រាជធានីភ្នំពេញ ៖ បើទោះបីជាកម្មវិធី រ៉ូដសូ ឬហៅថា កម្មវិធីបង្ហាញព័ត៌មានលម្អិតរបស់ ធនាគារ អេស៊ីលីដា ត្រូវបានបញ្ចប់ តែសាធារណជនដែលមានចម្ងល់ ឬបញ្ហាអ្វីមួយមិនទាន់ ច្បាស់ពីនីតិវិធី ការទិញមូលបត្រកម្មសិទ្ធិជាសាធារណៈរបស់ ធនាគារ អេស៊ីលីដា នៅតែអាច សួរនាំមកកាន់ការិយាល័យ ធនាគារ អេស៊ីលីដា បានផងដែរ មិនមែនបិទបញ្ចប់ការសួរត្រឹម បញ្ចប់កម្មវិធី រ៉ូដសូ នេះឡើយ ។
បើតាមលោក ស៊ូ សុជាតិ អគ្គនាយកគណៈកម្មការមូលបត្រកម្ពុជាថ្លែងនៅក្នុងសន្និសីទ ក្រោយបញ្ចប់កម្មវិធី រ៉ូដសូ លើកទី២ របស់ ធនាគារ អេស៊ីលីដា កាលពីល្ងាចថ្ងៃទី ១០ ខែមីនា ឆ្នាំ២០២០ ថា តាមរយៈការរៀបចំកម្មវិធី រ៉ូដសូ ពីរដងរួចមកហើយនេះ វាមិនទាន់ គ្រប់គ្រាន់សម្រាប់សាធារណជននោះទេ ហើយបើមានកម្មវិធីក្រោយៗទៀត សាធារណជន នៅតែចូលរួម និងចង់ស្ដាប់នូវការបង្ហាញរបស់អ្នកជំនាញ មុននឹង ធនាគារ អេស៊ីលីដា បោះ ផ្សាយលក់មូលបត្រជាផ្លូវការនៅក្នុងផ្សារមូលបត្រកម្ពុជា ។ តែដោយសារតែ ធនាគារ អេស៊ីលីដា ស្នើសុំរៀបចំកម្មវិធី រ៉ូដសូ តែពីរដង ដូច្នេះគណៈកម្មការមូលបត្រក៏យល់ព្រម ។ ប៉ុន្តែសាធារណជននៅតែអាចមកសួរនាំនូវព័ត៌មានបន្ថែមពី ធនាគារ អេស៊ីលីដា បានផងដែរ មិនមែនបិទបញ្ចប់ការផ្ដល់ព័ត៌មានត្រឹមនេះទេ ។
លោកបន្តទៀតថា តាមពិតទៅការផ្ដល់ព័ត៌មានទៅសាធារណជនទាំងអស់ មិនមែនមានតែថ្ងៃ ធ្វើ រ៉ូដសូ នោះទេ គឺបានផ្ដល់ព័ត៌មានតាំងពីថ្ងៃចាប់ផ្ដើមប្រកាសបោះផ្សាយម្ល៉េះ ក៏ប៉ុន្តែ សម្រាប់កម្មវិធី រ៉ូដសូ គឺជាថ្ងៃដែលពិសេស ដែលសាធារណជនអាចសួរដេញដោលគ្នាបាន ។ ម្យ៉ាងទៀត ទោះបីកម្មវិធីនេះបានបញ្ចប់ តែសាធារណជននៅតែអាចមកសួរព័ត៌មានបន្ថែម បានក្នុងករណីមិនទាន់យល់ច្បាស់ ។
លោកបន្តថា នៅក្នុងព្រឹត្តិការណ៍បង្ហាញព័ត៌មានលម្អិតនេះដែរ សាធារណជនក៏អាចចូលរួម ប៊ុកបៀលឌីង ឬអាចដេញថ្លៃបណ្ដើរៗបានផងដែរ ហើយបន្តបន្ទាប់ទៀត ធនាគារ អេស៊ីលីដា នឹងប្រកាសលក់ជាផ្លូវការនៅថ្ងៃណាមួយដែលកំណត់ដោយគណៈកម្មការមូលបត្រកម្ពុជា ។
លោក ស៊ូ សុជាតិ បានមានប្រសាសន៍ថា នៅក្នុងកាលៈទេសៈដ៏លំបាក ដោយសារតែបញ្ហា ប្រឈមនៃវីរុស កូរ៉ូណា នេះ ផលប៉ះពាល់ទៅលើវិស័យមូលបត្រពិតជាមាន ក៏ប៉ុន្តែវាមិនអាច រារាំងដល់វិនិយោគិន មិនអោយវិនិយោគនោះទេ ពោលវិនិយោគិននៅតែដាក់ទុនវិនិយោគ ហើយការវិនិយោគជាមួយក្រុមហ៊ុនដែលមានហិរញ្ញវត្ថុរឹងមាំ គឺជាឱកាសរបស់វិនិយោគ និង មិនគួរអោយឱកាសនេះរំលងហួសឡើយ ។
លោកបណ្ឌិត អុិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមាន ប្រសាសន៍ថា បើទោះបីជាស្ថានភាពបែបណា ក៏ដំណើរការនៃការបោះផ្សាយលក់មូលបត្រ កម្មសិទ្ធិសាធារណរបស់ ធនាគារ អេស៊ីលីដា នៅក្នុងផ្សារមូលបត្រកម្ពុជានៅតែប្រព្រឹត្តិទៅ ដដែល និងទៅតាមគម្រោងផែនការដែលបានគ្រោងទុកដដែល ។
លោកបន្តថា នៅក្នុងស្ថានភាពបែបនេះ ក៏ជាឱកាសមួយផងដែរ សម្រាប់ការអភិវឌ្ឍវិស័យ ហិរញ្ញវត្ថុតាមប្រព័ន្ធឌីជីថល ជាក់ស្ដែងកាលពីពេលផ្ទុះជំងឺសានៅប្រទេសចិន កាលនោះមិន ទាន់មានការប្រើប្រាស់ទូលំទូលាយនូវប្រព័ន្ធទូទាត់តាមវីឆាត ( We Chat ) នៅឡើយ ក៏ប៉ុន្តែ ស្រាប់តែមានផ្ទុះជំងឺសា ប្រព័ន្ធទូទាត់នេះបានប្រើទូលំទូលាយនៅប្រទេសចិន ។ ដូចគ្នានេះ ដែរ ក្នុងពេលផ្ទុះជំងឺកូវីដ-១៩ ពលរដ្ឋមួយចំនួនធំខ្លាចឆ្លងលែងចង់ប៉ះពាល់វត្ថុដែលមិនមែន ជាប់ខ្លួន ។ ម្យ៉ាងទៀតយោងតាមវិជ្ជសាស្ត្រ ក្រដាសប្រាក់ក៏ជាភ្នាក់ងារចម្លងមួយផងដែរ ព្រោះត្រូវកាន់ពីមនុស្សម្នាក់ទៅមនុស្សម្នាក់ទៀតជាបន្តបន្ទាប់ ដូច្នេះបើសិនជាពួកយើងនាំគ្នាទូទាត់តាមប្រព័ន្ធឌីជីថលដូចជាតាម Apps របស់ អេស៊ីលីដា ទាន់ចិត្ត ជាដើមនោះ លោកអ្នកមិនចាំបាច់កាន់ក្រដាសប្រាក់ ហើយក៏មិនចាំបាច់ភ័យខ្លាចឆ្លង តាមរយៈក្រដាសប្រាក់នេះដែរ ។
គួរបញ្ជាក់ថា ធនាគារ អេស៊ីលីដា គឺជាធនាគារដំបូងគេដែលទទួលបានការអនុញ្ញាតអោយ បោះផ្សាយលក់មូលបត្រកម្មសិទ្ធិជាសាធារណនៅក្នុងផ្សារមូលបត្រកម្ពុជា ហើយក៏មានការ ចាប់អារម្មណ៍ពីសាធារណជនច្រើនផងដែរ ដោយសារតែធនាគារនេះមានការរីកចម្រើនលូត លាស់គួរអោយកត់សម្គាល់ និងឈានដល់ការបង្កើតសាខាការិយាល័យនៅក្រៅប្រទេសដូច ជា ធនាគារ អេស៊ីលីដា ឡាវ និងមីក្រូហិរញ្ញវត្ថុមីយ៉ាន់ម៉ា ជាដើម ៕ (កែសម្រួលដោយ ៖ បុប្ផា)
ចែករំលែកព័តមាននេះ