តារាចម្រៀង រីហាន់ណា (Rihanna) ត្រូវបានចាត់ទុកថាជាតារាចម្រៀងស្រីដែលមានទ្រព្យសម្បត្តិច្រើនជាងគេលើលោកកាលពីឆ្នាំ ២០១៩ ។ តារាចម្រៀងអាយុ ៣២ឆ្នាំនេះមានទ្រព្យសម្បត្តិសរុបប្រមាណ ៦០០លានដុល្លារឯណោះ តែភាគច្រើន គឺមិនមែនមកពីមុខរបរជាអ្នកចម្រៀងទេ ។
ទ្រព្យសម្បត្តិមួយផ្នែកធំរបស់តារាខាងលើ គឺមកពីអាជីវកម្ម និងការចាប់ដៃគូជាមួយនឹងក្រុមហ៊ុនធំៗដូចជា LVMH ដើម្បីចាប់ផ្តើម Fenty Beauty ដែលជាប្រេនគ្រឿងសម្អាងផ្ទាល់ខ្លួន និង Fenty ដែលជាប្រេនសម្លៀកបំពាក់ជាដើម ។ លើសពីនេះទៅទៀត តារាចម្រៀងនេះក៏ជាម្ចាស់កម្មសិទ្ធិ Savage X Fenty ជាមួយនឹង TechStyle Fashion Group ដែរ ។ ខាងក្រោមនេះ គឺជាគោលការណ៍សំខាន់ៗដែលជួយឲ្យនាងជោគជ័យនាពេលបច្ចុប្បន្ន៖
១. ការលក់ផលិតផលឲ្យមនុស្សគ្រប់គ្នា
អាជីវកម្មជាច្រើនផ្តោតការផ្សព្វផ្សាយរបស់ពួកគេលើក្រុមមនុស្សតូចមួយដើម្បីលក់ផលិតផលឬសេវាកម្មដែលខ្លួនមាន ។ ប៉ុន្តែនាង រីហាន់ណា មិនខ្វល់ពីចំណុចនេះទេ និងផ្តោតសំខាន់លើផលិតផលដែលមនុស្សគ្រប់គ្នាត្រូវការនិងអាចប្រើប្រាស់បាន ។ គ្រឿងសម្អាងរបស់នាងអាចត្រូវបានប្រើដោយមនុស្សគ្រប់គ្នាជុំវិញពិភពលោកមិនថាពណ៌សម្បុរអ្វី ហើយសម្លៀកបំពាក់របស់នាងក៏ត្រូវបានផលិតឡើងសម្រាប់ស្ត្រីគ្រប់ទំហំផងដែរ ។
២. បង្កើនគុណភាពឲ្យខ្ពស់ជាងស្តង់ដារ
ក្នុងនាមជាអាជីវករ អ្នកមានតួនាទីក្នុងការបង្កើតផលិតផលថ្មីៗដែលអាចដោះស្រាយបញ្ហារបស់មនុស្សបាន ប៉ុន្តែអ្នកមិនចាំបាច់ផ្តល់នូវអ្វីដែលមានលើទីផ្សារស្រាប់ទេ ។ ផ្ទុយមកវិញ ផ្តល់នូវអ្វីដែលល្អហួសពីស្តង់ដាររបស់អតិថិជនដើម្បីឈានមុខដៃគូប្រកួតប្រជែងដទៃវិញ ។
៣. ភាពលម្អិតមានសារៈសំខាន់ណាស់
ពេលដែលធនធានមានកម្រិត អាជីវករភាគច្រើនមើលរំលងរឿងលម្អិតតូចៗ និងផ្តោតធនធាន និងកម្លាំងលើចំណុចសំខាន់ៗវិញ ។ ប៉ុន្តែកញ្ញារីអាន់ណាមិនដែលចោលចំណុចតូចៗទេទោះជាកញ្ញាមិនមានធនធានគ្រប់គ្រាប់ពិតមែនក្តី ៕ កែសម្រួលដោយ ៖ សុឃាក់
ចែករំលែកព័តមាននេះ