ខណៈដែលរដ្ឋាភិបាលសហរដ្ឋអាមេរិកកំពុងជួបការលំបាកក្នុងការឆ្លើយតបនឹងការរាតត្បាតនៃវីរុ កូវីដ-១៩ (COVID-19) មហាសេដ្ឋីក្នុងវិស័យបច្ចេកវិទ្យាចេញមុខភ្លាមៗដើម្បីគាំទ្រពីក្រោយ ។
លោកមហាសេដ្ឋី ម៉ាក ហ្សាក់កាបឺក (Mark Zuckerberg) ដែលជាស្ថាបនិក និងនាយកប្រតិបត្តិរបស់ Facebook ព្រមទាំងលោក ប៊ីល ហ្គេតស៍ (Bill Gates) ដែលជាសហស្ថាបនិករបស់ Microsoft បានប្រកាសថា ពួកគេនឹងព្យាយាមពង្រីកការធ្វើតេស្តរកវីរុសខាងលើក្នុងតំបន់ឲ្យបានកាន់តែច្រើន ខណៈដែលសហរដ្ឋអាមេរិកមើលឃើញចំនួនមនុស្សដែលមានផ្ទុកមេរោគនេះកើនឡើងច្រើនជាង ៧០០ករណីទៅទៀត និងបណ្តាឲ្យមនុស្សយ៉ាងតិចចំនួន ២៦នាក់បាត់បង់ជីវិត ។
កាលពីថ្ងៃអង្គារ៍មកមក ការផ្តួចផ្តើម Chan Zuckerberg Initiative និងក្រុមហ៊ុន CZI Biohub ដែលស្ថិតក្រោមការគ្រប់គ្រងរបស់មូលនិធិសប្បុរសធម៌របស់លោក ហ្សាក់កាបឺក បានប្រកាសថាពួកគេនឹងទិញម៉ាស៊ីនធ្វើតេស្តចំនួនពីរទៀតដើម្បីបង្កើនសមត្ថភាពក្នុងការធ្វើតេស្ត និងវាយតម្លៃឲ្យបានបួនដង ។ ជាមួយគ្នានេះដែរ មូលនិធិសប្បុរសធម៌ Bill and Melinda Gates Foundation បាននិយាយក្នុងសប្តាហ៍នេះថាពួកគេនឹងផ្តល់ជាឧបករណ៍ក្នុងការធ្វើតេសរបស់ខ្លួនដល់ប្រជាជនដែលរស់នៅក្នុងតំបន់ Seattle ដើម្បីឲ្យពួកគេប្រើប្រាស់ដោយខ្លួនឯងនៅផ្ទះ និងផ្ញើវាឲ្យទៅកន្លែងធ្វើការវាយតម្លៃ ។
ប៉ុន្តែអំពើសប្បុរសធម៌ដែលចេញពីមហាសេដ្ឋីធំៗទាំងពីរខាងលើភាគច្រើនទទួលបានការរិះគន់យ៉ាងខ្លាំងផងដែរ ។ ការរិះគន់ គឺមិនមែនកើតចេញមកពីការចោទប្រកាន់ថាការប្តេជ្ញាទាំងនេះមិនជួយដល់មនុស្សទេ តែគឺទាក់ទិននឹងការដែលមហាសេដ្ឋីខាងលើអាចប្រើអំពើសប្បុរសធម៌ដើម្បីធ្វើជាឧបករណ៍មួយក្នុងការជះឥទ្ធិពលដល់គោលនយោបាយសាធារណៈ ហើយវាគួរជាតួនាទីរបស់រដ្ឋាភិបាល មិនមែនមហាសេដ្ឋីទេក្នុងការដោះស្រាយបញ្ហាដែលប្រជាជនភាគជ្រើនជួបប្រទះ ។
យោងទៅតាមការអះអាងរបស់មហាសេដ្ឋីខាងលើ ពួកគេបាននិយាយថាសកម្មភាពទាំងនេះ គឺគ្រាន់តែជួយបំពេញនូវចំណុចខ្វះខាតដែលរដ្ឋាភិបាលកំពុងតែជួបប្រទះប៉ុណ្ណោះ ហើយរដ្ឋាភិបាលអាមេរិកកំពុងតែបរាជ័យក្នុងការពង្រឹងការឆ្លើយតបរបស់ខ្លួនទៅនឹងវីរុសខាងលើពិតមែន ៕ កែសម្រួលដោយ ៖ សុឃាក់
ចែករំលែកព័តមាននេះ