ខេត្តស្ទឹងត្រែង ៖ បើតាមសេចក្តីរាយការណ៍បឋមបានឱ្យដឹងថា ត្រីគល់រាំងដែលជាប្រភេទត្រីមេពូជនឹងប្រឈមជិតផុតពូជមួយក្បាលទម្ងន់១៥គីឡូក្រាមជាប់មងប្រជានេសាទនៅភូមិកាំងដីស សង្កាត់ព្រះបាទ ក្រុងស្ទឹងត្រែង ហើយត្រូវបានអ្នកនេសាទដោះលែងទៅវិញ កាលពីថ្ងៃទី១៦ ខែមីនា ឆ្នាំ២០២០។
ប្រធានសហគមន៍នេសាទភូមិកាំងដីស លោក ម៉ា សុខាក់ បានប្រាប់ឱ្យដឹងថា ត្រីគល់រាំងនោះ គឺហែលទៅជាប់មងប្រជានេសាទគាត់ដាក់ក្នុងទន្លេមេគង្គ។ ហើយរូបគាត់ជាអ្នកបម្រើការងារ និងជាប្រធានសហគន៍នេសាទ ហើយមានការយល់ដឹងពីការអភិរក្សត្រីមេពូជដ៏កម្រ ដូច្នេះលោកក៏បានយកត្រីនោះទៅលែងក្នុងទឹកវិញ ដើម្បីឱ្យវាបានបន្តពូជតទៅទៀត។
ប្រធានសហគមន៍នេសាទបានបន្ថែមថា លោកបានថតសកម្មភាពលែងត្រីទម្ងន់១៥គីឡូក្រាម ដ៏កម្រមួយនេះទៅក្នុងទឹកជាមួយអ្នកភូមិ រួចបង្ហោះសារតាមបណ្តាញទំនាក់ទំនងសង្គមហ្វេសប៊ុក ដើម្បីសុំឱ្យមានការចូលរួមថែរក្សាពូជត្រីដែលជិតផុតពូជទាំងនេះ ហើយងាកមកចូលរួមទប់ស្កា ត់បទល្មើសផ្សេងៗដែលកើតមាននៅក្នុងមូលដ្ឋាន ដោយសហការជាមួយសមត្ថកិច្ច និងជំនាញជលផល។
បើតាមនាយខណ្ឌរដ្ឋបាលជលផលខេត្ត លោក ទុំ នីរ៉ូ បានលើកឡើងថា លោកចង់ឃើញប្រជាពលរដ្ឋនៅក្នុងសហគមន៍ចូលរួមថែរក្សាការពារប្រភេទត្រីជិតផុតពូជធំៗ ដូចជាត្រីរាជ ត្រីគល់រាំង ត្រីត្រសក់ជាដើម។
លោកនាយខណ្ឌរូបនេះយល់ថា ប្រធានសហគមន៍ចាប់បានត្រីគល់រាំងមួយក្បាល ហើយលែងវិញ គឺជាគំរូដ៏ល្អ។ លោកសូមឱ្យមានការចូលរួមការពារទាំងអស់គ្នា ព្រោះសព្វថ្ងៃត្រី៣ប្រភេទខាងលើ យើងកម្រនឹងបានឃើញណាស់។ វាចូលចិត្តរស់នៅតាមអន្លង់ទឹកជ្រៅក្នុងទន្លេមេគង្គខេត្តស្ទឹងត្រែង និងខេត្តក្រចេះ។
គួរបញ្ជាក់ថា ប្រភេទត្រីគល់រាំងនេះ គេធ្លាប់ប្រទះឃើញទម្ងន់រហូតដល់ទៅជាង១០០គីឡូក្រាមឯណោះ សម្រាប់នៅទន្លេមេគង្គស្ទឹងត្រែង៕ (កែសម្រួលដោយ ៖ បុប្ផា)
ចែករំលែកព័តមាននេះ