រាជធានីភ្នំពេញ ៖ សម្តេចតេជោ ហ៊ុនសែន នាយរដ្ឋមន្ត្រីបានប្រកាសច្រានចោលចំពោះការផ្សាយរបស់ទូរទស្សន៍បរទេសថា សម្តេចឆ្លងជំងឺរលាកផ្លូវដង្ហើមកូវីដ១៩ ថា ជាការមិនពិត ។ សម្តេចតេជោបានសរសេរបលើបណ្តាញសង្គម ខណៈដែលសម្តេចកំពុងអង្គុយប្រជុំនៅក្នុងរដ្ឋសភា នាព្រឹកថ្ងៃទី១៣ ខែមីនា ឆ្នាំ២០២០ យ៉ាងដូច្នេះថា ៖«មានទូរទស្សន៍បរទេសមួយបានផ្សាយថា ខ្ញុំបាន ឬប្រហែលឆ្លងកូវីដ១៩ទៅហើយ ។ ពេលនេះ ខ្ញុំកំពុងអង្គុយប្រជុំរដ្ឋសភា និងថ្ងៃស្អែកត្រូវចេញទៅខេត្តបាត់ដំបងដែលខ្ញុំត្រូវនៅទីនោះរហូតព្រឹកថ្ងៃអាទិត្យ ទី១៥ មីនា ២០២០» ។
សម្តេចបានបន្ថែមថា កូវីដ១៩ វាកាចសាហាវណាស់ទៅហើយ តែព័ត៌មានក្លែងក្លាយវាកាចសាហាវជាងជំងឺនេះទៅទៀត ដែលយើងចាំបាច់ត្រូវតែប្រយុទ្ធប្រឆាំងជាមួយជំងឺដ៏គ្រោះថ្នាក់នេះ ។ ជាមួយគ្នានោះដែរ ស ម្តេចតេជោ ក៏បានសូមបងប្អូនជនរួមជាតិចូលរួមទប់ស្កាត់ ការរីករាលដាលនូវជំងឺនេះ តាមរយៈវិធានការអនាម័យដោយចាប់ផ្តើមពីមនុស្សម្នាក់ៗគ្រួសារនីមួយៗ ភូមិនីមួយៗ ដើម្បីធានាថា នៅកម្ពុជាយើងគ្មានជំងឺឆ្លងបន្ថែមទៀត លើចំនួនដែលបានឆ្លងរួចមកហើយ ចំនួន៥នាក់ ក្នុងនោះជនជាតិខ្មែរម្នាក់ អង់គ្លេស៣នាក់ និង(ចិនម្នាក់ ដែលបានព្យាបាលជាសះស្បើយរួចហើយ ) ។
សូមជម្រាបថា ការប្រតិកម្មច្រានចោលរបស់សម្តេចតេជោ ហ៊ុនសែន បន្ទាប់ពីទូរទស្សន៍ថៃប៉ុស្តិ៍លេខ៧ បានចុះផ្សាយស្តីពីការសង្ស័យថា សម្តេច ហ៊ុន សែន បានឆ្លងជំងឺកូវីដ១៩ ៕
ចែករំលែកព័តមាននេះ