ខេត្តប៉ៃលិន ៖ ក្រោយសម្រាកពីការងារស្រែចម្ការនៅឯស្រុកកំណើត មានកសិករ៣គ្រួសារ បាននាំគ្នាបើកបរគោយន្តកន្ត្រៃចេញពីខេត្តកំពង់ធំ ដោយមានដឹកគ្រែ និងទូ ដើរលក់តាមភូមិក្នុងខេត្តនានាទូទាំងប្រទេសកម្ពុជា ហើយយប់កន្លែងណានាំគ្នាឈប់សម្រាក និងដាំបាយធ្វើម្ហូបទទួលទាន…
ខេត្តប៉ៃលិន ៖ ក្រោយសម្រាកពីការងារស្រែចម្ការនៅឯស្រុកកំណើត មានកសិករ៣គ្រួសារ បាននាំគ្នាបើកបរគោយន្តកន្ត្រៃចេញពីខេត្តកំពង់ធំ ដោយមានដឹកគ្រែ និងទូ ដើរលក់តាមភូមិក្នុងខេត្តនានាទូទាំងប្រទេសកម្ពុជា ហើយយប់កន្លែងណានាំគ្នាឈប់សម្រាក និងដាំបាយធ្វើម្ហូបទទួលទាន រួចដេកត្រង់កន្លែងនោះតែម្តង ។ ប៉ុន្តែមុខរបរដើរលក់សម្ភារ:ប្រើប្រាស់បែបផ្សងព្រេងនេះ មិនកាក់កបប៉ុន្មាននោះទេ ដោយជួនកាលបើកគោយន្តគ្រប់ច្រកល្ហកអស់ហើយ អស់រយ:ពេល១ខែ នៅតែលក់មិនដាច់ សូម្បីតែ១គ្រឿងនោះឡើយ ។
ហើយហេតុការណ៍ប្រទះឃើញប្រជាពលរដ្ឋបើកគោយន្តកន្ត្រៃដើរលក់គ្រែ និងទូខាងលើនេះ បានកើតឡើងកាលពីម៉ោង៧និង៤៥នាទីព្រឹក ថ្ងៃទី១៣ ខែមីនា ឆ្នាំ២០២០ ស្ថិតនៅក្នុងបរិវេណវត្ត ពោធិមារ៉ាម ហៅវត្តប៉ាហ៊ី ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន។
បើប្រភពព័ត៌មានបានឱ្យដឹងថា ម្ចាស់គោយន្តកន្ត្រៃខាងលើទី១- ឈ្មោះ គុំ រិទ្ធ ភេទប្រុស អាយុ២៧ឆ្នាំ មានប្រពន្ធឈ្មោះណែម សុខា អាយុ២៤ឆ្នាំ ទី២- ឈ្មោះ យឹម សឺន ភេទប្រុស អាយុ២២ឆ្នាំ ទី៣- ឈ្មោះ គុំ សុខនី ភេទស្រី អាយុ៤៨ឆ្នាំ រស់នៅស្រុកបារាយណ៍ ខេត្តកំពង់ធំ ។
បើតាមការរៀបរាប់បុរសឈ្មោះ គុំ រិទ្ធ បានឱ្យដឹងថា គោយន្តកន្ត្រៃរបស់គាត់ មានដឹកគ្រែប្រអប់ គ្រែយក្ស គ្រែគ្រុឌ និងសាឡុងជាដើម សរុបជាង២០គ្រឿង ដោយធ្វើអំពីឈើដូចជា កកោះ សុក្រំ ធ្នង់ ជាដើម ។
គាត់បន្តទៀតថា ការដើរលក់គ្រែនេះ គឺលើកពី (ជំពាក់) ម្ចាស់សិប្បកម្មក្នុងខេត្តសិន លុះលក់ដាច់អស់ ទើបយកប្រាក់ទៅសងថ្លៃដើមគេវិញ រីឯប្រាក់ចំណេញទុកគ្រាន់ផ្គត់ផ្គង់ជីវភាពគ្រួសារ ។ ការលក់ដូរគ្រែនេះ ក្នុងគ្រែ១គ្រឿងលក់តម្លៃចាប់ពី២០០ដុល្លារ, ៤៥០ដុល្លារ រហូតដល់៩៥០០ដុល្លារ តាមប្រភេទឈើផងដែរ ។
លោកបញ្ជាក់ថា លោកបានរៀបចំធ្វើបន្ទប់នៅផ្នែកខាងមុខគោយន្តរបស់ខ្លួន ដើម្បីដេកសម្រាកជាមួយប្រពន្ធ និងកូនតូច និងការពារពេលមានភ្លៀងធ្លាក់ជាដើម ហើយការបើកបរ លក់តាមភូមិក្នុងខេត្តមួយៗរយ:ពេល២ទៅ៣ថ្ងៃ ទើបប្តូរទៅលក់នៅខេត្តផ្សេងទៀត ដោយចាប់តាំងពីលក់ រហូតមកដល់ពេលនេះ គឺដាច់អស់ជាង១០គ្រឿងហើយ នៅសល់ជាង១០គ្រឿងទៀត និងរៀបចំបន្តលក់តាមភូមិតាមផ្សារជាដើម ។
បើតាមសម្តីពីឈ្មោះ យឹម សឺន បានឱ្យដឹងថា ការលក់ដូររបស់ខ្លួន មិនសូវដាច់ប៉ុន្មាននោះទេ ដោយបើកបរគោយន្តកន្ត្រៃ ឆ្វែលលក់តាមភូមិនានា ក្នុង១ថ្ងៃ ចាប់តាំងពីព្រឹករហូតដល់ល្ងាច ជួនកាលលក់អត់ដាច់សូម្បីតែគ្រែ ឬទូ១គ្រឿង នោះឡើយ ។ ប៉ុន្តែដោយសារទំនេរពីរដូវធ្វើស្រែចម្ការ ក៏ចេះតែរកមុខរបរបន្ទាប់បន្សំថែមទៀត ដើម្បីបានថវិកាសម្រាប់ផ្គត់ផ្គង់ជីវភាពគ្រួសារ ។ លុះចូលដល់រដូវភ្លៀងធ្លាក់ជោកជាំ ក៏ត្រឡប់ទៅភ្ជួររាស់ រួចក៏ចាប់ផ្តើមបន្តលក់ទៀត ដោយប្រកបរបរនេះ ជាច្រើនឆ្នាំមកហើយ ។
ចំណែកស្ត្រីម្នាក់ ឈ្មោះ គុំ សុខនី បានឱ្យដឹងដែរថា ការបើកបរគោយន្តកន្ត្រៃដើរលក់គ្រែនេះ គឺពួកគាត់ធ្វើឡើងជាក្រុម ចាប់ពី៣ទៅ១០គ្រឿង ព្រោះជារៀងរាល់យប់ ពួកគាត់តែងតែឈប់គោយន្តសម្រាកនៅក្បែរៗគ្នា ដើម្បីការពារគ្នា ដោយអ្នកខ្លះចងអង្រឹងដេកនៅលើគោយន្ត ខ្លះក្រាលកន្ទេលដេកក្រោមគោយន្តកន្ត្រៃ ក៏មានការត្រជាក់រងារ តែទ្រាំដើម្បីជីវភាពប្រចាំថ្ងៃ ។
គាត់បន្តទៀតថា ការលក់ដូរនេះ ចាប់ពីខេត្តកំពង់ធំ ចូលទៅខេត្តសៀមរាប បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង ព្រៃវែង ស្វាយរៀង កំពត កែប កំពង់សោម វិលចុះវិលឡើង ក៏ត្រឡប់ទៅដល់ខេត្តប៉ៃលិន បានរយ:ពេល២យប់ហើយ និងបន្ត១យប់ ២យប់ទៀត ទើបប្តូរទៅខេត្តផ្សេង ។ ប៉ុន្តែចំពោះគោយន្តរបស់គាត់ រយ:ពេល១ខែពេញនេះ គឺលក់អត់ដាច់ សូម្បីតែ១គ្រឿងនោះឡើយ ហើយពិតជាមានការលំបាក ដោយជួនកាលខូចគោយន្តតាមផ្លូវ ពេលយប់ជាដើម តែមិនធ្លាប់មានហេតុការណ៍អ្វីផ្សេងនោះឡើយ គឺសុខសប្បាយតាមផ្លូវជារៀងរហូតមកដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ