ខ្សែបម្រើ Paul Pogba របស់ក្រុមបិសាចក្រហម Manchester United បានបង្កើតកម្មវីធីរៃអង្គាសប្រាក់មួយ និងបានសន្យាគាំទ្រផ្នែកហិរញ្ញវត្ថុដល់អង្គការយូនីសេហ្វ (UNICEF) ដើម្បីជួយដល់កុមារដែលរងគ្រោះដោយសារការរីករាលដាលនៃវីរុស…
ខ្សែបម្រើ Paul Pogba របស់ក្រុមបិសាចក្រហម Manchester United បានបង្កើតកម្មវីធីរៃអង្គាសប្រាក់មួយ និងបានសន្យាគាំទ្រផ្នែកហិរញ្ញវត្ថុដល់អង្គការយូនីសេហ្វ (UNICEF) ដើម្បីជួយដល់កុមារដែលរងគ្រោះដោយសារការរីករាលដាលនៃវីរុស Covid-19 ។
កម្មវិធីរៃអង្គាសប្រាក់នេះ ត្រូវបានបង្កើតឡើងចំថ្ងៃខួបកំណើត២៧ឆ្នាំរបស់ខ្សែបម្រើបារាំងរូបនេះ កាលពីម្សិលមិញក្នុងន័យរួមចំណែកជួយប្រយុទ្ធប្រឆាំង នឹងវីរុសដ៏កាចសាហាវ Covid-19 ។
កីឡាករអន្តរជាតិបារាំងរូបនេះនិយាយថា រូបគេនឹងបន្ថែមមូលនិធិទ្វេដងប្រសិនបើគោលដៅក្នុងកម្មវិធីរបស់គេអាចរៃអង្គាសប្រាក់បាន ២៧.០០០ផោន។
Pogba បានសរសេរថា «ផលប៉ះពាល់នៃការផ្ទុះទ្រង់ទ្រាយធំនៃរីរុសនេះ ជាពិសេសលើកុមារក្រីក្រ និងងាយរងគ្រោះអាចមានទំហំធំធេង» ។
«វាជាថ្ងៃខួបកំណើតរបស់ខ្ញុំ ហើយខ្ញុំតែងតែមានអំណរគុណដែលខ្ញុំ គ្រួសារនិងមិត្តភក្តិមានសុខភាពល្អ។ ទោះជាយ៉ាងណាក៏ដោយ មិនមែនគ្រប់គ្នាសុទ្ធតែមានសុខភាពល្អទេឥឡូវនេះ។ ខណៈដូចពេលនេះ យើងត្រូវតែរួបរួមគ្នា» កីឡាកររូបនេះបានបន្ថែម។
ថវិកាទាំងនេះនឹងត្រូវប្រើប្រាស់ដើម្បីផ្តល់ស្រោមដៃ ម៉ាស់ការពារ និងវ៉ែនតាការពារសម្រាប់បុគ្គលិកសុខាភិបាល។
នេះមិនមែនជាលើកទី១ទេ សម្រាប់កីឡាកររូបនេះ ជាក់ស្តែងកាលពីថ្ងៃខួបកំណើត២៦ឆ្នាំរបស់គេ Pogba ក៏បានរៃអង្គាសប្រាក់បានចំនួន ៧.៣៦០ផោនសម្រាប់អង្គការទឹកស្អាតផងដែរ។
សូមបញ្ជាក់ថាកីឡាករ Paul Pogba បច្ចុប្បន្នកំពុងតែសម្រាកពន្យារបាលរបួសកជើង ស្របពេលដែលលីគកំពូលអង់គ្លេស Premier League ត្រូវបានផ្អាករហូតដល់ថ្ងៃទី៤ ខែមេសា ដោយសារតែរងផលប៉ះពាល់នៃវីរុស Covid-19 ៕ (ដកស្រង់ចេញ៖ BBC)
ចែករំលែកព័តមាននេះ