រាជធានីភ្នំពេញ ៖ ស្របពេលដែលប្រទេសកម្ពុជា រកឃើញ៣ករណីមានផ្ទុក Covid-19 ដែលធ្វេីអោយមានការព្រួយបារម្ភខ្លាចមានការឆ្លងរីករាលដាលកាន់ច្រើន ។ ប៉ុន្តែអ្វីដែលគួរអោយខ្លាចជាង Covid-19 ទៅទៀតនោះ…
រាជធានីភ្នំពេញ ៖ ស្របពេលដែលប្រទេសកម្ពុជា រកឃើញ៣ករណីមានផ្ទុក Covid-19 ដែលធ្វេីអោយមានការព្រួយបារម្ភខ្លាចមានការឆ្លងរីករាលដាលកាន់ច្រើន ។ ប៉ុន្តែអ្វីដែលគួរអោយខ្លាចជាង Covid-19 ទៅទៀតនោះ គឺព័ត៌មានក្លែងក្លាយ ដែលភាគច្រើនអ្នកប្រើប្រាស់បណ្តាញសង្គមនៅមិនទាន់មានការយល់ដឹង ។
ដើម្បីឆ្លើយតបទៅនឹងបញ្ហានេះ នៅព្រឹកថ្ងៃទី១១ ខែមីនា ក្លិបអ្នកកាសែតកម្ពុជា បានរៀបចំកិច្ចពិភាក្សាស្តីពីសារព័ត៌មាន ៖ ចំពោះមុខ Covid-19 និងព័ត៌មានក្លែងក្លាយ ដែលធ្វើឡើងនៅភោជនីយដ្ឋានទន្លេបាសាក់២ ។
ក្នុងកិច្ចពិភាក្សានេះ មានការចូលរួមពីសំណាក់លោកជំទាវ ឱ វណ្ណឌីន អនុរដ្ឋលេខាធិការ និងជាអ្នកនាំពាក្យក្រសួងសុខាភិបាល លោក ផុស សុវណ្ណ ប្រតិភូរាជរដ្ឋាភិបាល ទទួលបន្ទុកអគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន ដោយមានការសម្របសម្រួលពីលោក ប៉ែន បូណា នាយកក្លិបអ្នកកាសែតកម្ពុជា និងលោក ពុយ គា អគ្គលេខាធិការក្លិបអ្នកកាសែតកម្ពុជា ព្រមទាំងអ្នកកាសែតជាច្រើនរូបទៀតបានចូលរួម ។
ដើម្បីទប់ស្កាត់ព័ត៌មានក្លែងក្លាយពាក់ព័ន្ធទៅនឹងការផ្សាយពីវីរុស Covid-19 នាពេលបច្ចុប្បន្ននេះ លោក ពុយ គា អគ្គលេខាធិការក្លិបអ្នកកាសែតកម្ពុជាបានលើកឡើងថា ដោយសារតែបច្ចេកវិទ្យាបច្ចុប្បន្ននេះ នរណាក៏អាចធ្វើជាអ្នកព័ត៌មានបានដែរ ។ ប៉ុន្តែព័ត៌មានក្លែងក្លាយអាចធ្វើអោយច្របូកច្របល់តែក្នុងប៉ុន្មានម៉ោងប៉ុណ្ណោះ ។
លោកបន្តថា អ្វីដែលអាចធ្វើអោយយើងដឹងថា អ្វីទៅជាព័ត៌មានពិត អ្វីទៅជាព័ត៌មានក្លែងក្លាយនោះ លោកបានចែករំលែកបទពិសោធន៍ ដោយលើកហេតុផល៩ចំណុច ៖
ទី១ គួរពិចារណាប្រភពព័ត៌មាននោះ តើបុគ្គលណាជាអ្នកសរសេរ ជាសកម្មជនហ្វេសប៊ុក ឬចេញពីស្ថាប័នដែលមានវិជ្ជាជីវៈ ។
ទី២ សូមកុំអានចំណងជើង ត្រូវអានព័ត៌មានទាំងមូល ។
ទី៣ ត្រូវពិនិត្យមើលអ្នកនិពន្ធ ឬអ្នកសរសេរដែលមានវិជ្ជាជីវៈត្រឹមត្រូវដែរឬទេ ។
ទី៤ គួរពិនិត្យមើលលើប្រភពរបស់អ្នកសរសេរ តើច្បាស់លាស់ដែរឬទេ ។
ទី៥ តើព័ត៌មាននោះមានកាលបរិច្ឆេទត្រឹមត្រូវដែរឬទេ ។
ទី៦ ពិនិត្យលើសំនេរ តើសរសេររបៀបកំប្លែង សិល្បៈ ឬជាការលក់ផលិតផល ។
ទី៧ សរសេររឿងដោយខ្លួនឯង ឬមានចេតនាលម្អៀង ។
ទី៨ អត្ថបទមានការដកស្រង់ពីអ្នកពាក់ព័ន្ធនឹងសាច់រឿងដែលខ្លួនសរសេរចេញនោះដែរឬទេ ? ឧទាហរណ៍ ករណីវីរុស Covid-19 គឺទាមទារដាច់ខាតត្រូវសួរទៅសាម៉ីក្រសួងសុខាភិបាល ឬវិទ្យាស្ថានប៉ាស្ទ័រកម្ពុជា ។
និងទី៩ ព័ត៌មានដែលបំផុសអោយមានការភ័យខ្លាច ឬព័ត៌មានអោយប្រយ័ត្នហួសពីការពិត ។
ក្នុងឱកាសនោះ លោកជំទាវ ឱ វណ្ណឌីន អនុរដ្ឋលេខាធិការ និងជាអ្នកនាំពាក្យក្រសួងសុខាភិបាលបានអោយដឹងថា ពាក់ព័ន្ធនឹងការផ្សាយព័ត៌មានអំពីវីរុស Covid-19 លោកស្រីបានស្នើដល់អ្នកសារព័ត៌មានត្រូវផ្សាយព័ត៌មានដែលចេញពីក្រសួងសុខាភិបាល ឬវិទ្យាស្ថានប៉ាស្ទ័រកម្ពុជា ព្រោះមានតែ២ស្ថាប័ននេះ ដែលអាចបញ្ជាក់ពីបញ្ហារបស់វីរុស Covid-19 ។
ពាក់ព័ន្ធទៅនឹងការទប់ស្កាត់ព័ត៌មានក្លែងក្លាយ
លោក ផុស សុវណ្ណ ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានព័ត៌មាន និងសោតទស្សន៍ បានអោយដឹងថា ចំពោះចំណាត់របស់ក្រសួង គឺត្រូវតាមដានព័ត៌មានណាដែលមិនពិត ឬក្លែងក្លាយ ដើម្បីស្រង់ព័ត៌មានក្លែងក្លាយនេះ ផ្ញើទៅនាយកដ្ឋានប្រឆាំងបទល្មើសបច្ចេកវិទ្យាក្រសួងមហាផ្ទៃ ដើម្បីស្វែងរកម្ចាស់គណនីហ្វេសប៊ុកណា ដែលបានធ្វើការផ្សាយព័ត៌មានមិនពិត ធ្វើអោយប៉ះពាល់ដល់សន្តិសុខ និងសង្គមជាតិយើងទាំងមូល ។ (កែសម្រួលដោយ ៖ បុប្ផា)
ចែករំលែកព័តមាននេះ