រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអំពាវនាវដល់មន្ត្រីនានា ត្រូវតែកាត់បន្ថយជាអតិបរមា ចំពោះអ្នករត់ការដើម្បីទទួលតំណែងនៅកន្លែងនីមួយៗ ព្រោះមន្ត្រីខ្លះបានដឹងច្បាស់ថាមន្ត្រីណានៅកន្លែងណាចូលនិវត្តន៍ ។ សម្តេចក្រឡាហោមបន្ថែមថា ដឹងច្បាស់ជាងសម្តេចទៅទៀត ។
ថ្លែងក្នុងពិធីអបអរសាទរទិវាអន្តរជាតិនារី ៨មីនា ខួបលើកទី១០៩ ក្រោមប្រធានបទ «មានសន្តិភាព មានការលើកកម្ពស់សមភាពយេនឌ័រ»នៅទីស្ដីការក្រសួងមហាផ្ទៃ កាលពីថ្ងៃទី១១ ខែមីនា ឆ្នាំ២០២០ សម្ដេចក្រឡាហោម ស ខេងបានបញ្ជាក់ថា ភាគីពាក់ព័ន្ធទាំងអស់ត្រូវយកចិត្តទុកដាក់ខ្ពស់ទៅដល់ការអភិវឌ្ឍសមត្ថភាពធនធានមនុស្សជាស្ដ្រីឲ្យបានច្រើន ដើម្បីត្រៀមលក្ខណៈទទួលតំណែងទៅតាមតួនាទីមុខជំនាញ រៀងៗខ្លួន ។
សម្ដេចក្រឡាហោម ថ្លែងថា៖ «ចង់រកមនុស្សធ្វើជាអនុប្រធាននាយករដ្ឋាន ធ្វើជាប្រធាននាយកដ្ឋានអគ្គនាយករង អគ្គនាយក យើងត្រូវមានប្រភព ហើយយើងត្រូវកាត់បន្ថយឲ្យបានជាអតិបរមា អ្នករត់ការដើម្បីនឹងស៊កសៀតតំណែង តួនាទីកន្លែងនីមួយៗ ព្រោះពូកែណាស់ មន្ដ្រីយើងមួយចំនួន ពូកែដឹងថានរណាចូលនិវត្តន៍ ដឹងតាំងពីថ្ងៃ ខែ ដឹងមែនទែន ដឹងជាងយើង រួចហើយទៅសុំកន្លែងហ្នុងព្រោះកន្លែងហ្នុង
ត្រូវចូលនិវត្តន៍» ។
សម្ដេចក្រឡាហោមបន្ដថា ការតែងតាំងមន្ដ្រីជាអភិបាលខេត្ត អភិបាលរងខេត្ត អភិបាល ស្រុកអភិ បាល រងស្រុក ច្បាប់បានចែងថា ការតែងតាំងមន្ដ្រីត្រូវមានក្របខណ្ឌ បទពិសោធន៍ សមត្ថភាព និងអាយុសម្រាប់មន្ត្រីមានសមត្ថភាពសម្តេចឲ្យតម្លៃណាស់ សម្រាប់មន្ដ្រីណាឆ្លងកាត់ធ្វើការងារជាមួយប្រជាពល
រដ្ឋដឹងសុខទុក្ខរបស់ពួកគាត់ ពីព្រោះមន្ដ្រីត្រូវបម្រើជាតិនិងពលរដ្ឋ។
សម្តេចក្រឡាហោមបន្តថា ចំណុចនេះត្រូវតែមានការគោរពទាំងអស់គ្នា មិនថាតែក្រសួងមហាផ្ទៃនោះទេ ។ កន្លងមកនេះ មានមន្ត្រីមួយចំនួនដែលចង់បានឡើងធំ ឬកាន់តំណែងនៅទីណាមួយ បានរត់ការដោយខ្លួនឯង និងមានការអន្តរាគមន៍ថាជាក្មួយ ជាកូន អ្នករៀនវគ្គ ជាមួយគ្នាជាដើម សុំជួយផង ។ សម្តេចក្រឡាហោមបានលើកឡើងថា សម្រាប់សម្តេចឲ្យតម្លៃចំពោះមន្ត្រីនៅជាមួយពលរដ្ឋ ដឹងសុខទុក្ខរបស់ប្រជាពលរដ្ឋច្រើន ប៉ុន្តែក៏មានមន្ត្រីខ្លះក៏មិនមានបទពិសោធន៍ក៏អាចធ្វើ បានដែរ ។
សម្តេចក្រឡាហោមថ្លែងថា ៖ «សម្រាប់ខ្ញុំឲ្យតម្លៃចំពោះមន្ត្រីនោះច្រើន ព្រោះថានៅពេលយើងតែងតាំង មន្ត្រីនោះអាចដឹងអំពីជីវភាព ការលំបាករបស់ប្រជាពលរដ្ឋ ។ អាហ្នឹងយើងឲ្យតម្លៃ មិនខុស ប៉ុន្តែមិនទាំងអស់នោះទេ ពេលខ្លះក៏មានមន្ត្រីយើងធ្វើបានដែរ» ៕
ចែករំលែកព័តមាននេះ