អង់គ្លេស ៖ ចាប់តាំងពីមានការផ្ទុះឡើងនៃវីរុស Covid-19 រហូតមកដល់ពេលនេះ មនុស្សនៅជុំវិញពិភពលោក ហាក់ដូចជាកំពុងផ្លាស់ប្ដូរនូវសកម្មភាពប្រចាំថ្ងៃមួយចំនួនទាំងនៅកន្លែងធ្វើការ នៅផ្ទះ និងកន្លែងផ្សេងៗ ពិសេសសម្រាប់ការស្វាគមន៍ ដោយយកដៃ សំពះ ជំនួសការចាប់ដៃនិងឱប ដើម្បីកាត់បន្ថយការចម្លងនៃវីរុសកូវីដ-១៩ នេះបើតាមសារព័ត៌មានរបស់រុស្ស៊ី RT ។
ជាការកត់សម្គាល់ ខណៈពេលវីរុសកូវីដ-១៩ កំពុងរាតត្បាតនេះ ការស្វាគមន៍ដោយចាប់ដៃ ឫចាប់ឱប ថើប ដោយប៉ះថ្ពាល់និងថ្ពាល់ ជាដើមនោះ ហាក់ត្រូវបានកាត់បន្ថយ ឫមិនអនុវត្តទៀតហើយ ដោយចាប់យកកាយវិការ សំពះ ជំនួសជាសញ្ញាស្វាគមន៍វិញ ។
ប្រធានាធិបតីអាមេរិកលោកដូណាល់ ត្រាំ ត្រូវបានគេមើលឃើញថា លោកស្វាគមន៍នាយករដ្ឋមន្ត្រីអៀរឡង់ លោក Leo Varadkar កាលពីថ្ងៃព្រហស្បតិ៍ ដោយគ្មានការចាប់ដៃទេ នៅពេលមានជំងឺរាតត្បាតកំពុងតែកើតមាននេះ ។
ជាក់ស្តែងថ្មីៗនេះ ព្រះអង្គម្ចាស់ឆាល (Prince Charles) បានចូលរួមក្នុងព្រឹត្តិការណ៍ Prince’s Trust Awards នៅឯទីក្រុង ឡុងដ៍ កាលពីថ្ងៃពុធ បានចាប់យកកាយវិការ សំពះ នេះជំនួសការចាប់ដៃ ។
រជ្ជទាយាទនៃចក្រភពអង់គ្លេស និងជាព្រះអង្គម្ចាស់វេលស៍ (Prince of Wales) បានលើកព្រះហស្ត សំពះ ភ្លាមៗ បន្ទាប់ពីព្រះអង្គបានភ្លេចខ្លួន យកព្រះហស្ត ទៅចាប់ជាមួយអ្នកដែលបានស្វាគមន៍ វត្តមានរបស់ព្រះអង្គ ។
តាមរយៈវីដេអូ ព្រះអង្គម្ចាស់ឆាល ដែលបច្ចុប្បន្នមានព្រះជន្ម៧១ព្រះវស្សា បានសើច ហើយបានមានបន្ទូលថា ព្រះអង្គហាក់ដូចជាមិនទាន់មានទម្លាប់ប្តូរពីការចាប់ដៃនោះឡើយ ។
ទោះបីជាយ៉ាងណាក៏ដោយ នៅក្នុងព្រឹត្តិការណ៍ទាំងមូល រដ្ឋទាយាទអង់គ្លេស បានព្យាយាមមិនចាប់ដៃស្វាគមន៍ឡើយ ព្រះអង្គបានលើកព្រះហស្តសំពះ ជាបន្តបន្ទាប់ ៕
ចែករំលែកព័តមាននេះ