ខេត្តប៉ៃលិន ៖ បើតាមសេចក្តីរាយការណ៍បឋមបានឱ្យដឹងថា មានករណីភ្លើងឆេះផ្ទះរបស់ពលរដ្ឋ១គ្រួសារ ខណៈម្ចាស់អត់នៅផ្ទះ ព្រោះតែជាប់រវល់ចូលរួមកម្មវិធីសម្ពោធសាលាបឋមសិក្សាវាលចែងធំ ដោយបានចាក់សោទុកចោល ស្រាប់តែត្រូវអគ្គិភ័យលេបត្របាក់អស់ទាំងស្រុងតែម្តង ដែលសង្ស័យថាមានគេលួតដុត ខណៈបន្សល់ទុកម៉ូតូ១គ្រឿងក្បែរកន្លែងកើតហេតុ…
ខេត្តប៉ៃលិន ៖ បើតាមសេចក្តីរាយការណ៍បឋមបានឱ្យដឹងថា មានករណីភ្លើងឆេះផ្ទះរបស់ពលរដ្ឋ១គ្រួសារ ខណៈម្ចាស់អត់នៅផ្ទះ ព្រោះតែជាប់រវល់ចូលរួមកម្មវិធីសម្ពោធសាលាបឋមសិក្សាវាលចែងធំ ដោយបានចាក់សោទុកចោល ស្រាប់តែត្រូវអគ្គិភ័យលេបត្របាក់អស់ទាំងស្រុងតែម្តង ដែលសង្ស័យថាមានគេលួតដុត ខណៈបន្សល់ទុកម៉ូតូ១គ្រឿងក្បែរកន្លែងកើតហេតុ បង្កឱ្យមានការភ្ញាក់ផ្អើលកាលពីម៉ោង១០និង០០នាទីព្រឹក ថ្ងៃទី១៣ ខែមីនា ឆ្នាំ២០២០ នៅចំណុចវាលចែង ស្ថិតក្នុងភូមិអូរចិតប្រាំ ឃុំអូរអណ្ដូង ស្រុកសាលាក្រៅ ។
សេចក្តីរាយការណ៍បន្តថា ម្ចាស់ផ្ទះមានឈ្មោះ ណែន សៅ ភេទប្រុស អាយុ៥៧ឆ្នាំ មុខរបរធ្វើចំការ និងមានប្រពន្ធឈ្មោះ សឿម សុដា អាយុ៤៤ឆ្នាំ មានទីលំនៅក្នុងភូមិខាងលើ ។
ប្រភពព័ត៌មានបានឱ្យដឹងថា នៅមុនពេលកើតហេតុ ម្ចាស់អត់នៅផ្ទះនោះទេ ដោយចេញទៅក្រៅក្នុងកម្មវិធី ហើយក៏ចាក់សោទុកចោល លុះក្រោយមកស្រាប់តែមានអ្នកភូមិនៅក្បែរនោះឃើញមានអណ្តាតភ្លើង និងផ្សែងហុយចេញពីក្នុងផ្ទះជនរងគ្រោះ ក៏ប្រញាប់រត់ទៅប្តឹងលោកមេភូមិឱ្យជួយអន្តរាគមន៍នាំគ្នាពន្លត់ ប៉ុន្តែលុះទៅដល់ ផ្ទះត្រូវភ្លើងឆេះអស់ទាំងស្រុងបាត់ទៅហើយ ។
ប្រភពដដែលបន្តថា ពាក់ព័ន្ធករណីខាងលើនេះ គេមានការសង្ស័យថា មានអ្នកលួចដុត ព្រោះឃើញមានម៉ូតូ១គ្រឿងចតចោលនៅជិតផ្ទះនោះ ដែលមិនមែនជារបស់ម្ចាស់ផ្ទះនោះទេ ហើយក៏អត់ឃើញម្ចាស់ដែរ ។
ប្រភពដដែលបន្តទៀតថា សម្ភារៈដែលត្រូវបាត់បង់ទាំងស្រុង រួមមាន សៀវភៅគ្រួសារ សំបុត្រកំណើត អត្តសញ្ញណប័ណ្ណ ឆ្នាំង ចាន មុង ភួយ សម្លៀកបំពាក់ ហើយផ្ទះដែលឆេះនោះមានទទឹង៥ម៉ែត្រ បណ្តោយ៧ម៉ែត្រ ដំបូលប្រក់ស័ង្កសី សសរធ្វើពីឈើ និងថវិកាចំនួន៥០០០០០រៀលផងដែរ ។
ក្រោយមកលោក សេង តូ មេភូមិអូចិតប្រាំ បានទូរស័ព្ទហៅសមត្ថកិច្ចនគរបាលប៉ុស្ថិ៍ឃុំអូរអណ្ដូង ចុះទៅធ្វើការត្រួតពិនិត្យកន្លែងកើតហេតុ រួចយកម៉ូតូ១គ្រឿងដែលចតចោលជិះផ្ទះកើតហេតុ យកទៅរក្សាទុក ដើម្បីសួររកម្ចាស់ ៕ (កែសម្រួលដោយ ៖ បុប្ផា)
ចែករំលែកព័តមាននេះ