រាជធានីភ្នំពេញ ៖ ដោយសារតែសភាពការនៃការរាតត្បាតជាសាកលនៃជំងឺកូវីដ-១៩ ក៏ដូចជាការរកឃើញករណីវិជ្ជមាន កូវីដ-១៩ចំនួន ១២ករណីបន្ថែមទៀត ដែលនាំឲ្យកម្ពុជាមានករណីវីរុសឆ្លងមួយនេះកើនដល់២៤ករណីនោះ គិតត្រឹមថ្ងៃទី១៧ មីនា នេះ ក្រសួងសុខាភិបាលកម្ពុជា ដោយមានការសម្រេចពីរាជរដ្ឋាភិបាលកម្ពុជាផងនោះ គឺសម្រេចនឹងប្រើប្រាស់សណ្ឋាគារ Great DUKE (អតីតសណ្ឋាគារអាំងទែកុងទំណង់តាល់) ធើ្វជាមន្ទីរពេទ្យ សម្រាប់ពិនិត្យ ថែទាំ និងព្យាបាលអ្នកជំងឺកូវីដ-១៩ នេះ ។
យ៉ាងណាមិញ ប្រភពដដែលបានឲ្យដឹងថា កម្ពុជាមិនទាន់មានការរាតត្បាតក្នុងសហគមន៍របស់យើងទេ ព្រោះករណីទាំង២៤ ដែលរកឃើញមានវិជ្ជមានកូវីដ-១៩នោះ គឺសុទ្ធជាករណីនាំចូលពីក្រៅប្រទេស ។
សេចក្តីជូនដំណឹងរបស់ក្រសួងសុខាភិបាលដដែលបានបន្តថា «ដើម្បីបញ្ចៀសនូវការឆ្លងក្នុងសហគមន៍ជាយថាហេតុ រាជរដ្ឋាភិបាលបានឲ្យក្រសួងសុខាភិបាល សហការជាមួយកងកម្លាំងសុខាភិបាលនៃកងយោធពលខេមរភូមិន្ទរបស់ក្រសួងការពារជាតិ និងកងកម្លាំងសុខាភិបាលនៃនគរបាលជាតិរបស់ក្រសួងមហាផ្ទៃ ដើម្បីរួមសហការគ្នាប្រយុទ្ធនឹងជំងឺកូវីដ-១៩ ឲ្យកាន់តែមានប្រសិទ្ធភាពខ្ពស់» ។
សូមរំលឹកថា ក្រសួងសុខាភិបាលបានចេញប្រកាសព័ត៌មាននៅព្រឹកថ្ងៃទី១៧ មីនា នេះថា មានករណីរកឃើញករណីវិជ្ជមាន១២ ករណីបន្ថែមលើខ្មែរឥស្លាម១១នាក់ និងខ្មែរម្នាក់ពីប្រទេសថៃ ដែលនាំឲ្យកម្ពុជាមានករណីកូវីដ១៩ កើនឡើងដល់ ២៤ ករណីហើយ ។
ប្រភពដដែលបានឲ្យដឹងថា ជនជាតិខ្មែរឥស្លាមទាំង១១ វីជ្ជមានកូវីដ-១៩ មកពីពិធីសាសនានៅប្រទេសម៉ាឡេស៊ី និងជនជាតិខ្មែរ០១ នាក់ សរុប១២នាក់ ជាករណីថ្មី វិជ្ជមានវីរុសកូវីដ-១៩។
សម្រាប់ករណី១២ ថ្មីនៃការរកឃើញកូវីដ-១៩ នេះ គឺកើតមាននៅ៖ បន្ទាយមានជ័យ ២ករណី, ភ្នំពេញ២ ករណី, កំពង់ឆ្នាំង២ករណី, បាត់ដំបង៤ករណី, កំពត១ករណី, និងខេត្តត្បូងឃ្មុំ១ករណី ៕
ចែករំលែកព័តមាននេះ