រាជធានីភ្នំពេញ ៖ សិប្បកម្មគ្រឿងសង្ហារឹមយីហោ «បញ្ញាលក់គ្រឿងសង្ហារឹម» មួយកន្លែងត្រូវបានអគ្គីភ័យ ឆាបឆេះយ៉ាងសន្ធោសន្ធៅ បណ្តាលអោយរោងជាងទំហំប្រមាណ១៤ម៉ែត្រគុណ១៥ម៉ែត្រ រួមទាំងសម្ភារៈគ្រឿងសង្ហារឹម នៅក្នុងរោងរងការខូចខាតទាំងស្រុង ។ ហេតុការណ៍នេះ បង្កអោយមានការភ្ញាក់ផ្អើល កាលពីវេលាម៉ោងប្រមាណ២និង១០នាទីរំលងអធ្រាត្រថ្ងៃទី១៦ ខែមីនានេះ នៅទីតាំងសិប្បកម្ម ដែលស្ថិតនៅតាមផ្លូវ៥៨P ភូមិដីថ្មី សង្កាត់គោកឃ្លាង ខណ្ឌសែនសុខ រាជធានីភ្នំពេញ ។
តាមនគរបាលអោយដឹងថា សិប្បកម្មដែលអគ្គីភ័យឆាបឆេះនោះមានម្ចាស់ឈ្មោះ សន ចាន់ផាណាវុធ ភេទប្រុស អាយុ៣២ឆ្នាំ ជនជាតិខ្មែរ មុខរបរលក់គ្រឿងសង្ហារឹម ។ តាមព័ត៌មានអោយដឹងថា នៅមុនពេលកើតហេតុ ខណៈពេលដែលក្រុមជាងកំពុងតែដេកលង់លក់ស្រាប់តែភ្លើងបានឆាបឆេះរោងជាងរបស់សិប្បកម្ម ដែលស្ថិតនៅផ្នែកខាងក្រោយ បង្កអោយមានការភ្ញាក់ផ្អើលតែម្តង ។ ដោយសារតែរោងជាងពោរពេញទៅដោយកម្ទេចឈើ ភ្លើង បានឆាបឆេះរាលដាល់យ៉ាងរហ័ស និងសន្ធោសន្ធៅពេលរាត្រី ។
តាមនគរបាលការិយាល័យបង្ការ ពន្លត់អគ្គីភ័យ និងសង្គ្រោះនៃស្នងការនគរបាលរាជធានីភ្នំពេញបានអោយដឹងថា នៅក្នុងហេតុការកើតមានអគ្គីភ័យរថយន្តពន្លត់អគ្គីភ័យចំនួន២១គ្រឿង ទៅអន្តរាគមន៍បាញ់ពន្លត់អស់រយៈពេលប្រមាណជាង១ម៉ោងហើយភ្លើងបានរលត់ទៅវិញនៅវេលាម៉ោង៣និង១៥នាទី ពុំបណ្តាលអោយឆេះរាលដាល់ទៅដល់ទីតាំងឃ្លាំងស្តុកគ្រឿងសង្ហារឹម និងលំនៅឋាននៅក្បែរនោះឡើយ ។
តាមរបាយការណ៍បឋមបានអោយដឹងថា មូលហេតុកើតមានអគ្គីភ័យបណ្តាលមកពីឆ្លងចរន្តអគ្គិសនី ។ អគ្គីភ័យបានបំផ្លាញរោងប្រក់ស័ង្កសីទំហំ១៤ម៉ែត្រគុណនឹង១៥ម៉ែត្រ រួម នឹងសម្ភារៈ, គ្រឿងសង្ហារឹមព្រមទាំងឈើនៅក្នុងរោងជាងរងការខូចខាតទាំងស្រុង ។ ទោះបីជាយ៉ាងណា ពុំបណ្តាលអោយមនុស្សរងរបួសឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ