រដ្ឋបាលទីក្រុងប៉េកាំងនឹងផ្តល់ជំនួយគ្រឿងបរិក្ខារវេជ្ជសាស្ត្រ សម្រាប់ការការពារឆ្លងមេរោគ ទៅកាន់ទីក្រុងសេអ៊ូល របស់កូរ៉េខាងត្បូង, ទីក្រុងតេអេរ៉ង់ របស់ប្រទេសអ៊ីរ៉ង់ ទីក្រុងតូក្យូនិងយូកូហាម៉ា របស់ជប៉ុន ដើម្បីជួយដល់ការប្រយុទ្ធប្រឆាំងនឹងជំងឺរាតត្បាត គឺ COVID-19 នេះបើតាមទីភ្នាក់ងារសារព័ត៌មានចិន ស៊ិនហួរ ចុះផ្សាយនៅថ្ងៃទី១៣ មីនានេះ ។
លោក លី យី Li Yi អនុប្រធានការិយាល័យកិច្ចការបរទេស នៃរដ្ឋបាលក្រុងប៉េកាំង បាននិយាយថា សម្លៀកបំពាក់ការពារសម្រាប់ពេទ្យ ចំនួន ២០០.០០០ឈុត, ស្រោមដៃ ១០០,០០០គូ, ទ្រនាប់ស្រោបស្បែកជើង ២០០.០០០គូ និងមួករបាំងការពារ ចំនួន ២០០.០០០ ត្រូវបានបញ្ជូនទៅទីក្រុងទាំង៤នេះ ។
ទឹកលាងដៃ ឧបករណ៍ធ្វើតេស្តសំណាក ឧបករណ៍វាស់ស្ទង់កម្តៅ និងឧបករណ៍ជំនួយការដកដង្ហើមសម្រាប់គ្រូពេទ្យ ក៏ស្ថិតក្នុងចំណោមជំនួយដែលត្រូវបរិច្ចាគដែរ ។
លោក លី យី បានបញ្ជាក់ថា ទីក្រុងប៉េកាំង មិនភ្លេចគុណទេ ចំពោះជំនួយ(សម្ភារវេជ្ជសាស្ត្រ) និងការបរិច្ចាគ(ថវិកា) ពីសំណាក់បងប្អូនអន្តរជាតិ ចាប់តាំងពីប្រទេសចិន បានផ្ទុះឡើងនៃវីរុសឆ្លងប្រភេទថ្មីនេះ ។
លោកមានប្រសាសន៍ថា “ឥឡូវនេះ ការរីករាលដាលនៃជំងឺនេះ មាននៅក្នុងប្រទេសចិនអាចគ្រប់គ្រងបានហើយ ប៉ុន្តែវីរុសកូវីដ-១៩ នេះនៅតែបន្តរីករាលដាល នៅទូទាំងពិភពលោក ។ យើងខិតខំជួយដល់ទីក្រុងទាំង ៤ខាងលើ ដើម្បីប្រយុទ្ធប្រឆាំងនឹងការរាតត្បាតនេះ” ។
តួលេខមិនផ្លូវការ បានបង្ហាញថា ចាប់តាំងពីចិនផ្ទុះឡើងនៃវីរុស COVID-19 ទីក្រុងប៉េកាំងទទួលបានជំនួយពីមិត្តបរទេសចំនួន ១,១៣ លានម៉ាស, សម្លៀកបំពាក់ការពារ ២២០,០០០ឈុត និងស្រោមដៃ ៧៥០,០០០គូ ៕
ចែករំលែកព័តមាននេះ