រាជធានីភ្នំពេញ៖ ដើម្បីអនុវត្តតាមយុទ្ធសាស្ត្រកៀងគរចំណូលឆ្នាំ ២០១៩-២០២៣ ជាពិ សេសការធ្វើទំនើបកម្មរដ្ឋបាលសារពើពន្ធ ក្រសួងសេដ្ឋកិច្ច និងហិរញ្ញវត្ថុបានរៀបចំនូវ ប្រព័ន្ធគ្រប់គ្រងការដាក់លិខិតប្រកាសពន្ធតាមអនឡាញ ឬហៅថា E-Filling…
រាជធានីភ្នំពេញ៖ ដើម្បីអនុវត្តតាមយុទ្ធសាស្ត្រកៀងគរចំណូលឆ្នាំ ២០១៩-២០២៣ ជាពិ សេសការធ្វើទំនើបកម្មរដ្ឋបាលសារពើពន្ធ ក្រសួងសេដ្ឋកិច្ច និងហិរញ្ញវត្ថុបានរៀបចំនូវ ប្រព័ន្ធគ្រប់គ្រងការដាក់លិខិតប្រកាសពន្ធតាមអនឡាញ ឬហៅថា E-Filling និងទម្រង់ លិខិត ប្រកាសពន្ធប្រចាំខែថ្មី ដើម្បីសម្រួលដល់ការដាក់លិខិតប្រកាស និងបង់ប្រាក់ពន្ធ មានប្រសិទ្ធភាព ។
យោងតាមប្រសាសន៍លោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ អគ្គនាយកដ្ឋានពន្ធដារបានឱ្យដឹងថា ការដាក់ និងទទួលលិខិតប្រកាសពន្ធតាមឡាញ នឹង ត្រូវអនុវត្តចាប់ពីខែមិថុនា ឆ្នាំ ២០២០នេះតទៅ ដោយក្នុងនោះសម្រាប់អ្នកជាប់ពន្ធមធ្យម និងធំ ត្រូវដាក់លិខិតប្រកាសដោយប្រើប្រាស់ប្រព័ន្ធគ្រប់គ្រងការដាក់លិខិតប្រកាសតាម អនឡាញយ៉ាងយឺតបំផុតត្រឹមថ្ងៃទី ២៥ នៃខែបន្ទាប់ពីខែដែលប្រតិបត្តិការទាក់ទិននឹង ពន្ធអាករទាំងនោះបានកើតឡើង ដោយរួចផុតពីពន្ធបន្ថែម ១០ភាគរយ ។លោកបន្តថា៖ «សម្រាប់អ្នកជាប់ពន្ធធំ គឺត្រូវតែអនុវត្តន៍តាមប្រកាសអនឡាញ តែបើសិន ជាពួកគាត់មិនទាន់រួចរាល់ក្នុងការធ្វើវានោះទេ ពួកគាត់អាចដាក់សំណើរមកកាន់អគ្គនា យកដ្ឋានពន្ធដាររយៈពេលណាសមស្របណាមួយដើម្បីអនុវត្តន៍បន្តទៀត» ។
លោកបន្ថែមថា សម្រាប់អ្នកជាប់ពន្ធមធ្យមអាចមានជម្រើសពីរ គឺដាក់ប្រកាសតាមអនឡាញក៏បាន ឬក៏ដាក់ប្រកាសមកកាន់បញ្ជរអគ្គនាយកដ្ឋានពន្ធដារក៏បាន ។ ដោយឡែក អ្នកជាប់ពន្ធតូចវិញ មិនតម្រូវឱ្យដាក់ប្រកាសតាមអនឡាញ ឬតាម Apps នោះទេ ប៉ុន្តែអគ្គនាយកដ្ឋានពន្ធដារបានបង្កើត Apps នេះឡើងក៏សម្រួលដល់អ្នកជាប់ពន្ធតូចដែរ ដូច្នេះ អ្នកជាប់ពន្ធតូចមានជម្រើសច្រើនជាងអ្នកជាប់ពន្ធមធ្យម និងអ្នកជាប់ពន្ធធំ ។
លោកបានបន្តទៀតថា កន្លងទៅការដាក់លិខិតប្រកាសតាមអនឡាញ ( E-VAT ) មាន ៨០ ភាគរយនៃអ្នកជាប់ពន្ធរួចទៅហើយ ដូច្នេះទៅថ្ងៃអនាគត វាអត់មានជម្រើសអ្វីទៅរកប្រព័ន្ធ អនឡាញនោះទេ ពីព្រោះថាពួកគេបានអនុវត្តន៍តាមអនឡាញ រួចទៅហើយ នៅតែប្រភេទ ពន្ធមួយចំនួនប៉ុណ្ណោះ ដែលត្រូវការដាក់ប្រកាសតាមអនឡាញដូចជាពន្ធលើប្រាក់បៀវត្សរ៍ ពន្ធកាត់ទុកមួយចំនួនប៉ុណ្ណោះ ។ លោកបញ្ជាក់ទៀតថា៖ «យើងជឿជាក់ថា មិនមែនមាន តែអ្នកជាប់ពន្ធធំទេ ដែលចង់ឱ្យមានការដាក់ប្រកាសតាមអនឡាញ សូម្បីតែអ្នកជាប់ពន្ធ តូចៗក៏មានបំណងធ្វើដូច្នេះដែរ» ។
យោងតាមសេចក្តីណែនាំស្ដីពីការដាក់ឱ្យប្រើប្រាស់ប្រព័ន្ធគ្រប់គ្រងការដាក់លិខិតប្រកាសពន្ធតាមអនឡាញ និងទម្រង់លិខិតប្រកាសពន្ធប្រចាំខែថ្មីសម្រាប់អ្នកជាប់ពន្ធបានឱ្យដឹង ថាក្នុងការប្រើប្រាស់ប្រព័ន្ធគ្រប់គ្រងការដាក់លិខិតប្រកាសពន្ធតាមអនឡាញ អ្នកជាប់ពន្ធ មធ្យម និងធំ ត្រូវប្រើប្រាស់ប្រព័ន្ធអនឡាញរបស់អគ្គនាយកដ្ឋានពន្ធដារ ហើយសម្រាប់អ្នក មិនទាន់បានចុះឈ្មោះ ត្រូវចូលទៅកាន់គេហទំព័ររបស់អគ្គនាយកដ្ឋាន ដើម្បីចុះឈ្មោះ និងចាប់ផ្ដើមប្រើប្រាស់ទៅតាមការណែនាំរបស់អគ្គនាយកដ្ឋានក្នុងគេហទំព័រនោះ ។
សេចក្ដីណែនាំរបស់អគ្គនាយកដ្ឋានពន្ធដារក៏បានបង្ហាញថា សម្រាប់អ្នកជាប់ពន្ធតូចក៏អាច ដាក់លិខិត ប្រកាសដោយប្រើប្រាស់ប្រព័ន្ធគ្រប់គ្រងការដាក់លិខិតស្នាមតាមអនឡាញ យ៉ាងយឺតបំផុតត្រឹមថ្ងៃទី ២៥ នៃខែបន្ទាប់ដែលប្រតិបត្តិការទាក់ទិននឹងពន្ធអាករទាំងនោះ បានកើតឡើង ដោយរួចផុតពីពន្ធបន្ថែម ១០ភាគរយពីការយឺតយ៉ាវក្នុងការដាក់លិខិត ប្រកាស ។ ចំពោះការបំពេញលិខិតប្រកាសដោយដៃ អ្នកជាប់ពន្ធតូចត្រូវដាក់លិខិត ប្រកាសនៅរដ្ឋបាលសារពើតពន្ធ យ៉ាងយឺតបំផុតត្រឹមថ្ងៃទី ២០នៃខែបន្ទាប់ពីខែដែល ប្រតិបត្តិការទាក់ទិននឹងពន្ធអាករទាំងនោះបានកើតឡើង ។
គួរបញ្ជាក់ថា តាមច្បាប់ថវិកាឆ្នាំ ២០២០នេះ អគ្គនាយកដ្ឋានពន្ធដារបានកំណត់ប្រមូល ថវិកាឱ្យបាន ២.៨៨៥លានដុល្លារអាមេរិក ក្នុងនោះចំណូលរបស់អគ្គនាយកដ្ឋានពន្ធដារ ក្នុងខែមករា បើតាមរបាយការណ៍ពន្ធដារបានឱ្យដឹងថាប្រមូលបានប្រមាណ ២៣៩លាន ដុល្លារអាមេរិក ។ តែយ៉ាងណាក៏ដោយគេមិនទាន់ដឹងច្បាប់ថវិកានេះអាចនឹងសម្រេចបាន តាមផែនការ ឬយ៉ាងណានោះទេ ខណៈរដ្ឋាភិបាល បានប្រកាសលើកលែងពន្ធទៅលើ សណ្ឋាគារ និងផ្ទះសំណាក់ ក្នុងខេត្តសៀមរាប ប្រកាសលើកលែងពន្ធប្រថាប់ត្រាចំពោះការទិញផ្ទះក្រោមតម្លៃ ៧ម៉ឺនដុល្លារអាមេរិកជាដើម ៕
ចែករំលែកព័តមាននេះ