បណ្ដាប្រទេសអឺរ៉ុប ៖ ចំនួនអ្នកបាត់បង់ជីវិតដោយសារវីរុស COVID-19 នៅអឺរ៉ុប នាថ្ងៃទី១៥ ខែមីនា ឆ្នាំ២០២០ បានកើនលើសពី២.០០០នាក់ នាំឲ្យចំនួនអ្នកបាត់បង់ជីវិតសរុបលើពិភពលោកឡើងដល់ជាង៦.០០០នាក់ហើយ ខណៈប្រជាជនប្រទេសជាច្រើន រស់នៅបែបបង្ខាំងឲ្យនៅក្នុងផ្ទះកុំចេញក្រៅ ហើយព្រំដែនប្រទេសដែលបិទមានកាន់តែច្រើន។
ប្រឈមមុខនឹងការភ័យខ្លាចចំពោះការឆ្លងរាលដាលកាន់តែខ្លាំងថែមទៀត ធនាគារកណ្ដាលសំខាន់ៗនៃពិភពលោក ដូចជាធនាគារកណ្ដាលអាមេរិក ជប៉ុន អង់គ្លេស កាណាដានិងស្វ៊ីសជាដើម នាថ្ងៃទី១៥ ខែមីនា បានបញ្ចេញសកម្មភាព ដោយមានការសម្របសម្រួលគ្នា សំដៅបង្កើនការផ្គត់ផ្គង់លើបណ្ដាទីផ្សារហិរញ្ញវត្ថុជាសាច់ប្រាក់សុទ្ធ។
ប្រទេសដែលរងការប៉ះពាល់ខ្លាំងជាងគេបំផុតនៅអឺរ៉ុប គឺអ៊ីតាលី ដែលនាថ្ងៃទី១៥ ខែមីនា បើតាមអាជ្ញាធរសុខាភិបាលប្រទេសនោះថា ចំនួនអ្នកបាត់បង់ជីវិតដោយសារវីរុសនោះ មានខ្ពស់បំផុតដល់១.៨០៩នាក់ ពោលគឺមានអ្នកបាត់បង់ជីវិត៣៦៨នាក់ថែមទៀតរយៈពេល២៤ម៉ោងចុងក្រោយនេះ។ ចំនួនសរុបនៃអ្នកឆ្លងវីរុសនៅអ៊ីតាលី បានឡើងដល់២៤.៧៤៧នាក់ទល់នឹង២១.១៥៧នាក់នាថ្ងៃទី១៤មីនា។
ជាចំណុចចាប់ផ្ដើមនៃការចម្លង ចិននៅតែជាប្រទេសដែលមានចំនួនអ្នកបាត់បង់ជីវិតច្រើនជាងគេ៣.១៩៩នាក់ តែគឺអឺរ៉ុបដែលការឆ្លងមានការកើនយ៉ាងលឿនបំផុត ជាមួយអ្នកបាត់បង់ជីវិត ២.២៩១នាក់ ភាគច្រើននៅអ៊ីតាលី និងអេស្ប៉ាញ ដែលនៅទីនោះចំនួនអ្នកឆ្លងជំរឿនឃើញដល់ជាង២.០០០នាក់ថែមទៀត ក្នុងរយៈពេល២៤ម៉ោងចុងក្រោយនេះ។
បារាំងមានអ្នកបាត់បង់ជីវិតឡើង១២៧នាក់
តុល្យការនៃការឆ្លងវីរុស COVID-19ន ៅបារាំងមកដល់ថ្ងៃទី១៥មីនា ចំនួនអ្នកបាត់បង់ជីវិតបានឡើងដល់១២៧នាក់ និងអ្នកឆ្លងសរុបកើនដល់៥.៤២៣នាក់។ នេះជាការប្រកាសរបស់អាជ្ញាធរសុខាភិបាលបារាំង ដែលស្នើដល់ពលរដ្ឋបារាំង ឲ្យគោរពបណ្ដាវីធានការបង្ឋាំងមិនឲ្យចេញក្រៅផ្ទះ។
រដ្ឋមន្ត្រីសុខាភិបាលបារាំងលោកអូលីវីយេវេរ៉ានគូសបញ្ជាក់តាមទូរទស្សន៍ FRANCE 2ថា វីរុសហោះហើរលឿនបំផុតហើយគំរាមកំហែងដល់អាយុជីវិតមនុស្សម្នា។ ខ្ញុំសូមឲ្យពលរដ្ឋបារាំងគោរពបណ្ដាវិធានការរិតត្បិតសង្គម។
កាសែតបារាំងLE MONDEបានលើកពីការណែនាំរបស់បណ្ដាអ្នកស្រាវជ្រាវដល់វិមានប្រធានាធិបតីអេលីហ្សេ ពីសេណារីយ៉ូអាក្រក់បំផុត ដែលការឆ្លងរាលដាលនៃវីរុសនោះ អាចបណ្ដាលឲ្យមនុស្សបាត់បង់ជីវិតរហូតដល់៥០០.០០០នាក់នៅបារាំង។
គួររំលឹកថា ជំងឺគ្រុនផ្ដាសាយអេស្ប៉ាញដែលរាតត្បាតបារាំងកាលពីឆ្នាំ១៩១៨ទៅ១៩១៩បណ្ដាលឲ្យមនុស្សបាត់បង់ជីវិតដល់៤០៨.០០០នាក់។ ក្រុមប្រឹក្សាវិទ្យាសាស្ត្រដែលបង្កើតឡើងដោយវិមានអេលីហ្សេ ពុំបដិសេធឡើយនូវលទ្ធភាពបែបនោះ ដោយថា តើការឆ្លងរាលដាលនៃវីរុស COVID-19 អាចបណ្ដាលឲ្យមនុស្សបាត់បង់ជីវិតប្រហាក់ប្រហែលគ្នានោះដែរទេ?
អង់គ្លេសមានអ្នកបាត់បង់ជីវិត ឡើង៣៥នាក់
អាជ្ញាធរសុខាភិបាលអង់គ្លេស គូសបញ្ជាក់នាថ្ងៃទី១៥មីនាថា ចំនួនអ្នកបាត់បង់ជីវិតដោយសារវីរុសនៅអង់គ្លេសមាន១៤នាក់ទៀត រយៈពេល២៤ម៉ោងចុងក្រោយនេះ នាំឲ្យចំនួនអ្នកបាត់បង់ជីវិតសរុបក្នុងប្រទេសនោះឡើងដល់៣៥នាក់ រួចចំនួនអ្នកឆ្លងកើន២០%ឡើងដល់១.៣៧២នាក់។
រដ្ឋាភិបាលអង់គ្លេសថ្លៃងមុននេះថា នឹងបង្កើនបណ្ដាវិធានការ ដើម្បីឆ្លើយតបចំពោះវិបត្តិពិសេសដោយឲ្យបណ្ដាមនុស្សចាស់នៅដាច់ពីគេ នាប៉ុន្មានសប្ដាហ៍ខាងមុខនេះ និងដាក់ឲ្យនៅដាច់ពីគេរាល់មនុស្សដែលរកឃើញឆ្លងវីរុស៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ