សហរដ្ឋអាមេរិក-អឺរ៉ុប ៖ ប្រធានាធិបតីអាមេរិកលោកដូណាល់ត្រាំ ប្រកាសនាថ្ងៃទី១១មីនាពីការផ្អាករយៈពេល៣០ថ្ងៃការចូលក្នុងសហរដ្ឋអាមេរិករបស់ជនបរទេសទាំងអស់ ដែលធ្លាប់ស្នាក់អាស្រ័យនៅអឹរ៉ុប ដើម្បីទប់ការឆ្លងរាលដាលនៃវីរុស COVID-19 ដែលបែបនេះនាំឲ្យមានព្យុះថ្មីលើបណ្ដាទីផ្សារ។ នៅការិយាល័យពងក្រពើនៃសេតវិមានលោកត្រាំថ្លែងថា ខ្ញុំសម្រេចចាត់បណ្ដាសកម្មភាពខ្លាំងតែចាំបាច់…
សហរដ្ឋអាមេរិក-អឺរ៉ុប ៖ ប្រធានាធិបតីអាមេរិកលោកដូណាល់ត្រាំ ប្រកាសនាថ្ងៃទី១១មីនាពីការផ្អាករយៈពេល៣០ថ្ងៃការចូលក្នុងសហរដ្ឋអាមេរិករបស់ជនបរទេសទាំងអស់ ដែលធ្លាប់ស្នាក់អាស្រ័យនៅអឹរ៉ុប ដើម្បីទប់ការឆ្លងរាលដាលនៃវីរុស COVID-19 ដែលបែបនេះនាំឲ្យមានព្យុះថ្មីលើបណ្ដាទីផ្សារ។
នៅការិយាល័យពងក្រពើនៃសេតវិមានលោកត្រាំថ្លែងថា ខ្ញុំសម្រេចចាត់បណ្ដាសកម្មភាពខ្លាំងតែចាំបាច់ ដើម្បីការពារសុខភាពនិងសុខមាលភាពរបស់ប្រជាជនអាមេរិក។ លោកបន្តថាដើម្បីរារាំងអ្នកឆ្លងថ្មីៗចូលក្នុងប្រទេសយើង ខ្ញុំនឹងផ្អាករាល់ដំណើរមកពីអឹរ៉ុបឆ្ពោះមកកាន់អាមេរិកសម្រាប់រយៈពេល៣០ថ្ងៃ ដោយលោកលើកឡើងថា សហភាពអឹរ៉ុបពុំបានធ្វើការប្រុងប្រយ័ត្នដូចគ្នានោះឡើយ។
វិធានការនោះដែលចូលជាធរមានចាប់ពីពាក់កណ្ដាលអាធ្រាត្រថ្ងៃទី១២មីនាទៅ នឹងមិនទាក់ទិនជាមួយប្រទេសអង់គ្លេសឡើយ។ វាក៏នឹងអនុវត្តដែរសម្រាប់មនុស្សទាំងអស់ដែលបង្ខាំងទុកនៅដាច់ពីគេ១៤ថ្ងៃនៅអឺរ៉ុប មុនមកកាន់សហរដ្ឋអាមេរិក លើកលែងតែពលរដ្ឋអាមេរិកនិងអ្នករស់នៅអចិន្ត្រៃយ៍ក្នុងដែនដីអាមេរិក។
ជារឿងពុំធ្លាប់មានពីមុនមក ក្រសួងការបរទេសអាមេរិកបានស្នើដល់ពលរដ្ឋខ្លួនឲ្យចៀសវាង រាល់ការធ្វើដំណើរទៅបរទេស។
តម្លៃប្រេងបានធ្លាក់ដល់ជាង៦%នាព្រឹកថ្ងៃទី១២មីនានៅអាសីុក្រោយសុន្ទរកថារបស់ប្រធានាធិបតីអាមេរិក ហើយតមៃ្លភាគហ៊ុនក្រុងតូក្យូនិងក្រុងហុងកុងក៏ធ្លាក់ចុះដ៏គំហុកដែរ។
ប៉ុន្មានម៉ោងមុនសុន្ទរកថារបស់លោកត្រាំ នាយកនៃមជ្ឈមណ្ឌលស្រាវជ្រាវនិងបង្ការជំងឹអាមេរិក លោកROBERT REDFIELDវាយតមៃ្លថា គ្រោះថ្នាក់សំខាន់នៃការឆ្លងរាលដាលនៃវីរុស សម្រាប់សហរដ្ឋអាមេរិកដែលមានអ្នកឆ្លងលើសពី១.០០០នាក់រួចហើយនោះ មកពីអឺរ៉ុប។ លោកអះអាងថា ការគំរាមកំហែងពិតប្រាកដសម្រាប់យើងពេលនេះគឹអឺរ៉ុប។ គឺអ្នកឆ្លងនៅប្រទេសយើងជាអ្នកមកពីទីនោះ។ បើនិយាយឲ្យច្បាស់ទៅអឹរ៉ុបគឺជាចិនថ្មី។
មនុស្សជាង២០.០០០នាក់បានឆ្លងវីរុសនៅអឹរ៉ុបហើយ៩៣០នាក់ស្លាប់។ លើពិភពលោកមានអ្នកឆ្លងកើនដល់១២៤.១០១នាក់ ជំរឿនឃើញក្នុងប្រទេសនិងដែនដី១១៨ បណ្ដាលឲ្យមនុស្សបាត់បង់ជីវិត៤.៥៦៦នាក់។
នៅបារាំងរយៈពេល២៤ម៉ោងចុងក្រោយនេះកត់សម្គាល់ឃើញអ្នកស្លាប់ថ្មី១៥នាក់ទៀត នាំឲ្យ ចំនួនអ្នកបាត់បង់ជីវិតសរុបដោយសារវីរុសនេះនៅទីនោះឡើងដល់សរុប៤៨នាក់ ក្នុងចំណោមអ្នកឆ្លង២.២៨១នាក់រាប់ឃើញចាប់តាំងពីដំណាច់ខែមករាមក។ មានអ្នកឆ្លងថ្មីជិត៥០០នាក់កត់សម្គាល់ឃើញ បើប្រៀបធៀបទៅនឹងតុល្យការមុន។ មានអ្នកជំងឺ១០៥នាក់បានជាសះស្បើយ។
នៅអឹរ៉ុបដែរប្រទេសដាណឹម៉ាក់កាលពីយប់ថ្ងៃទី១១មីនា បានប្រកាសពីបណ្ដាវិធានការម៉ឺងម៉ាត់បំផុតនានា ដើម្បីប្រឆាំងនឹងវីរុសនោះ ដែលឆ្លងដល់មនុស្សជាង៥០០នាក់ហើយក្នុងប្រទេសនេះ។ បណ្ដាសាលារៀន សាកលវិទ្យាល័យនិងបណ្ណាគារត្រូវបិទទ្វារ ហើយហាមឃាត់ការប្រមូលផ្ដុំមនុស្សលើសពី១០០នាក់។បណ្ដាមន្ត្រីរដ្ឋការស្នើឲ្យស្ថិតនៅក្នុងផ្ទះ។
នៅអៀរឡង់មានអ្នកបាត់បង់ជីវិតដំបូងម្នាក់ ខណៈអ្នកឆ្លងមាន៣៤នាក់ក្នុងប្រទេសនេះ។ នៅអ៊ីតាលីមានការឆ្លងរាលដាលខ្លាំងចជាងគេ ដោយនៅទីនោះអ្នកឆ្លងឡើងដល់ជាង១០.០០០នាក់ជាមួយអ្នកបាត់បង់ជីវិតជាង៦០០នាក់៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ