលត់ទៅវិញ ។ តាមព័ត៌មានបឋមបានឱ្យដឹងថា រថយន្តទំនើបប្រមាណចំនួន២៧គ្រឿង ត្រូវរងការខូចខាត ខ្លះឆេះអស់ពាក់កណ្តាល ខ្លះឆេះទាំងស្រុង ។ នៅក្នុងនោះ មានរថយន្តស៊េរីទំនើបចំនួន២៥គ្រឿង និង២គ្រឿងជារថយន្តដែលភ្លៀវយកមកជួសជុល ។ ក្រៅពីនោះមានសម្ភារជាគ្រឿងបំលាស់រថយន្តថ្មីដែលទុកដំឡើង ត្រូវភ្លើងឆេះអស់គ្មានសល់ផងដែរ ។
គួរបញ្ជាក់ថា ឃ្លាំងដែលត្រូវភ្លើងឆេះមានទំហំប្រមាណ៥០ម៉ែត្រគុណនឹងប្រមាណ៤០ម៉ែត្រ ប្រក់ស័ង្កសី មួយចំហៀងខាងកើតជាកន្លែងដំឡើងរថយន្ត ។ នៅផ្នែកកណ្តាលជាកន្លែងស្តុកសម្ភារគ្រឿងបំលាស់ និងផ្នែកខាងលិច ដាក់រថយន្ត៣ជួរត្រូវភ្លើងឆេះរងការខូចខាតទាំងស្រុង ។ នគរបាលឱ្យដឹងថា ការកើតមានអគ្គីភ័យនេះពុំទាន់ដឹងពីមូលហេតុអ្វីនោះទេ ។ តាមព័ត៌មានថា ក្នុងការពន្លត់ភ្លើងនេះ ធ្វើឱ្យរបួសប៉ូលិសអគ្គិភ័យ២នាក់ និងក្រុមហ៊ុនកោះពេជ្រម្នាក់ ៕
ចែករំលែកព័តមាននេះ