ប្រទេសអាល្លឺម៉ង់-សហរដ្ឋអាមេរិក ៖ រដ្ឋាភិបាលរបស់អធិការបតីអាល្លឺម៉ង់លោកស្រីអេនចឺឡាម័រកែល កាលពីយប់ថ្ងៃទី១៥ ខែមីនា បានចោទប្រកាន់សហរដ្ឋអាមេរិក របស់លោកដូណាល់ត្រាំថា ប៉ុនប៉ងដណ្ដើមធ្វើម្ចាស់គម្រោងវ៉ាក់សាំងប្រឆាំងវីរុស COVID-19 ដែលផលិតដោយមន្ទីរពិសោធន៍អាល្លឹម៉ង់មួយ និងព្រមានថា នឹងធ្វើអ្វីគ្រប់យ៉ាងដើម្បីឲ្យវ៉ាក់សាំងនោះត្រូវផលិតនៅអឹរ៉ុប។
រដ្ឋមន្ត្រីសេដ្ឋកិច្ចអាល្លឺម៉ង់លោកPETER ALTMAIERតាមទូរទស្សន៍រដ្ឋARD បានតវ៉ាថា អាល្លឹម៉ង់មិនមែនលក់ដូរឡើយ ហើយរដ្ឋមន្ត្រីមហាផ្ទៃអាល្លឺម៉ង់អះអាងពីភាពត្រឹមត្រូវនៃព័ត៌មានដែលចេញផ្សាយនាថ្ងៃនោះដែរ ដោយកាសែតអាល្លឹម៉ង់ DIE WELTស្ដីពីការប៉ុនប៉ងរបស់ប្រធានាធិបអាមេរិក លោកដូណាល់ត្រាំ ធ្វើការគាបសង្កត់ លើមន្ទីរពិសោធន៍អាល្លឺម៉ង់ ទាមទារប្រាក់ដ៏ច្រើនមហាសាលមួយ។
អាល្លឺម៉ង់ពេលនេះកំពុងប្រឈមមុខនឹងការឆ្លងរាលដាលនៃវីរុសCOVID-19 ដែលឆ្លងដល់មនុស្សជិត៥.០០០នាក់និងបណ្ដាលឲ្យមនុស្សស្លាប់១២នាក់ហើយក្នុងប្រទេសនេះ។ មន្ទីរពិសោធន៍អាល្លឺម៉ង់ CUREVACស្ថិតនៅក្រុងTUBINGENភាគនិរតីប្រទេស ជាមន្ទីរពិសោធន៍មួយក្នុងចំណោមមន្ទីរពិសោធន៍នានា នៃពិភពលោកដែលធ្វើការរុករកវ៉ាក់សាំងប្រឆាំងវីរុសនេះ ដោយទទួលការឧបត្ថម្ភរបស់រដ្ឋាភិបាលអាល្លឺម៉ង់។
មន្ទីរពិសោធន៍នេះអះអាងថា នាប៉ុន្មានខែខាងមុខទៀតខ្លួនអាចបង្ហាញគម្រោងនៃវ៉ាក់សាំងមួយ ដែលនឹងធ្វើការសាកល្បងគ្លីនិក។
គេថាលោកត្រាំសាកល្បងទាញយកប្រាក់ច្រើនលានដុល្លារពីបណ្ដា ក្រុមអ្នកវិទ្យាសាស្ត្រអាល្លឹម៉ង់ ដែលធ្វើការលើគម្រោងវ៉ាក់សាំងនោះ ឬដណ្ដើមធ្វើម្ចាស់ដោយសារប្រទេសលោកបានវិនិយោគក្នុងសហគ្រាសនោះ។
តាមព័ត៌មានថាប្រធានអគ្គនាយកនៃក្រុងហ៊ុនអាល្លឹម៉ង់នោះ ត្រូវបានអញ្ជើញជាបុគ្គល ដោយលោកដូណាល់ត្រាំទៅកាន់សេតវិមាន កាលពីថ្ងៃទី៣មីនា ដើម្បីពិភាក្សាពីការផលិតដោយឆាប់រហ័ស វ៉ាក់សាំងប្រឆាំងវីរុសCOVID-19មួយ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ