រាជធានីភ្នំពេញ ៖ បុរសម្នាក់ត្រូវបានសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលធ្វើការឃាត់ខ្លួនតាមដីកាបញ្ជាឲ្យចូលខ្លួនរបស់ស្ថាប័នអយ្យការកាលពីព្រឹកថ្ងៃទី១៦ ខែ មីនា ឆ្នាំ២០២០ នៅមុខបរិវេណសាលាដំបូងរាជធានីភ្នំពេញ រួចនាំចូលរថយន្តភ្លាមៗ និងដឹកទៅកាន់នាយកដ្ឋាននគរបាលព្រហ្មទណ្ឌក្រសួងមហាផ្ទៃ ខណៈបុរសរូបនោះបានចូលខ្លួនតាមដីកាកោះ ហៅរបស់ចៅក្រមស៊ើបសួរ ។
បុរសនោះត្រូវបានគេស្គាល់ឈ្មោះ ចាន់ សុខា អាយុ៤៧ឆ្នាំ មានអាស័យដ្ឋានផ្ទះលេខ៤៦ ផ្លូវ៤៧៤ សង្កាត់បឹងត្របែក ខណ្ឌចំការមន រាជធានីភ្នំពេញ នឹងមានស្រុកកំណើតនៅឃុំកំពង់ស្វាយ ស្រុកសិរីសោភ័ណ ខេត្តបាត់ដំបង ។
តាមប្រភពព័ត៌មាននៅសាលាដំបូងរាជធានីភ្នំពេញ ត្រូវបានគេបង្ហើបឲ្យដឹងថា ឈ្មោះ ចាន់ សុខា ត្រូវបានចៅក្រមស៊ើបសួរកោះហៅឲ្យចូលខ្លួនទៅបំភ្លឺពាក់ព័ន្ធសំណុំរឿងសុំផ្តាច់និតិសង្វាស (លែងលះ) ជាមួយភរិយាម្នាក់អាយុជាង៦០ឆ្នាំ តាមពាក្យបណ្តឹងមួយដែលបានដាក់ប្តឹងចូលសាលាដំបូងរាជធានីភ្នំពេញ កាលក្នុងអំឡុងឆ្នាំ២០ ១៩ ។
តាមប្រភពព័ត៌មានបានបន្តថា ក្រោយពេលចូលទៅបំភ្លឺនៅចំពោះមុខចៅក្រមស៊ើបសួររួចហើយ បុរសរូបនោះក៏បានចាកចេញទៅវិញ ប៉ុន្តែនៅពេលគាត់យកប័ណ្ណទៅដោះដូរជាមួយនគរបាលយាមច្រកចេញចូលសាលាដំបូង ក៏ត្រូវបានកម្លាំងសមត្ថកិច្ចនគរបាលព្រហ្មទណ្ឌក្រសួង យកដីកាបញ្ជាឲ្យចូលខ្លួនរបស់ព្រះរាជអាជ្ញា អនុវត្តនាំខ្លួនទៅកាន់ក្រសួងមហាផ្ទៃតែម្តងទៅ ។ ការនាំខ្លួនបុរសនោះត្រូវបានសមត្ថកិច្ចបង្ហើបថា ឈ្មោះ ចាន់ សុខា ពាក់ព័ន្ធទៅនឹងសំណុំរឿងមួយផ្សេងទៀតពីបទ.ប្រើអំពើហិង្សា លើដើមបណ្តឹងអតីតៈជាភរិយា មុនពេលឈ្មោះនេះបានគេចខ្លួនចេញពីផ្ទះមួយរយៈមក តែដោយសារគាត់មិនបង្ហាញខ្លួននៅសមត្តកិច្ច ទើបមានការនាំខ្លួននោះ ។
សមត្តកិច្ចបានបង្ហើបទៀតថា តែទោះជាយ៉ាងណា សំណុំរឿងនេះ មន្ត្រីនគរបាលយុត្តិធម៌បាននឹងកំពុងព្យាយាមឲ្យភាគីទាំងពីរជួបចចារគ្នា ដើម្បីបញ្ចប់វិវាទករណីប្រើអំពើហិង្សានោះ ហើយបើនៅមិនត្រូវគ្នាទេមានតែបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ