រាជធានីភ្នំពេញ ៖ ឃ្លាំងស្តុកឈើ និងដំឡើងគ្រឿងសង្ហារិមផ្នែកខាងក្រោយរបស់ដេប៉ូ លក់គ្រឿងសង្ហារិមមួយកន្លែងត្រូវបានអគ្គីភ័យឆាបឆេះរងការខូចខាតអស់ទាំងស្រុង បង្កឲ្យមានការណ៍ភ្ញាក់ផ្អើលយ៉ាងខ្លាំងដល់ប្រជាពលរដ្ឋនិងរថយន្តពន្លត់អគ្គីភ័យចុះមកអន្តរាគមន៍បាញ់ពន្លត់កាលពីវេលាម៉ោង២និង១០នាទីរំលងអាធ្រាត្រឈានចូលថ្ងៃទី១៦ ខែមីនា ឆ្នាំ២០២០ ត្រង់ចំណុចដេប៉ូលក់គ្រឿងសង្ហារឹមមួយកន្លែង តាមបណ្តោយផ្លូវ៥៨P ស្ថិតក្នុងសង្កាត់គោកឃ្លាង ខណ្ឌសែនសុខ។
តាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា ដេប៉ូលក់គ្រឿងសង្ហារិមខាងលើមានម្ចាស់ឈ្មោះ សន ចាន់ផាណាវុធ ភេទប្រុស អាយុ៣២ឆ្នាំ ស្នាក់នៅសង្កាត់បឹងកក់ទី២ ខណ្ឌទួលគោក។
តាមប្រភពព័ត៌មានពីបុរសម្នាក់ដែលជាជាងដំឡើងគ្រឿងសង្ហារិមនៅក្នុងដេប៉ូកើតហេតុបានរៀបរាប់ប្រាប់ឲ្យដឹងថា ឃ្លាំងផ្នែកខាងក្រោយដែលត្រូវភ្លើងឆាបឆេះគឺជាកន្លែងស្តុកឈើសម្រាប់ដំឡើងគ្រឿងសង្ហារិម និងបន្ទប់ស្នាក់នៅរបស់ជាង។
តាមប្រភពដដែលបានបន្តថា នៅមុនពេលកើតហេតុ មានជាងចំនួន៣នាក់បានស្នាក់នៅក្នុងបន្ទប់នៃឃ្លាំងកើតហេតុខាងលើ ។ លុះមកដល់វេលាកើតហេតុ ខណៈពេលដែលពួកគាត់កំពុងតែដេកលង់លក់ ក៏ស្រាប់តែធុំក្លិនឈ្ងៀម និងមានផ្សែងហុយខ្មួលខ្មាញ់ពេញខាងក្នុងឃ្លាំង។ បន្ទាប់មក ពួកគាត់ក៏បានដាស់គ្នាងើបឡើងទៅលើ ស្រាប់តែឃើញភ្លើងកំពុងឆាបឆេះយ៉ាងសន្ធោសន្ធៅនៅផ្នែកខាងក្រោយចំហៀងខាងលិចនៃឃ្លាំងកើតហេតុ ។
តាមប្រភពដដែលបានបន្តទៀតថា ភ្លាមៗនោះពួកគាត់ក៏ប្រញាប់ប្រញាល់នាំគ្នារត់ចេញមកខាងក្រៅ និងស្រែកឆោឡោ បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចមូលដ្ឋានចុះមកធ្វើអន្តរាគមន៍ទាក់ទងហៅរថយន្តពន្លត់អគ្គីភ័យឱ្យអោយចុះមកជួយអន្តរាគមន៍បាញ់ទឹកពន្លត់ ដោយមានរថយន្តពន្លត់អគ្គិភ័យរបស់ការិយាល័យបង្ការនិងពន្លត់អគ្គិភ័យនៃអគ្គស្នងការនគរបាលរាជធានីភ្នំពេញបានចុះមកចំនួន១៩គ្រឿង និងបានប្រើប្រាស់ទឹកអស់ចំនួន២៤គ្រឿង, រថយន្តពន្លត់អគ្គីភ័យរបស់ក្រុមហ៊ុនស្រាបៀរចំនួន១គ្រឿង ប្រើប្រាស់ទឹកអស់ចំនួន១គ្រឿង ហើយភ្លើងបានរលត់ទៅវិញជាស្ថាពរនៅវេលាម៉ោង៣និង១៥នាទីថ្ងៃដដែល។
ហេតុការណ៍អគ្គីភ័យខាងលើនេះមិនបណ្ដាលឲ្យមនុស្សណាម្នាក់រងរបួស ឬឆេះរាលដាលដល់ផ្ទះអ្នកជិតខាងនោះទេ គឺឆេះតែរោងដែកប្រក់ស័ង្កសីមានទំហំ១៥ម៉ែត្រគុណនឹង១៤ម៉ែត្រ រួមជាមួយឈើ និងគ្រឿងសង្ហារឹមមួយចំនួនតូចដែលនៅខាងក្នុងត្រូវខូចខាតអស់ទាំងស្រុង។ ចំពោះមូលហេតុជំហានដំបូងសមត្ថកិច្ចបានសន្និដ្ឋានថាគឺបណ្ដាលមកពីឆ្លងចរន្តអគ្គិសនី៕ (កែសម្រួលដោយ ៖ ធីតា)
ចែករំលែកព័តមាននេះ