ខេត្តប៉ៃលិន ៖ កាលពីពេលថ្មីៗកន្លងទៅនេះនៅក្នុងខេត្តប៉ៃលិនមានភ្លៀង១មេយ៉ាងធំធ្វើឱ្យសើមដីចម្ការប្រជាពលរដ្ឋស្ទើរតែទាំងអស់ដោយមានអ្នកខ្លះចាប់ផ្តើមដាំពោត និងដំឡូងមីជាបណ្តើរៗ ។ ចំណែកអ្នកខ្លះទៀតកំពុងតែចាប់ផ្តើមជួលឱ្យកម្មករសម្រុកដកមើមដំឡូងមី នៅក្នុងចម្ការរបស់ខ្លួន ដើម្បីភ្ជួរដីដាក់ដាំសារជាថ្មីបន្តទៀតផងដែរ ។
ជាក់ស្តែង កាលពីវេលាម៉ោង៩ និង៣០នាទីព្រឹក ថ្ងៃទី១២ ខែមីនានេះមានកសិករម្នាក់ឈ្មោះ ទុយ សារឿន ភេទប្រុស អាយុ៥៩ឆ្នាំ ប្រពន្ធឈ្មោះ ម៉ៅ រ៉ាន អាយុ៤៥ឆ្នាំ រស់នៅក្នុងភូមិតាង៉ែនក្រោម ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានកំពុងប្រញឹកដៃដាំដំណាំទាំងនេះ ។
ប្រភពព័ត៌មានពីកសិករ ឈ្មោះ ទុយ សារឿន បានរៀបរាប់ឱ្យដឹងថា គាត់បានដាំដំឡូងមី ចំនួន៣០ហិកតា នៅលើដីចម្ការរបស់ខ្លួន ក្នុងភូមិក្ងោក ឃុំស្ទឹងកាច់ ស្រុកសាលាក្រៅ ដោយនៅឆ្នាំ២០២០នេះ ដំឡូងមីរបស់គាត់ទទួលបានទិន្នផលខ្ពស់ជាងឆ្នាំមុនៗ មិនសូវជាំទឹករលួយ ហើយរហូតមកដល់ដើមខែមីនានេះ គាត់ចាប់ផ្តើមប្រមូលផលជាបណ្តើរៗ ស្របពេលដែលប៉ុន្មានថ្ងៃមុននេះ មានភ្លៀងធ្លាក់១មេយ៉ាងធំទៀតគាត់ក៏បានជួលកម្មករបន្ថែមជាច្រើននាក់ឱ្យសម្រុកដកមើមដំឡូងមីទាំងអស់ ដើម្បីចាប់ផ្តើមភ្ជួរដីជាថ្មីក៏នឹងចាប់ផ្តើមដាំដំឡូងមីឆាប់ៗខាងមុខនេះដែរ ។
គាត់បន្តទៀតថា រហូតមកដល់ពេលនេះ ទីផ្សារដំឡូងមី គឺ១គីឡូក្រាម ឈ្មួញទិញថ្លៃ២បាត (ប្រាក់ថៃ) ជាតម្លៃដែលអាចទទួលយកបាន បើទាបជាងនេះ គឺពិតជាមិនរួចខ្លួននោះឡើយ ។ គាត់ក៏បានជួលកម្មករឱ្យកាប់ដើមដំឡូងមីចងបាច់ ក្នុង១បាច់ ឱ្យថ្លៃឈ្នួល២០០រៀល ហើយថ្លៃដកមើម ដំឡូងក្នុង១តោនឱ្យថ្លៃឈ្នួល២០០ ទៅ២៥០បាត (ប្រាក់ថៃ) ។ គាត់ក៏ជួលរថយន្តដឹកក្នុង១តោនគេយកថ្លៃឈ្នួល១២០បាត ដោយដឹកយកទៅលក់នៅតាមស្តង់នានា ក្នុងក្រុងប៉ៃលិន ។
ចំណែកកម្មករម្នាក់ឈ្មោះ ប៊ុន រ៉ា ភេទប្រុស អាយុ៣០ឆ្នាំ បានឱ្យដឹងដែរថា គាត់ដកដំឡូងមី គិតជាតោន ក្នុង១តោនទទួលបានប្រាក់២០០០០រៀល ទៅ២៥០០០រៀល បើដំឡូងមីមិនសូវល្អថ្លៃឈ្នួលកាន់តែថ្លៃ ព្រោះលំបាកក្នុងការប្រមូលផលដោយក្នុង១ថ្ងៃៗ គាត់ទទួលបានប្រាក់កម្រៃចាប់ពី៤០០០០រៀលទៅ៥០០០០រៀល រួមទាំងការប្រមូលមើមដំឡូងមីដាក់លើរថយន្តខាងលោកគិតថ្លៃផ្សេងបន្ថែមទៀត ។
លុះដល់ពេលប្រមូលផលនៅតាមចម្ការនីមួយៗអស់ហើយខាងលោកក៏នឹងទៅធ្វើការស៊ីឈ្នួលដាំដើមដំឡូងមីសារជាថ្មីឡើងវិញ ហើយក៏ដាំពោតពេលមានភ្លៀងធ្លាក់២ទៅ៣មេ រហូតដល់សើមដី ។ តែបើអត់មានភ្លៀងធ្លាក់ទេ គឺរង់ចាំរយ:ពេលយូរខាងលោកក៏នឹងទៅរកការងារផ្សេងធ្វើសិន ដើម្បីបានប្រាក់សម្រាប់ផ្គត់ផ្គង់ជីវភាពប្រចាំថ្ងៃ ៕ កែសម្រួលដោយ ៖ សុឃាក់
ចែករំលែកព័តមាននេះ