រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃបានអំពាវនាវដល់ភាគីពាក់ព័ន្ធត្រូវកាត់បន្ថយជាអតិបរមា ចំពោះអ្នករត់ការ ដើម្បីទទួលតំណែងនៅកន្លែងនីមួយៗ ព្រោះមន្ត្រីខ្លះបានដឹងច្បាស់មន្ត្រីណានៅកន្លែងណា ចូលនិវត្តន៍ច្បាស់ជាងសម្តេចទៀត ។ ថ្លែងក្នុងពិធីអបអរសាទរទិវាអន្តរជាតិនារី ៨មីនា ខួបលើកទី១០៩ ឆ្នាំ២០២០ ក្រោមប្រធានបទ «មានសន្តិភាព មានការលើកកម្ពស់សមភាពយេនឌ័រ» នៅទីស្ដីការក្រសួងមហាផ្ទៃ នាថ្ងៃទី១១ ខែមីនា ។
សម្ដេច ស ខេង បានបញ្ជាក់យ៉ាងដូច្នេះថា ភាគីពាក់ព័ន្ធទាំងអស់ត្រូវយកចិត្តទុកដាក់ខ្ពស់ទៅដល់ការអភិវឌ្ឍសមត្ថភាពធនធានមនុស្សជាស្ដ្រីឲ្យបានច្រើន ដើម្បីត្រៀមលក្ខណៈទទួលតំណែងទៅតាមតួនាទីមុខជំនាញរៀងៗខ្លួន ។ សម្ដេចបានគូសបញ្ជាក់ថា ៖ «ចង់រកមនុស្សធ្វើជាអនុប្រធាននាយករដ្ឋានធ្វើជាប្រធាននាយកដ្ឋានអគ្គនាយករង អគ្គនាយក អាហ្នឹងយើងត្រូវមានប្រភព ហើយយើងត្រូវកាត់បន្ថយឲ្យបានជាអតិបរមារត់ការ ដើម្បីនឹងស៊ូកសៀតតំណែង តួនាទី កន្លែងនីមួយៗ ។ ព្រោះពូកែណាស់ មន្ដ្រីយើងមួយចំនួន ពូកែដឹងថា នរណាចូលនិវត្តន៍ដឹងតាំងពីថ្ងៃខែដឹងមែនទែនដឹងជាងយើង រួចហើយទៅសុំកន្លែងណុង ព្រោះកន្លែងណុងចូលនិវត្តន៍» ។
សម្ដេចក្រឡាហោមបានបន្ដថា ការតែងតាំងមន្ដ្រីជាអភិបាលខេត្ត អភិបាលរង អភិបាលស្រុក អភិបាលរងស្រុក ច្បាប់បានចែកថា ការតែងតាំងមន្ដ្រីត្រូវមានក្របខណ្ឌបទពិសោធន៍សមត្ថភាព និងអាយុ ។ បន្ថែមពីនេះសម្ដេចឲ្យតម្លៃណាស់សម្រាប់មន្ដ្រីណាឆ្លងកាត់ធ្វើការងារជាមួយប្រជាពលរដ្ឋ ដើម្បីដឹងសុខទុករបស់ពួកគាត់ ពីព្រោះមន្ដ្រីត្រូវបម្រើជាតិ និងពលរដ្ឋ ។
សម្តេចបន្តថា ចំណុចនេះត្រូវតែមានការគោរពទាំងអស់គ្នាមិនចាំតែក្រសួងមហាផ្ទៃនោះទេ ។ កន្លងមកនេះមានមន្ត្រីមួយចំនួនដែលចង់បានឡើងធំ ឬកាន់ដំណែងនៅទីណាមួយបានរត់ការដោយខ្លួនឯង និងមានការអន្តរាគមន៍ថា ជាក្មួយ ជាកូន អ្នកមាន ជាមួយគ្នាជាដើម សុំឯកឧត្តមជួយផង ។ សម្តេចបានលើកឡើងថាសម្រាប់សម្តេចឲ្យតម្លៃចំពោះមន្ត្រីនៅជាមួយប្រជាពលរដ្ឋ ដឹងសុខទុក្ខរបស់ប្រជាពលរដ្ឋច្រើន ប៉ុន្តែក៏មានមន្ត្រីខ្លះក៏មិនបានមានបទពិសោធន៍ក៏អាចធ្វើបានដែរ ។ សម្តេចថា ៖«សម្រាប់ខ្ញុំឲ្យតម្លៃចំពោះមន្ត្រីនោះច្រើន ព្រោះថានៅពេលយើងតែងតាំងមន្ត្រីនោះអាចដឹងអំពីជីវភាពការលំបាករបស់ប្រជាពលរដ្ឋ ។ អាហ្នឹងយើងឲ្យតម្លៃនឹងមិនខុស ប៉ុន្តែមិនទាំងអស់នោះទេ ពេលខ្លះក៏មានមន្ត្រីយើងធ្វើបានដែរ» ៕
ចែករំលែកព័តមាននេះ