ខេត្តក្រចេះ ៖ សិស្សានុសិស្សយ៉ាងហោច១៣នាក់ រៀននៅកំរិតថ្នាក់អនុវិទ្យាល័យ និងបឋមសិក្សានៅសាលាពោធិ៍គាត ឈន់ ស្ថិតនៅក្នុងស្រុកឆ្លូង បានដួលសន្លប់ជាបន្តបន្ទាប់គ្នា និងត្រូវបានចាត់មកសង្គ្រោះនៅមន្ទីរពេទ្យឆ្លូងព្រឹកថ្ងៃទី១១ …
ខេត្តក្រចេះ ៖ សិស្សានុសិស្សយ៉ាងហោច១៣នាក់ រៀននៅកំរិតថ្នាក់អនុវិទ្យាល័យ និងបឋមសិក្សានៅសាលាពោធិ៍គាត ឈន់ ស្ថិតនៅក្នុងស្រុកឆ្លូង បានដួលសន្លប់ជាបន្តបន្ទាប់គ្នា និងត្រូវបានចាត់មកសង្គ្រោះនៅមន្ទីរពេទ្យឆ្លូងព្រឹកថ្ងៃទី១១ មីនា ២០២០ នេះ ។ ក្រោយការជួយសង្គ្រោះពីសំណាក់ក្រុមគ្រូពេទ្យមានរយៈពេលមួយព្រឹកនេះ ស្ថានភាពអាការៈរបស់ពួកគេទាំង១៣នាក់បានធូរស្រាល ដោយមិនមានប៉ះពាល់ធ្ងន់ធ្ងរដល់អាយុជីវិតនោះទេ ។ នេះបើតាមការបញ្ជាក់ពីនគរបាលស្រុកឆ្លូង។
អធិការនគរបាលស្រុកឆ្លូងលោកវរសេនីយ៍ឯក ឆុង តូរ៉ាន់ បានប្រាប់ឲ្យដឹងថា សិស្សានុសិស្សទាំង១៣នាក់ ត្រូវបានបញ្ជូនតាមរថយន្តសង្គ្រោះរបស់អធិការដ្ឋាន និងឡានមន្ទីរពេទ្យ នាំមកសង្គ្រោះភ្លាមៗនៅនិងពេទ្យបង្អែកស្រុក ក្រោយពីពួកគេបានកើតមានអាការៈដួលសន្លប់ជាបន្តបន្ទាប់គ្នា ។ លោកឱ្យដឹងទៀតថា ពួកគេទាំង១៣នាក់ ជាសិស្សរៀននៅសាលាអនុវិទ្យា ល័យជាមួយគ្នា តែកំរិតខុសគ្នា ដោយខ្លះរៀននៅកំរិតអនុវិទ្យាល័យ ខ្លះកំរិតបឋមសិក្សា។
លោកបន្តថា អាជ្ញាធរនៅមិនទាន់កំណត់ពីមូលដ្ឋានឱ្យបានច្បាស់នៅឡើយទេថា ការដួលសន្លប់របស់សិស្សជាបន្តបន្ទាប់គ្នានេះ បណ្តាលមកពីមូលហេតុអ្វី ។ តែលោកអធិការបាន សម្រង់ចម្លើយរបស់លោកគ្រូអ្នកគ្រូបង្រៀននៅសាលានោះថា មុនពេលកើតហេតុ គឺមានសិស្សម្នាក់បានរើសយកថ្មទូរស័ព្ទចាស់មួយ មកកាច់លេង ។ ហើយក៏មានផ្សែងហុយចេញពីថ្មទូរស័ព្ទនោះ។
ឃើញបែបនោះ សិស្សនោះក៏បានបោះថ្មទូរស័ព្ទនោះចេញពីសាលាមកដីថ្ម នោះក៏ផ្ទុះបន្ទាប់មកក៏មានសិស្សសាលាដួលសន្លប់ជាបន្តបន្ទាប់។ លោកគ្រូអ្នកគ្រូសន្និដ្ឋានថា ការសន្លប់មកពីពីពួកគេមានសុខភាពខ្សោយដោយសារពួក គេភ័យនិងការផ្ទុះរបស់ថ្មទូរស័ព្ទ ។
ចែករំលែកព័តមាននេះ