កីឡាករមកពីក្លិបប្រេស៊ីល Gremio បាននាំគ្នាពាក់ម៉ាស់ការពារក្នុងទីលានប្រកួតកាលពីថ្ងៃអាទិត្យ ដើម្បីបង្ហាញការមិនពេញចិត្តនឹងការប្រកួតបាល់ទាត់ ខណៈដែលមានការភ័យខ្លាចចំពោះវីរុស Covid-19 ដែលកំពុងរីករាលដាលនៅក្នុងតំបន់អាមេរិកខាងត្បូង។
ក្រុមកីឡាករទាំងអស់របស់ក្រុម Gremio បានដើរចូលទីលានប្រកួតដោយមានពាក់ម៉ាស់គ្រប់គ្នា មុនពេលការប្រកួតទល់នឹងក្រុម Sao Luiz ។ ក្នុងការប្រកួតពាន Gaucho State Championship ដែលធ្វើឡើងក្នុងកីឡដ្ឋាន Arena do Grêmio គឺគ្មានអ្នកគាំទ្រចូលរួមទស្សនាឡើយ។ ជាលទ្ធផលក្រុម Gremio បានយកឈ្នះលើក្រុម Sao Luiz ដោយលទ្ធផល ៣-២។
ក្រោយបញ្ចប់ការប្រកួតលោក Paulo Luz នាយកគ្រប់គ្រងបាល់ទាត់របស់ក្រុម Gremio បាននិយាយថា «ការធ្វើបែបនេះ គឺជាសារមួយរបស់ពួកយើង ហើយខ្ញុំសង្ឃឹមថាពួកគេនឹងស្តាប់។ យើងសង្ឃឹមថា មនសិការល្អនឹងកើតឡើង»។
សូមបញ្ជាក់ថា ការតវ៉ានេះបានកើតឡើងនៅពេលដែលកីឡាករ និងក្លិបនៅទូទាំងតំបន់អាមេរិកខាងត្បូង កំពុងចាប់ផ្តើមត្អូញត្អែរ និងមិនពេញចិត្តចំពោះការសម្រេចចិត្តរបស់អាជ្ញាធរបាល់ទាត់ប្រេស៊ីល ដែលបន្តឱ្យមានការប្រកួតបាល់ទាត់ប៉ុន្តែមិនមានអ្នកទស្សនា (Closed Doors) ខណៈប្រទេសជាច្រើនបានប្រកាសផ្អាករាល់សកម្មភាពបាល់ទាត់ទាំងអស់ ជាបណ្តោះអាសន្ន ៕
ចែករំលែកព័តមាននេះ