អ្នកប្រហែលជាធ្លាប់ឮរឿងរបស់មនុស្សជាច្រើនដែលបានចាញ់បោកអ្នកបោកប្រាស់អស់ទ្រព្យសម្បត្តិមួយគ្រួសារ តែតើអ្នកធ្លាប់គិតទេថាប្រសិនបើអ្នកស្ថិតក្នុងស្ថានការនោះ តើអ្នកងាយនឹងចាញ់បោកអ្នកដទៃដែរទេ?
មនុស្សភាគច្រើនគិតថា មានតែមនុស្សដែលល្ងង់ទេដែលចាញ់បោកអ្នកដទៃច្រើនជាងគេ ប៉ុន្តែការសិក្សាស្រាវជ្រាវបានរកឃើញលទ្ធផលច្រើនជាងនេះទៀត ។ មនុស្សដែលមានចំណេះដឹងជ្រៅជ្រះ និងមនុស្សដែលជោគជ័យក៏អាចធ្លាក់ខ្លួនក្នុងស្ថានការខាងលើបានដូចគ្នាដែរ ។
យោងទៅតាមការសិក្សាមួយរបស់អ្នកស្រាវជ្រាវមកពី University of Sidney ក្នុងប្រទេសអូស្ត្រាលី បានឲ្យដឹងថា មានចំណុចពីរយ៉ាងដែលធ្វើឲ្យមនុស្សងាយចាញ់បោកអ្នកដទៃ ។
ចំណុចទីមួយ គឺភាពក្នុងការងាយត្រូវបានបញ្ចុះបញ្ចូលពីអ្នកដទៃ ។ ប្រសិនបើអ្នកជាមនុស្សដែលងាយជឿតាមអ្នកលក់ឲ្យទិញអ្វីមួយដែលអ្នកមិនមានគម្រោងទិញពីមុនមកនោះ អ្នកប្រហែលជាមានភាគរយច្រើនជាងមនុស្សទូទៅក្នុងការចាញ់បោកអ្នកដទៃហើយ ។
ចំណុចទីពីរ គឺការអសមត្ថភាពក្នុងការមើលឃើញភាពមិនគួរឲ្យជឿជាក់របស់អ្នកដទៃ ។ មានកត្តាជាច្រើនដែលអាចប្រាប់ដល់មនុស្សម្នាក់ថាមនុស្សម្នាក់ទៀតកំពុងតែកុហក តែបើអ្នកជាមនុស្សដែលមិនមានសមត្ថភាពក្នុងការមើលឃើញមុខសញ្ញាទាំងនេះទេនោះ អ្នកជាមនុស្សដែលងាយនឹងចាញ់បោកអ្នកដទៃដែរ ។
ប្រសិនបើអ្នកមានចំណុចខាងលើ តើអ្នកអាចធ្វើអ្វីបានដើម្បីជៀសវាងការចាញ់បោកអ្នកដទៃអស់ទ្រព្យសម្បត្តិ? ការស្រាវជ្រាវមួយចំនួនបានបង្ហាញឲ្យដឹងថា អត្តចរិករបស់មនុស្សផ្លាស់ប្តូរបន្តិចបន្តួចដែរក្នុងរយៈពេលមួយជីវិតរបស់មនុស្ស ហើយបទពិសោធន៍ក្នុងការចាញបោកអ្នកដទៃម្តងឬពីរដងអាចធ្វើឲ្យមនុស្សកាន់តែមានការប្រុងប្រយ័ត្ននៅពេលក្រោយៗ ។
លើសពីនេះទៅទៀត ប្រសិនបើអ្នកដឹងថាខ្លួនស្ថិតក្នុងចំណោមមនុស្សដែលងាយនឹងចាញ់បោកអ្នកដទៃហើយ អ្នកគួរតែកាន់តែប្រុងប្រយ័ត្នបន្ថែមទៀតពេលដែលជួបនឹងឱកាសរកលុយដែលសន្យាថានឹងរកប្រាក់ចំណេញមកឲ្យអ្នកវិញច្រើនជ្រុលជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ