វៀតណាម ៖ ប្រទេសវៀតណាមកំពុងព្យួរទិដ្ឋាការទេសចរណ៍សម្រាប់អ្នកដំណើរដែលបានស្ថិតនៅចក្រភពអង់គ្លេស និងប្រទេសចំនួន២៦នៃតំបន់ Schengen អឺរ៉ុប រយៈពេល១៤ថ្ងៃមុនការមកដល់របស់ពួកគេ ដែលគ្រោងនឹងចាប់ផ្តើមនៅថ្ងៃអាទិត្យ នៅពេលថ្ងៃត្រង់ ដោយសារតែការឆ្លងវីរុសកូវីដ១៩។…
វៀតណាម ៖ ប្រទេសវៀតណាមកំពុងព្យួរទិដ្ឋាការទេសចរណ៍សម្រាប់អ្នកដំណើរដែលបានស្ថិតនៅចក្រភពអង់គ្លេស និងប្រទេសចំនួន២៦នៃតំបន់ Schengen អឺរ៉ុប រយៈពេល១៤ថ្ងៃមុនការមកដល់របស់ពួកគេ ដែលគ្រោងនឹងចាប់ផ្តើមនៅថ្ងៃអាទិត្យ នៅពេលថ្ងៃត្រង់ ដោយសារតែការឆ្លងវីរុសកូវីដ១៩។
យោងតាមសេចក្តីថ្លែងការណ៍មួយដែលត្រូវបានផ្សព្វផ្សាយនៅលើគេហទំព័ររបស់ក្រសួងការបរទេសកាលពីថ្ងៃសៅរ៍ បានឱ្យដឹងថា ការហាមឃាត់នេះក៏រួមបញ្ចូលទាំងអ្នកដែលមកពីតំបន់ទាំងនេះផងដែរ។ វាមិនបានបញ្ជាក់លម្អិតទេ។
រដ្ឋាភិបាលក៏កំពុងព្យួរការចេញទិដ្ឋាការដល់អ្នកធ្វើដំណើរមកពីប្រទេសទាំងអស់។ សេចក្តីថ្លែងការណ៍បាននិយាយថា អ្នកការទូត និងអ្នកធ្វើជំនួញត្រូវបានគេដកចេញពីការហាមឃាត់ការធ្វើដំណើរ ដែលនឹងមានរយៈពេល៣០ថ្ងៃ ប៉ុន្តែត្រូវប្រឈមនឹងការត្រួតពិនិត្យសុខភាព និងការដាក់ឱ្យនៅដាច់ពីគ្នា។
សេចក្តីសម្រេចនេះធ្វើឡើង បន្ទាប់ពីប្រទេសវៀតណាមបានព្យួរការលើកលែងទិដ្ឋាការសម្រាប់ប្រទេសចំនួន៩ នៅអឺរ៉ុប។ តំបន់ Schengen មានប្រទេសចំនួន ២៦ នៅអឺរ៉ុប ដែលអនុញ្ញាតឱ្យធ្វើដំណើរដោយមិនចាំបាច់មានក្រដាសឆ្លងកាត់តំបន់ភាគច្រើន។
ក្រុមហ៊ុនអាកាសចរណ៍វៀតណាមអ៊ែរឡាញ បានប្រកាសនៅលើគេហទំព័ររបស់ខ្លួនថា ខ្លួននឹងមិនដឹកអ្នកដំណើរតាមជើងហោះហើរត្រឡប់មកប្រទេសវៀតណាមពីទីក្រុងឡុងដ៍ ប៉ារីស និង ហ្វ្រែងហ្វើត ចាប់ផ្តើមនៅថ្ងៃអាទិត្យនេះ។ ជើងហោះហើរដែលគ្រោងនឹងចាកចេញពីទីក្រុងទាំងនោះនៅថ្ងៃសៅរ៍ នឹងចុះចតនៅអាកាសយានដ្ឋានវ៉ានដុន និងខាន់ថូ ដែលអ្នកដំណើរនឹងត្រូវទុកឱ្យនៅដាច់ដោយឡែក។
ក្រសួងសុខាភិបាលវៀតណាមបានឱ្យដឹងថា ប្រទេសវៀតណាមបានបញ្ជាក់ពីករណីកូវីដ១៩ថ្មីចំនួន៦ករណី។ កាលពីថ្ងៃសៅរ៍ ដោយបានកើនឡើងដល់ ៥៣នាក់ ដែលក្នុងនោះមានអ្នកជំងឺចំនួន ១៦នាក់ ដែលបានជាសះស្បើយ៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ