ប្រទេសរុស្ស៊ី ៖ ប្រធានាធិបតីរុស្ស៊ីលោកវ្ល៉ាឌីមៀរពូទីន កាលពីថ្ងៃទី១០មីនាបានបើកផ្លូវ ទៅរកការរក្សាអំណាចរបស់លោក ក្រោយការចប់អាណត្តិបច្ចុប្បន្ន ក្នុងក្របខណ្ឌនៃការសើរើរដ្ឋធម្មនុញ្ញដ៏ទូលំទូលាយមួយ ដែលសភាបានអនុម័ត។
ឆ្លើយតបក្នុងសភាចំពោះសំណើរបស់សមាជិកាសភាមួយរូប ជាអតីតអវកាសយានិក លោកពូទីនអះអាងថា លោកយល់ស្របតាមគំនិតនៃការសើរើឡើងវិញ ចំនួនអាណត្តិប្រធានាធិបតីរបស់លោក ក្នុងឱកាសនៃការកែទម្រង់រដ្ឋធម្មនុញ្ញ ដើម្បីអាចឲ្យលោកចូលរួមក្នុងការបោះឆ្នោតឆ្នាំ២០២៤ខាងមុខនេះ។ លោកអះអាងថា លោកចង់ឲ្យតុលាការធម្មនុញ្ញអនុញ្ញាតជាដំបូងការកែប្រែនិងថា ពលរដ្ឋរុស្ស៊ី នឹងធ្វើការអនុម័ត ក្នុងឱកាសនៃការបោះប្រជាមតិដែលគ្រោងធ្វើនាថ្ងៃទី២២មេសាខាងមុខនេះ។
ប៉ុន្មានម៉ោងបន្ទាប់ពីបទអន្តរាគមន៍នេះ របស់លោកពូទីន អភិបាលក្រុងមូស្គូបានហាមឃាត់ការប្រមូលផ្ដុំមនុស្សលើសពី៥.០០០នាក់ រហូតដល់ថៃ្ងទី១០មេសា ដោយលើកហេតុផលផ្លូវការ ពីការតស៊ូប្រឆាំងការឆ្លងរាលដាលនៃវីរុសCOVID-19។
លោកពូទីនបច្ចុប្បន្នពុំមានសិទ្ធិឈរឆ្មោះជាបេក្ខជនប្រធានាធិបតីក្នុងឆ្នាំ២០២៤ឡើយ ព្រោះរដ្ឋធម្មនុញ្ញ កម្រិតអាណត្តិប្រធានាធិបតីត្រឹម២អាណត្តិជាប់គ្នា។ តែនាថ្ងៃទី១០មីនាលោកពូទីនអាយុ៦៧ឆ្នាំថ្លែងថា អំណាចប្រធានាធិបតីដែលខ្លាំង ពិតជាចាំបាច់ណាស់សម្រាប់រុស្ស៊ីដោយលោកយល់ថា ស្ថេរភាពត្រូវតែជាអាទិភាព៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ