អាជ្ញាធរមូលដ្ឋានបាននិយាយថា មន្ត្រី២រូបនៅក្នុងទីក្រុងវ៉ូហាន នៃប្រទេសចិន ត្រូវបានបណ្តេញចេញ ហើយម្នាក់ទៀតកំពុងស្ថិតក្រោមការស៊ើបអង្កេត បន្ទាប់ពីមន្ត្រីទាំងនោះបានប្រើប្រាស់ឡានដឹកសំរាម ដើម្បីដឹកសាច់ជ្រូកសម្រាប់ផ្តល់ជូនប្រជាជននៅទីនោះ។
អ្នកស្រុកនៅសហគមន៍យន់លីននៃស្រុកឈីងសាន មានការខឹងសម្បារយ៉ាងខ្លាំង នៅពេលសាច់ជ្រូកដែលពួកគេបានទិញពីហាងរបស់រដ្ឋាភិបាល បានមកដល់ក្នុងរថយន្តកាលពីថ្ងៃពុធ។
យោងតាមអ្នកស្រុកដែលត្អូញត្អែរអំពីបញ្ហានេះ នៅលើបណ្តាញសង្គម Weibo បានឱ្យដឹងថា សាច់ដែលដាក់ក្នុងថង់ប្លាស្ទិចដែលមានចំនួន ១០០០ថង់ត្រូវបានគេយកទៅដាក់លើដីបន្ទាប់មកប្រគល់អោយអតិថិជន។
សូមបញ្ជាក់ថា ការផ្គត់ផ្គង់ស្បៀងអាហារ ត្រូវបានគ្រប់គ្រងភាគច្រើនដោយរដ្ឋាភិបាល ចាប់តាំងពីទីក្រុងវ៉ូហានផ្ទុះឡើងនៃវីរុស Covid-19 ។
អាជ្ញាធរក៏បានបញ្ជាក់កាលពីថ្ងៃពុធថា មន្ត្រីជាន់ខ្ពស់ពីររូបមកពីរដ្ឋាភិបាលរងនៅស្រុកឈីងសាន ត្រូវបានបណ្តេញចេញពីតំណែង ហើយសាច់ជ្រូកចំនួន៥៣០ថង់ដែលត្រូវបានចែកចាយនៅថ្ងៃនោះ ត្រូវប្រមូលត្រឡប់មកវិញ ព្រមទាំងឱ្យមន្ត្រីដែលប្រព្រឹត្តិខុសនោះ ធ្វើការសុំទោសទៅកាន់អតិថិជន ៕ (ដកស្រង់ចេញពី៖ scmp)
ចែករំលែកព័តមាននេះ