ផ្ទុះករណីថ្មី វិហារអ៊ីស្លាមមួយ នាំឲ្យម៉ាឡេស៊ី មានអ្នកឆ្លង COVID-19 ខ្ពស់បំផុតក្នុងអាស៊ាន
កូឡាឡាំពួ ៖ រដ្ឋមន្ត្រីក្រសួងសុខាភិបាលម៉ាឡេស៊ី លោក Datuk Seri Dr Adham មានប្រសាសន៍ថា នាយករដ្ឋមន្ត្រីលោក…
កូឡាឡាំពួ ៖ រដ្ឋមន្ត្រីក្រសួងសុខាភិបាលម៉ាឡេស៊ី លោក Datuk Seri Dr Adham មានប្រសាសន៍ថា នាយករដ្ឋមន្ត្រីលោក Muhyiddin Yassin កំពុងជួបជាមួយក្រសួងសុខាភិបាល និងក្រសួងការពារជាតិ នាថ្ងៃទី១៦ មីនានេះ ដើម្បីពិភាក្សាការងារ ស្តីពីវិធានការណ៍បន្ថែមទៀតសម្រាប់ដោះស្រាយជំងឺរាតត្បាត បង្កឡើងដោយវីរុសកូវីដ-១៩នេះ បន្ទាប់ពីមានការរីករាលដាលយ៉ាងខ្លាំង កាលពីម្សិលមិញ ។
ប្រទេសម៉ាឡេស៊ី កាលពីថ្ងៃទី១៥ មីនា ម្សិលមិញនេះ បានរកឃើញករណីថ្មី មានអ្នកឆ្លងវីរុសកូវីដ-១៩ ដល់ទៅ១៩០នាក់ ដែលភាគច្រើនទាក់ទងនឹងវិហារអ៊ីស្លាមមួយនៅម៉ាឡេស៊ី ធ្វើឲ្យប្រទេសនេះ មានចំនួនអ្នកឆ្លងវីរុសខ្ពស់បំផុត ក្នុងតំបន់អាស៊ាន ។
លោករដ្ឋមន្ត្រីក្រសួងសុខាភិបាលម៉ាឡេស៊ី បាននិយាយថា “ផ្អែកលើការស៊ើបអង្កេតដំបូង ភាគច្រើននៃករណីថ្មីនេះ ត្រូវបានផ្សារភ្ជាប់ទៅនឹងការប្រមូលផ្តុំគ្នានៅវិហារអ៊ីស្លាមមួយ ក្នុងរយៈពេលតែមួយថ្ងៃ មានអ្នកឆ្លងវីរុសដល់១៩០នាក់” ។
ក្រសួងសុខាភិបាល ក៏បានប្រកាសកាលពីថ្ងៃសៅរ៍ សប្តាហ៍មុន ដែរថា មានមនុស្ស ៧៧នាក់ បានបញ្ជាក់ថា ពួកគេបានឆ្លងវីរុស Covid-19 ពាក់ព័ន្ធជាមួយនឹងព្រឹត្តិការណ៍សាសនា ដែលធ្វើឡើងនៅវិហារអ៊ីស្លាមមួយ ក្នុងទីក្រុង Selangor ។ ការជួបជុំនេះ មានអ្នកចូលរួមប្រមាណ ១៦.០០០ នាក់ មកពីប្រទេសមួយចំនួន ។
ជាមួយនឹងករណីថ្មី ធ្វើអោយចំនួនអ្នកឆ្លង Covid-19 សរុបទូទាំងប្រទេសម៉ាឡេស៊ី បានកើនឡើងដល់ ៤២៨នាក់ ។ ក្នុងនោះមាន ៤២ នាក់ ត្រូវបានព្យាបាលជាសះស្បើយហើយ ។ អ្នកជំងឺ ៩នាក់ ស្ថិតក្នុងសភាពធ្ងន់ធ្ងរ និង ៣៨៦នាក់ ស្ថិតក្នុងមណ្ឌលថែទាំ ដាក់នៅបន្ទប់ដាច់ដោយឡែក នៅតាមមន្ទីរពេទ្យ ៕
ចែករំលែកព័តមាននេះ