ព្រះរាជអាជ្ញាពុំបានចោទប្រកាន់លើសហរដ្ឋអាមេរិកទេ
- ភ្នំពេញ
រាជធានីភ្នំពេញ ៖ សវនាការលើសំណុំរឿងលោក កឹម សុខា អតីតប្រធានគណបក្សសង្គ្រោះជាតិ សម្រាប់សប្តាហ៍ទី៨នេះ អ្វីដែលជាការកត់សម្គាល់គឺ នៅព្រឹកថ្ងៃទី១២ ខែមីនា…
រាជធានីភ្នំពេញ ៖ សវនាការលើសំណុំរឿងលោក កឹម សុខា អតីតប្រធានគណបក្សសង្គ្រោះជាតិ សម្រាប់សប្តាហ៍ទី៨នេះ អ្វីដែលជាការកត់សម្គាល់គឺ នៅព្រឹកថ្ងៃទី១២ ខែមីនា លោកឯកអគ្គរដ្ឋទូតសហរដ្ឋ អាមេរិក W. Patrick Murphy បានចូលរួមសង្កេតការណ៍ដោយផ្ទាល់នៅសាលាដំបូងរាជធានីភ្នំពេញ ។ បើយោងតាមវិទ្យុបារាំងអន្តរជាតិបានផ្សាយថា លោក W. Patrick Murphy បានអះអាងថា សហរដ្ឋអាមេរិកចង់ឃើញលោក កឹម សុខាមានសិទ្ធិធ្វើនយោបាយឡើងវិញ តែក៏បានសម្តែងការមិនពេញចិត្តចំពោះតុលាការកម្ពុជាដែលព្យាយាមទាញអាមេរិកទៅភ្ជាប់នឹងសំណុំរឿងលោក កឹម សុខា ។
ថ្លែងទៅកាន់ក្រុមអ្នកកាសែតនៅមុខសាលាដំបូងរាជធានីភ្នំពេញ នាព្រឹកថ្ងៃទី១២ ខែមីនា លោក W. Patrick Murphy បានលើកឡើងថា សហរដ្ឋអាមេរិកមានការរំខានចិត្តដោយខាងព្រះរាជអាជ្ញាអមសាលាដំបូងរាជធានីភ្នំពេញបានលើកឡើងនូវរឿងមិនពិត ដែលត្រូវបានប្រឌិតឡើងទាក់ទងនឹងសហរដ្ឋអាមេរិក ។ សហរដ្ឋអាមេរិក ត្រូវបានតំណាងអយ្យការទាញភ្ជាប់ទៅនឹងលោក កឹម សុខា នៅក្នុងសវនាការសំណុំរឿងក្បត់ជាតិដែលមានបរទេសនៅពីក្រោយ ។ នៅក្នុងសវនាការកន្លងមក លោក កឹម សុខា ត្រូវបានតំណាងអយ្យការនិងមេធាវីតំណាងរាជរដ្ឋាភិបាលជជីកសួរពីការជាប់ពាក់ព័ន្ធរបស់បរទេស និងភ្នាក់ងារបរទេសក្នុងការរៀបចំផ្តួលរំលំរាជរដ្ឋាភិបាលកម្ពុជា ។
លោក W. Patrick Murphy ត្រូវបានដកស្រង់សម្តីដោយបានបញ្ជាក់ជំហររបស់សហរដ្ឋអាមេរិកថា អាមេរិកមិនដែលចង់ជ្រៀតជ្រែកក្នុងអភិបាលកិច្ចរបស់ប្រទេសកម្ពុជាទេ ពោលគឺសហរដ្ឋអាមេរិកគោរពពេញលេញចំពោះឯករាជ្យភាព និងអធិបតេយ្យភាពរបស់ប្រទេសកម្ពុជា ។ ប៉ុន្តែលោកឯកអគ្គរដ្ឋទូតក៏បានអះអាងថា សហរដ្ឋអាមេរិកនឹងតាមដានសវនាការកាត់ក្តីលោក កឹម សុខា យ៉ាងដិតដល់ ហើយថា ដំណើរ
ការសវនាការនេះអាចមានបច្ច័យទៅលើនីតិរដ្ឋនិងដំណើរការត្រឹមត្រូវតាមផ្លូវច្បាប់នៅកម្ពុជា និងសម្រាប់ទំនាក់ទំនងអន្តរជាតិរបស់ប្រទេសកម្ពុជា ។ លោកឯកអគ្គរដ្ឋទូតសហរដ្ឋអាមេរិកក៏បានគូសបញ្ជាក់ផងដែរថា អាមេរិករីករាយនឹងឃើញថា សិទ្ធិនយោបាយរបស់លោក កឹម សុខា ត្រូវបានប្រគល់ឲ្យលោកវិញ ហើយសង្ឃឹមថា ប្រជាជនកម្ពុជាទាំងអស់អាចចូលរួមក្នុងដំណើរការនយោបាយ ។
ភ្លាមៗ បន្ទាប់ពីមានការថ្លែងរបស់លោកឯកអគ្គរដ្ឋទូតសហរដ្ឋអាមេរិកនោះ អ្នកនាំពាក្យនៃអយ្យការអមសាលាដំបូងរាជធានី បានចេញសេចក្តីប្រកាសព័ត៌មានមួយចុះថ្ងៃទី១២ ខែមីនា ឆ្នាំ២០២០ ដោយធ្វើការបញ្ជាក់តបទៅនឹងសេចក្តីថ្លែងការណ៍របស់ឯកអគ្គរដ្ឋទូតសហរដ្ឋអាមេរិកលោក W. Patrick Murphy កាលពីថ្ងៃទី១២ ខែមីនា ឆ្នាំ២០២០ ដែលលោកបានលើកឡើងថា «យើងមានការរំខានចិត្ត ដោយខាងព្រះរាជអាជ្ញាបានលើកឡើងនូវរឿងមិនពិតដែលត្រូវបានប្រឌិតឡើងទាក់ទងនឹងសហរដ្ឋអាមេ
រិក» ។
អ្នកនាំពាក្យនៃអយ្យការអមសាលាដំបូងរាជ ធានីភ្នំពេញ បានបញ្ជាក់ថា ក្នុងដំណើរការនៃការជំនុំជម្រះក្តីលើសំណុំរឿងពាក់ព័ន្ធនឹងជនជាប់ចោទឈ្មោះ កឹម សុខា ពីបទសន្ទិដ្ឋិភាពជាមួយបរទេស តាមបញ្ញត្តិមាត្រា៤៤៣ ក្រមព្រហ្មទណ្ឌនៃព្រះរាជាណាចក្រកម្ពុជា គឺព្រះរាជអាជ្ញាពុំបានចោទប្រកាន់ប៉ះពាល់ទៅលើសហរដ្ឋអាមេរិក រដ្ឋបរទេស ឬភ្នាក់ងារបរទេសណាមួយនោះឡើយ ព្រះរាជអាជ្ញាបានចោទប្រកាន់តែទៅលើជនជាប់ចោទឈ្មោះ កឹម សុខា ដែលមានអង្គហេតុ អង្គច្បាប់ ព្រមទាំងមានធាតុផ្សំបទល្មើសគ្រប់គ្រាន់ទៅតាមច្បាប់នៃព្រះរាជាណាចក្រកម្ពុជាតែប៉ុណ្ណោះ ។
អ្នកនាំពាក្យនៃអយ្យការអមសាលាដំបូងរាជធានីភ្នំពេញ បញ្ជាក់ទៀតថា នៅក្នុងដំណើរការជំនុំជម្រះលើសំណុំរឿងក្តីនេះ គឺមានសាធារណជនជាតិនិងអន្តរជាតិជាច្រើន ចូលរួមស្តាប់និងសង្កេតការណ៍គ្រប់ពេលសវនាការ ។សម្តេចតេជោនាយករដ្ឋមន្ត្រី ហុ៊ន សែន កាលពីថ្ងៃចន្ទទី៩ ខែមីនា បានថ្លែងដោយមិនចំឈ្មោះ តែទំនងសំដៅលើលោក កឹម សុខា ថា កម្ពុជាមិនថយក្រោយក្នុងការកាត់ក្ដីលើជនក្បត់ជាតិ ហើយសម្តេចក៏បានព្រមានបិទការចរចាជាមួយគ្រប់ភាគីណាដែលចង់ឲ្យសម្តេចជួយអ្នកដែលតុលាការកំពុងកាត់ក្ដីផងដែរ។
ថ្លែងនៅវិមានសន្តិភាព សម្តេចតេជោ បញ្ជាក់ថា៖ «ថ្ងៃនេះ សូមជូនសារជាក់លាក់ច្បាស់លាស់ ថា កម្ពុជាមិនថយក្រោយលើការកាត់ក្ដីចំពោះជនក្បត់ជាតិ ឬអ្នកដែលទទួលនូវទណ្ឌកម្មទេ។អ្នកឯងត្រូវតែច្បាស់ អ្វីដែលអ្នកឯងបានធ្វើ អ្នកឯងត្រូវចាំ អ្នកឯងយកថ្ងៃទី២៩ ខែធ្នូ ឆ្នាំ២០១៣ គឺជាថ្ងៃផ្ដាច់ព្រ័ត្រ ក្នុងការផ្ដួលរំលំ»។ សម្តេចតេជោ ហ៊ុន សែន បានបញ្ជាក់ថា នេះជាការឆ្លើយតបទៅនឹងការសម្រេចរបស់សហភាពអឺរ៉ុប ក្នុងការព្យួរប្រព័ន្ធអនុគ្រោះពន្ធនៅកម្ពុជា ហៅថាEBA ដែលនឹងធ្វើឲ្យកម្ពុជាខាតបង់ប្រាក់ជាង១០០លានដុល្លារអាមេរិកនៅពេលខាងមុខ ដោយសារប៉ះពាល់ការនាំចេញផលិតផលទៅអឺរ៉ុបប្រមាណ២០ភាគរយ ។ កន្លងទៅ សហភាពអឺរ៉ុបបានជំរុញឲ្យទម្លាក់ការចោទ ប្រកាន់លោក កឹម សុខា ។
ទោះបីជាបែបណា លោក កឹម សុខា កាលពីថ្ងៃអង្គារទី១០ ខែមីនា បានបដិសេធមិនធ្វើអត្ថាធិប្បាយជុំវិញការលើកឡើងរបស់សម្តេចតេជោនាយករដ្ឋមន្ត្រីនោះទេ ។ លោក កឹម សុខា ត្រូវបានចាប់ខ្លួនកាលពីដើមខែកញ្ញា ឆ្នាំ២០១៧ ដោយសមត្ថកិច្ចបានប្រើប្រាស់វីដេអូមានរយៈពេលជាង២នាទី ដែលស្រង់ចេញពីវីដេអូជាងមួយម៉ោង មកធ្វើជាភ័ស្តុតាងក្នុងការចាប់ខ្លួននិងចោទប្រកាន់ ហើយឃុំខ្លួនលោកក្នុងពន្ធនាគារ ។ ក្រោយមក លោកត្រូវបានដោះលែងពីពន្ធនាគារមកឲ្យនៅក្នុងផ្ទះ។លោកមិនមានសេរីភាពធ្វើនយោបាយ និងចាកចេញទៅក្រៅប្រទេសនោះទេ ៕
ចែករំលែកព័តមាននេះ