ភរិយានាយករដ្ឋមន្ត្រីកាណាដា ធ្វើតេស្តរកឃើញលទ្ធផលវិជ្ជមាន
ប្រទេសកាណាដា ៖ លោកស្រី SOPHIE GREGOIRE TRUDEAU ភរិយារបស់នាយករដ្ឋមន្ត្រីកាណាដា លោក JUSTIN TRUDEAU…
ប្រទេសកាណាដា ៖ លោកស្រី SOPHIE GREGOIRE TRUDEAU ភរិយារបស់នាយករដ្ឋមន្ត្រីកាណាដា លោក JUSTIN TRUDEAU ត្រូវបានធ្វើតេស្តកាលពីថ្ងៃទី១២មីនា ឃើញលទ្ធផលវិជ្ជមាននៃវីរុសCOVID-19 ហើយលោកស្រីនឹងដាក់ឲ្យនៅដាច់ពីគេ សម្រាប់រយៈពេលមួយមិនកំណត់ ចំណែកប្រមុខរដ្ឋាភិបាលក៏នឹងនៅដាច់ពីគេរយៈពេល២សប្ដាហ៍ដែរ។
ដោយបញ្ជាក់ថាភរិយានាយករដ្ឋមន្ត្រី មានស្ថានភាពសុខភាពល្អនិងមានរោគសញ្ញាតិចតួច ខុន្ទកាល័យលោកTRUDEAUប្រកាសថា នាយករដ្ឋមន្ត្រីមានសុខភាពល្អ ហើយពុំមានលេចរោគសញ្ញាណាមួយឡើយ។ ក៏ប៉ុន្តែជាវិធានការប្រុងប្រយ័ត្ននិងតាមការណែនាំរបស់បណ្ដាគ្រូពេទ្យ លោកនឹងស្ថិតនៅដាច់ពីគេក្នុងរយៈពេលគ្រោងទុក១៤ថ្ងៃ។
លោកTRUDEAUអាយុ៤៨ឆ្នាំនឹងមិនរងការធ្វើតេស្តឡើយក្នុងដំណាក់កាលនេះ ហើយនឹងបន្តកាន់កាប់តំណែងពេញលញរបស់លោក។ នាយករដ្ឋមន្ត្រីបានសម្រេចធ្វើការងារនៅផ្ទះ ក្នុងអំឡុងពេលដែលភរិយាលោកធ្វើតេស្តរកវីរុស។
លោកស្រីSOPHIE GREGOIRE TRUDEAUមានរោគសញ្ញាគ្រុនផ្ដាសាយ ចាប់តាំងពីលោកស្រីវិលត្រឡប់មកពីទីក្រុងឡុងដ៏វិញមក៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ