រាជធានីភ្នំពេញ ៖ ការដ្ឋានឃ្លាំងគ្រឿងសំណង់អត់ច្បាប់មួយកន្លែងត្រូវបានអាជ្ញាធរខណ្ឌឬស្សីកែវ ចុះទៅដកហូតយកសម្ភារៈជាការព្រមាន ដើម្បីអោយម្ចាស់សុំច្បាប់សាងសង់អោយបានត្រឹមត្រូវ។
ការចុះដកហូតសម្ភារៈក្នុងការដ្ឋានឃ្លាំងគ្រឿងសំណង់អត់ច្បាប់ខាងលើនេះបានធ្វើឡើងកាលពីវេលាម៉ោងប្រមាណ៩និង៣០នាទីព្រឹកថ្ងៃទី១៣ ខែមីនា ឆ្នាំ ២០២០ នៅចំណុចការដ្ឋានឃ្លាំងគ្រឿងសំណង់ ស្ថិតក្នុងភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ។
លោកលឹម សាម៉ឺឌី ប្រធានការិយាល័យនីតិកម្មខណ្ឌ បានអោយដឹងថា ការចុះដកហូតសម្ភារៈ និងឧបករណ៍បម្រើឱ្យការសាងសង់ខាងលើនេះដោយមានការអនុញ្ញាតពីលោកជា ពិសី អភិបាលខណ្ឌឫស្សីកែវ ។ លោកប្រធានការិយាល័យក៍បានអោយដឹងទៀតថា ការដ្ឋានឃ្លាំងគ្រឿងសំណង់នេះបានសាងសង់ដោយពុំមានច្បាប់អនុញ្ញាតនោះទេ ។ កន្លងមក លោកអភិបាលបានចេញសេចក្តីជូនដំណឹងអោយម្ចាស់ផ្អាកការសាងសង់ ដោយណែនាំអោយសុំច្បាប់ តែម្ចាស់មិនស្តាប់តាមការណែនាំនៅតែបន្តសាងសង់ដោយអត់ច្បាប់ ទើបអាជ្ញាធរចុះមកដកហូតសម្ភារៈតែម្តង ។
តាមប្រភពព័ត៌មានបានអោយដឹងថា សម្ភារៈដកហូតរួមមានម៉ូទ័រ១គ្រឿង ដែកទីបចំនួន២២ដើម និងដែកចងចាក់សរសរចំនួន៤ត្រូវបានក្រុមសន្តិសុខនាំគ្នាលើកដាក់រថយន្តដឹកយកទៅដាក់សាលាខណ្ឌឬស្សីកែវជាការព្រមាន រួចណែនាំអោយម្ចាស់សុំច្បាប់សិន ទើបអនុញ្ញាតអោយសង់បន្តទៀត។
តាមប្រភពពីអ្នកម៉ៅការសំណង់ខាងលើបានអោយដឹងថា មុនសាងសង់ ម្ចាស់ក៏បានអោយប្រធានភូមិជាអ្នកជួយសុំច្បាប់ មិនដឹងថា មូលហេតុអ្វីទេ បានជាខណ្ឌចុះមកឃាត់និងចាប់គ្រឿងសំណង់បែបនេះ? ៕ (កែសម្រួលដោយ ៖ ធីតា)
ចែករំលែកព័តមាននេះ