រាជធានីភ្នំពេញ ៖តារាចម្រៀងសុខ ពិសី បានជួយសង្គ្រោះសត្វឆ្កែមួយទ្រុង ចេញពីឈ្មួញម្នាក់ និងបានអំពាវនាវស្វែងរកអ្នកដែលចង់យកទៅចិញ្ចឹមដោយការស្រឡាញ់ពីបេះដូង ចៀសវាងការយកទៅធ្វើម្ហូប ដ្បិតនាងចាត់ទុកសត្វនេះគឺជាសត្វដែលស្មោះត្រង់បំផុតជាមួយម្ចាស់ ។ ការអំពាវនាវរបស់ពិសីបានបន្ទាប់ពីនាងទិញសត្វឆ្កែមួយទ្រុងដែលមានចំនួន៨ក្បាល…
រាជធានីភ្នំពេញ ៖តារាចម្រៀងសុខ ពិសី បានជួយសង្គ្រោះសត្វឆ្កែមួយទ្រុង ចេញពីឈ្មួញម្នាក់ និងបានអំពាវនាវស្វែងរកអ្នកដែលចង់យកទៅចិញ្ចឹមដោយការស្រឡាញ់ពីបេះដូង ចៀសវាងការយកទៅធ្វើម្ហូប ដ្បិតនាងចាត់ទុកសត្វនេះគឺជាសត្វដែលស្មោះត្រង់បំផុតជាមួយម្ចាស់ ។
ការអំពាវនាវរបស់ពិសីបានបន្ទាប់ពីនាងទិញសត្វឆ្កែមួយទ្រុងដែលមានចំនួន៨ក្បាល ពីឈ្មួញមួយរូបដែលបម្រុងដឹកយកទៅលក់ឲ្យអ្នកធ្វើម្ហូប នៅតាមដងផ្លូវមួយដែលនាងទើបតែវិលត្រឡប់ពីការសម្តែងតន្ត្រីមួយនៅខេត្តកំពង់ធំកាលពីថ្ងៃទី៩ ខែមីនា ឆ្នាំ២០២០។ តាមរយៈវីដេអូដែលសុខ ពិសី បានបង្ហោះនោះបានឲ្យដឹងថា នាងបានជួយសង្គ្រោះសត្វឆ្កែមួយទ្រុងពីឈ្មួញដែលបានដឹកយកទៅធ្វើម្ហូប ក្នុងពេលដែលនាងបានធ្វើដំណើរតាមដងផ្លូវ វិលត្រឡប់ពីការច្រៀងនៅខេត្តកំពង់ធំ ដោយការទិញទាំងអស់ពីឈ្មួញនោះវិញ ។
នាងបញ្ជាក់ថា ក្រោយពីទិញពីឈ្មួញនេះនាងសង្ឃឹមថា ពួកគេនឹងរួចផុតពីទុក្ខភ័យ ដោយសារពួកវាជាសត្វដែលគួរឲ្យស្រឡាញ់ ការពារ និងមានភាពស្មោះត្រង់ជាមួយម្ចាស់ខ្លាំង ហើយនាងសូមសុំណូមពរឲ្យទាំងអស់គ្នាចូលរួមធ្វើអំពើល្អ ដើម្បីទទួលបានសេចក្តីសុខទាំងអស់គ្នា ។
បើតាមសុខ ពិសី សត្វសុនខទាំងអស់នេះនាងបានបើកទទួលចំពោះអ្នកដែរចង់យកទៅចិញ្ចឹម ដោយបេះដូងស្រឡាញ់សត្វដូចជារូបនាង បើទោះបីពួកវាមិនមែនជាឆ្កែប្រេន តែពួកវាស្លូត និងគួរឲ្យស្រលាញ់ណាស់ ហើយពួកវាត្រូវការពួកយើងទាំងអស់គ្នាសង្គ្រោះ ដោយការស្រលាញ់ពួកវាពិត និងចិញ្ចឹមពួកគេដោយក្តីអាណិតមេត្តា ។
សុខ ពិសី បានអំពាវនាវផងដែរ ឲ្យមានការរួមគ្នាដើម្បីបញ្ឈប់ការជួញដូរ និងការបរិភោគសាច់ឆ្កែ ខណៈពេលវាជាសត្វស្មោះត្រង់ និងស្រលាញ់ម្ចាស់ណាស់ ។
ក្រោយពេលដែលសុខ ពិសី បានបង្ហោះរូបភាពសត្វឆ្កែ និងស្វែងរកអ្នកដែលមានបំណងយកទៅចិញ្ចឹមនោះរួចមក គេសង្កេតឃើញមានមនុស្សម្នាជាច្រើនបានផ្ញើសារស្នើសុំយកទៅចិញ្ចឹម និងសម្តែងការកោតសរសើរផងនូវសកម្មភាពរបស់នាងនាពេលនេះផងដែរ។ ចំណុចនេះសុខ ពិធី បានអះអាងថា «ខ្ញុំពិតជារំភើបណាស់ពេលឃើញឆ្កែដែលខ្ញុំបានទិញពីឈ្មួញដែលបម្រុងយកទៅសម្លាប់មានបងប្អូនចិត្តបុណ្យយកទៅមើលថែ ។ រួមគ្នាដើម្បីបញ្ឈប់ការជួញដូរ និងបរិភោគសាច់ឆ្កែទៅព្រោះពួកគេជាសត្វស្មោះត្រង់ និងស្រលាញ់ម្ចាស់ណាស់»។
លោកខេមរៈ សិរីមន្ត បានចេញមុខអំពាវនាវយ៉ាងទទូចដល់មហាជនគ្រប់ស្រទាប់វ័យដែលចូលចិត្តបរិភោគសាច់ឆ្កែឲ្យបញ្ឈប់ទាំងអស់គ្នា ខណៈដែលលោកបានចិញ្ចឹមឆ្កែកម្សត់ជាច្រើនក្បាលដែលមេរបស់វា ត្រូវបានចោរលួចទាក់យកទៅលក់ ។
សុខ ពិសី គឺជាតារាទី២ បន្ទាប់ពីលោកខេមរៈ សិរីមន្ត ដែលបានស្នើសុំ និង អំពាវនាវឲ្យមហាជនបញ្ឈប់ការបរិភោគសាច់ឆ្កែ ។ កាលពីពេលកន្លងទៅលោកខេមរៈសិរីមន្ត បានរៀបរាប់នៅក្នុងវីដេអូឃ្លីបមួយថា ថ្ងៃនេះលោកសុំបង្ហាញសត្វឆ្កែទាំង៦ក្បាល ដែលកំព្រាមេ(ម្តាយ) ខណៈដែលមេរបស់វាត្រូវបានក្រុមចោរលួចទាក់កយកទៅធ្វើម្ហូបអាហារបាត់ កាលពីអំឡុងរយៈពេល២សប្ដាហ៍មុន ។ ហេតុនេះទើបធ្វើឲ្យពួកវា (ឆ្កែ) ដែលមានអាយុ១ខែមានការអាឡោះអាល័យនឹកមេរបស់វាដេកយំរាល់ថ្ងៃ ។
លោកខេមរៈ សិរីមន្ត បានបន្តថា ឃើញបែបនេះលោកពិតជាមានចិត្តសង្វេគខ្លាំងណាស់ ដូច្នេះស្នើសុំចិត្តទាំងអស់ ដែលចូលចិត្តពិសាសាច់ឆ្កែត្រូវរួមគ្នាបញ្ឈប់ការបរិភោគទាំងអស់គ្នា ថ្វីដ្បិតតែគាត់ជាសត្វតែក៏មានអារម្មណ៍ និងចិត្តដូចមនុស្សដែរ គ្រាន់តែនិយាយមិនកើតប៉ុណ្ណោះ។
លោកខេមរៈ សិរីមន្ត បានលើកឡើងថា «ខ្ញុំសូមអំពាវនាវដល់ប្រជាពលរដ្ឋទាំងអស់ដែលចូលចិត្តពិសាសាច់ឆ្កែ ឬអ្នកដែលប្រកបរបរលក់សាច់ឆ្កែត្រូវរួមគ្នាកែប្រែ និងបញ្ឈប់ទាំងអស់គ្នាដើម្បីឲ្យពួកគាត់(ឆ្កែ)មានសុវត្ថិភាពហើយមានសេចក្តីសុខដូចមនុស្សដែរ»៕ (កែសម្រួលដោយ ៖ បុប្ផា)
ចែករំលែកព័តមាននេះ