ក្រុងប៉េតាំង ៖ ប្រទេសចិន នៅថ្ងៃពុធទី១១ មីនា ២០២០នេះ បានបញ្ជូនក្រុមវេជ្ជសាស្ត្រចិន អ្នកជំនាញប្រឆាំងនឹងរោគរាតត្បាត ទៅកាន់ប្រទេសអ៊ីតាលី ដើម្បីជួយប្រយុទ្ធប្រឆាំងនឹងការរីករាលដាល នៃជំងឺនេះ និងនាំយកជំនួយមនុស្សធម៌ ដើម្បីជួយដល់ប្រទេសអ៊ីតាលី ផងដែរ ក្នុងពេលប្រយុទ្ធប្រឆាំងនឹងវីរុសកូវីដ-១៩ ឫ COVID-19 ។
បើតាមសារព័ត៌មាន CGTV របស់រដ្ឋចិន អោយដឹងថា ក្រុមអ្នកជំនាញខាងលើនេះ ដឹកនាំដោយ អនុប្រធានសមាគមកាកបាទក្រហមចិន និងជាអ្នកជំនាញមកពីមជ្ឈមណ្ឌលចិន សម្រាប់ការគ្របគ្រង និងការពារជំងឺឆ្លង ។ អ្នកជំនាញ៥នាក់ទៀត មកពីខេត្តស៊ីឈួន ក៏ត្រូវបានអនុញ្ញាតឲ្យចូលរួមផងដែរ ។
ត្រឹមរសៀលថ្ងៃទី១១ មីនានេះ ទូទាំងប្រទេសអ៊ីតាលី មានចំនួនអ្នកឆ្លងសរុបបានកើនដល់ ១០,១៤៩ ករណីហើយ ចំណែកឯ អ្នកស្លាប់មាន ៦៣១នាក់, ជាសះស្បើយ ១.០០៤នាក់, កំពុងព្យាបាល ៨.៥១៤នាក់ ក្នុងនោះធ្ងន់ធ្ងរ ៨៧៧នាក់ ៕
ចែករំលែកព័តមាននេះ