ខេត្តព្រះវិហារ ៖ បើតាមសេចក្តីរាយការណ៍បឋមបានឱ្យដឹងថា គ្រោះធម្មជាតិខ្យល់កន្ត្រាក់ បានវាយប្រហារមកលើសាលារៀនអនុវិទ្យាល័យភ្នំឆ័ត្រសែនជ័យមួយជាប់ព្រំដែនកម្ពុជា-ថៃ ស្ថិតក្នុងភូមិសែនជ័យ ឃុំស្រឯម ស្រុកជាំក្សាន្ត ខេត្តព្រះវិហារ បណ្តាលឲ្យរោងដោលមួយខ្នងរលំរាបដល់ដី កាលពីម៉ោង៤រសៀល ថ្ងៃទី១៣ ខែមីនា ឆ្នាំ២០២០នេះ តែសំណាងល្អ មិនមាននរណាម្នាក់រងរបួសឡើយ ។
បើតាមអ្នកស្រី ប៉ាង គឹមដារី ជាគ្រូបង្រៀននៅអនុវិទ្យាល័យភ្នំឆ័ត្រសែនជ័យ បានរៀបរាប់ថា មុនពេលកើតហេតុ នៅម៉ោង៣និង៤៥នាទីរសៀល ថ្ងៃទី១៣ ខែមីនា ឆ្នាំ២០២០ មានខ្យល់បោកបក់ខ្លាំងមែនទែន បានធ្វើឲ្យរោងដោលមួយខ្នងដួលរលំខ្ទេចរាបដល់ដីតែម្តង។ តែសំណាងល្អ សិស្សសាលាទាំងអស់ដែលបានរៀននៅទីនោះ ពួកគេបានចេញពីរៀនត្រឡប់ទៅផ្ទះវិញអស់រៀងៗខ្លួន មុនពេលខ្យល់កន្ត្រាក់នេះបានកើតឡើងប្រមាណជាមួយសន្ទុះតែប៉ុណ្ណោះ ។
អ្នកស្រីបន្តថា អនុវិទ្យាល័យនេះ មានរោងដោល១ខ្នង ស្មើនឹង៣បន្ទប់សិក្សា ចាប់ពីថ្នាក់ទី៧ ដល់ថ្នាក់ទី៩ ក្រោយកើតហេតុ អាជ្ញាធរមូលដ្ឋានក៏បានចុះមកពិនិត្យមើលជាក់ស្តែង និងរាយការណ៍ទៅថ្នាក់ដឹកនាំ ដើម្បីមានវិធានការអន្តរាគមន៍ ។ តែទោះជាបែបនេះក្តី អ្នកស្រីជាគ្រូបង្រៀន និងលោកគ្រូ អ្នកគ្រូដទៃទៀត និងរៀបចំប្រក់តង់បណ្តោះអាសន្ន ដើម្បីបង្រៀនសិស្សដែលសុទ្ធសឹងជាកូនរបស់កងទ័ពនៅទីនោះ ដោយមិនឲ្យខកខានពេលវេលារៀនសូត្រឡើយ និងរង់ចាំអាជ្ញាធរ ព្រមទាំងកងកម្លាំងប្រដាប់អាវុធនៅទីនោះ សាងសង់រោងដោលឡើងវិញ នៅពេលឆាប់ៗនេះ ។
ជាមួយគ្នានេះដែរ លោក ចេង លឹមហ៊ាន់ ប្រធានមន្ទីរអប់រំ យុវជន និងកីឡា ខេត្តព្រះវិហារ បានឲ្យដឹងថា សម្រាប់វិធានការចំពោះមុខនេះ មន្ទីរជំនាញ និងសហការជាមួយកងទ័ព អាជ្ញាធរមូលដ្ឋាននៅទីនោះ និងបញ្ជូនសម្ភារៈ ដូចជាស័ង្កសី ឈើ ទៅកាន់សាលាអនុវិទ្យាល័យ ដែលរងគ្រោះដោយគ្រោះធម្មជាតិខ្យល់កន្ត្រាក់នេះ ដើម្បីរៀបចំសាងសង់កន្លែងសិក្សាថ្មីឡើងវិញ ឲ្យសិស្សានុសិស្សបានរៀនសូត្រធម្មតាវិញ ដោយមិនឲ្យខកខានឡើយ។ លោកបានបញ្ជាក់ថា យ៉ាងយូររោងដោលថ្មីនឹងធ្វើឲ្យរួចរាល់រយៈពេល៣ទៅ៤ថ្ងៃប៉ុណ្ណោះ។ (កែសម្រួលដោយ ៖ បុប្ផា)
ចែករំលែកព័តមាននេះ