បើអ្នកចូលចិត្តអានសៀវភៅស្តីពីការប្រកបអាជីវកម្ម អ្នកប្រហែលជាបានអានពីការជោគជ័យរបស់មនុស្សជាច្រើនរហូតធ្វើឲ្យអ្នកគិតថាអាជីវករជាប្រៀបបានជាមនុស្សដ៏អស្ចារ្យខុសពីមនុស្សទូទៅ ។ ប៉ុន្តែការពិតជាក់ស្តែង អាជីវករ គឺមុនខុសគ្នាប៉ុន្មានពីមនុស្សធម្មតាទេ ហើយការជឿជាក់លើពាក្យចចាមអារ៉ាមដែលមិនពិតទាំងនោះអាចធ្វើឲ្យអ្នកកាន់តែខិតឆ្ងាយពីគោលដៅរបស់អ្នក ។ខាងក្រោម គឺជាពាក្យចចាមអារ៉ាមដែលអ្នកមិនគួរជឿដាច់ខាត៖
១. អាជីវករតែងតែមានគោលដៅច្បាស់លាស់សម្រាប់ថ្ងៃអនាគត
ជាក់ស្តែង មនុស្សត្រូវតែមានគោលដៅច្បាស់លាស់ជាមុនសិនទើបអាចលះបង់នូវអ្វីៗគ្រប់បែបយ៉ាងដើម្បីសម្រេចក្តីសុបិនរបស់ខ្លួនបាន ។ ប៉ុន្តែពួកគេមិនមានសមត្ថភាពពិសេសអ្វីដែលជួយឲ្យពួកគេមើលឃើញដល់ថ្ងៃអនាគតឡើយ ។ ជាទូទៅ មនុស្សតែងតែមានចក្ខុវិស័យដែលខ្លួនចង់បាន តែវាអាចផ្លាស់ប្តូរទៅតាមទីផ្សារផងដែរ ។ ដូច្នេះបើអ្នកចង់ចាប់ផ្តើមអាជីវកម្មតែគិតថាខ្លួនគ្មានសមត្ថភាពព្រោះខ្លួនមិនមានគោលដៅច្បាស់លាស់នោះ អ្នកអាចពិចារណាលើវាសាជាថ្មីសិន ។
២. អាជីវករធ្វើការតែម្នាក់ឯង
អាជីវករជាច្រើនរូបខិតខំតែម្នាក់ឯងរហូតដល់ពួកគេអាចសម្រេចបានក្តីសុបិនខ្លួន ប៉ុន្តែការមានដៃគូសហការក៏សំខាន់ដែរ ។ អាជីវករខ្លះត្រូវការដៃគូម្នាក់ទៀតដែលចាំគាំទ្រ និងបំពេញនូវចំណុចខ្វះខាតរបស់ខ្លួន ហើយការធ្វើដូច្នេះក៏បានជួយបង្កើនភាគរយនៃការជោគជ័យរបស់ពួកគេដែរ ។
៣. អាជីវករត្រូវតែដើរតាមទីផ្សារ
ការតាមដាន និងផ្គត់ផ្គង់តាមតម្រូវការដែលមានលើទីផ្សារជាមូលដ្ឋាននៃការចាប់ផ្តើមអាជីវកម្មមួយ តែពេលខ្លះមនុស្សក៏អាចជោគជ័យបាននៅពេលដែលពួកគេបង្កើតអ្វីដែលថ្មីដែរ ។ ជាក់ស្តែង អ្នកមិនចាំបាច់គិតឃើញអ្វីដែលថ្មីទាំងស្រុងដូចជា iPhone ឬ iPad ទេ តែអ្នកអាចយកផលិតផល ឬសេវាកម្មដែលមានស្រាប់ និងធ្វើឲ្យពួកគេល្អប្រសើរឡើងជាដើម ៕ កែសម្រួលដោយ ៖សុឃាក់
ចែករំលែកព័តមាននេះ