រាជធានីភ្នំពេញ ៖ ទីតាំងហ្គេមបាញ់ត្រី និងជួញដូរ ប្រើប្រាស់គ្រឿងញៀនដុះស្លែងចំនួន២កន្លែង ត្រូវបានអ្នកភូមិនិគមជនជាតិវៀតណាម ផ្ទុះហិង្សានាំគ្នាវាយកម្ទេចចោល ដោយសារតែទីតាំងនោះបង្កើតអោយមានល្បែងស៊ីសង នាំឱ្យកើតមានអំពើលួចឆក់ប្លន់នៅក្នុងភូមិ ហើយអាជ្ញាធរ…
រាជធានីភ្នំពេញ ៖ ទីតាំងហ្គេមបាញ់ត្រី និងជួញដូរ ប្រើប្រាស់គ្រឿងញៀនដុះស្លែងចំនួន២កន្លែង ត្រូវបានអ្នកភូមិនិគមជនជាតិវៀតណាម ផ្ទុះហិង្សានាំគ្នាវាយកម្ទេចចោល ដោយសារតែទីតាំងនោះបង្កើតអោយមានល្បែងស៊ីសង នាំឱ្យកើតមានអំពើលួចឆក់ប្លន់នៅក្នុងភូមិ ហើយអាជ្ញាធរ និងសមត្ថកិច្ចខណ្ឌឬស្សីកែវ មិនបង្ក្រាប។
ហេតុការណ៍ផ្ទុះហិង្សាខាងលើនេះបានកើតឡើងកាលពីវេលាម៉ោងប្រមាណ១១យប់ថ្ងៃទី១៣ ខែមីនា ឆ្នាំ២០២០ នៅចំណុចផ្ទះបើកហ្គេមបាញ់ត្រី ស្ថិតក្នុងភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ ហើយនៅព្រឹកថ្ងៃទី១៥ ខែមិនា អ្នកភូមិប្រមាណជាង១០០នាក់ក៏បានបន្តនាំគ្នាផ្តិតមេដៃប្តឹងផងដែរ។
ការផ្ទុះហិង្សារខាងលើនេះត្រូវបានគេដឹងថា បន្ទាប់ពីមានជនសង្ស័យចំនួន៦នាក់ប្រដាប់ដោយដាវ បានចេញពីទីតាំងហ្គេមបាញ់ត្រី ហើយធ្វើសកម្មភាពកាប់ប្លន់យកទូរស័ព្ទពីក្មេងនៅក្នុងភូមិយកអស់ទូរស័ព្ទចំនួន២គ្រឿង ។
តាមប្រភពព័ត៌មានបានឱ្យដឹងថា ទូហ្គេមបាញ់ត្រីចំនួន៤គ្រឿង ស្ថិតនៅ២ទីតាំងក្បែរគ្នា ត្រូវអ្នកភូមិជាជនជាតិវៀតណាម នាំគ្នាវាយកម្ទេចទ្វារផ្ទះ ហើយចូលទៅវាយកម្ទេចទូហ្គេមនិងអូសយកចេញមកក្រៅផ្ទះ។
តាមប្រភពពីប្រជាពលរដ្ឋបានអោយដឹងថា ទីតាំងហ្គេមបាញ់ត្រីខាងលើនេះមានម្ចាស់ឈ្មោះប៊ិន ដែលបានបើកលេងដុះស្លែមកហើយ ពុំត្រូវបានសមត្ថកិច្ចខណ្ឌឬស្សីកែវចុះបង្ក្រាបឡើយ ។ មិនត្រឹមតែបើកល្បែងស៊ីសងនោះទេ ទីតាំងនេះក៏ជាកន្លែងជួញដូរនិងប្រើប្រាស់គ្រឿងផងដែរ ជាហេតុបង្កើតអោយមានចោរលួចឆក់ប្លន់ជាបន្តបន្ទាប់។
តាមប្រភពពីប្រជាពលរដ្ឋបានអោយបន្តថា នៅវេលាម៉ោងប្រមាណ១០យប់ថ្ងៃទី១៣ ខែមីនា ជនសង្ស័យមួយក្រុមមានគ្នា៦នាក់បានមកលេងហ្គេមបាញ់ត្រីចាញ់អស់ ហើយចេញទៅវិញ ក៏បានធ្វើសកម្មភាពកាប់ប្លន់យកទូរស័ព្ទពីក្មេងក្នុងភូមិយកអស់២គ្រឿង និងបានកាប់ម៉ូតូខ្ទេច២គ្រឿង បន្ទាប់ពីប្លន់មិនបានសម្រេច ។ បន្ទាប់ពីមានអំពើប្លន់បែបនេះ ទើបអ្នកភូមិក៏ផ្ទុះហិង្សានាំគ្នាបោះបោក និងវាយកញ្ចក់ផ្ទះបើកហ្គេម និងវាយកម្ទេចទូរហ្គេមអូសចេញមកក្រៅតែម្តង ។
តាមអ្នកភូមិក៏បានអោយដឹងទៀតថា ការនាំគ្នាវាយម្ទេចទូហ្គេមនេះ គឺដោយសាតែខឹងទីតាំងនេះបង្កើតអោយមានល្បែងស៊ីសង និងជួញដូរប្រើប្រាស់គ្រឿងញៀន ជាដើមចមនាំអោយកើតមានអំពើលួចប្លន់ជាបន្តបន្ទាប់ ដែលកន្លងមកមានករណីលួច ប្លន់ ប្រមាណ៦ទៅ៧លើកមកហើយ ។ ម្យ៉ាងទៀតបើមិននាំគ្នា ធ្វើបែបនោះ មិនអាចបញ្ឈប់ល្បែងស៊ីសងដុះស្លែនេះបាននោះទេ ព្រោះកន្លងមកពួកគាត់រាយការណ៍ប្រាប់អាជ្ញាធរនិងសមត្ថកិច្ចជាច្រើនលើកមកហើយ ពុំមានសមត្ថកិច្ចណាចុះបង្ក្រាបឡើយ។
តាមប្រភពពីជនរងគ្រោះដែលត្រូវក្រុមចោរវាយប្លន់ ឈ្មោះង្វៀង យ៉ាំងទឹង ភេទប្រុស អាយុ១៧ឆ្នាំ បានអោយដឹងថា នៅយប់ថ្ងៃកើតហេតុ គាត់ និងអ្នកភូមិចំនួន៣នាក់ទៀតកំពុងតែអង្គុយលេងទូរស័ព្ទនៅផ្ទះលក់កាហ្វេក្នុងភូមិ ស្រាប់តែមានជនសង្ស័យចំនួន៦នាក់ចេញផ្ទះហ្គេមបាញ់ត្រី ទំនងជាបាញ់ល្បែងអស់ ក៏បានធ្វើសកម្មភាពគំរាមកាប់ប្លន់យកទូរស័ព្ទអាយហ្វូនអស់២គ្រឿង ហើយប្រុងទាញយកម៉ូតូ២គ្រឿងទៀត តែដោយសារជាប់សោ ទើបក្រុមជនសង្ស័យយកមិនបាន ក៏កាប់កម្ទេចម៉ូតូចោល ។ ផ្ទះហ្គេមខាងលើនោះសុទ្ធតែបំពាក់កាមេរ៉ាសុវត្ថិភាពផងដែរ។
ប្រជាពលរដ្ឋក៏បានសំណូមពរដល់លោកជា ពិសី អភិបាលខណ្ឌឬស្សីកែវ ក៏ដូចជាលោកអធិការខណ្ឌមេត្តា បំបិទល្បែងស៊ីសងនេះផង ដើម្បីភូមិសង្កាត់មានសុវត្ថិភាព ៕ (កែសម្រួលដោយ ៖ ធីតា)
ចែករំលែកព័តមាននេះ