ខេត្តសៀមរាប ៖ បើតាមមន្ទីរសុខាភិបាលខេត្តសៀមរាប បានអោយដឹងនៅថ្ងៃទី១១ ខែមីនា នេះថា បុរសម្ចាស់ម៉ូតូកង់បី (PassApp) ធ្លាប់បានដឹកបុរសជនជាតិជប៉ុនម្នាក់ ដែលផ្ទុកជំងឺកូវីដ-១៩ ត្រូវបានធ្វើតេស្តរកវីរុស COVID-19 ជាលទ្ធផលគឺ អវិជ្ជមាន ។ បុរសម្ចាស់ម៉ូតូកង់បីរូបនេះ មានសុខភាពល្អ មិនមានរោគសញ្ញាអ្វីឡើយ ។ ទោះជាយ៉ាងណាបច្ចុប្បន្ននេះ រូបគាត់ត្រូវបានដាក់ឲ្យនៅដោយឡែក និងតាមដានសុខភាព ចំនួន១៤ថ្ងៃ នៅក្នុងបន្ទប់ នៃអគារជំងឺឆ្លង ក្នុងមន្ទីរពេទ្យបង្អែកខេត្តសៀមរាប ។
សម្រាប់ម៉ូតូកង់បី (PassApp) របស់បុរសខាងលើ ត្រូវបានមន្ត្រីជំនាញសុខាភិបាលនៃមន្ទីរពេទ្យបង្អែកខេត្តសៀមរាប បាញ់ថ្នាំសម្លាប់មេរោគ ផងដែរ ។
សូមជម្រាបថា អ្នកស្រីវេជ្ជបណ្ឌិត ឱ វ៉ាន់ឌីន អ្នកនាំពាក្យក្រសួងសុខាភិបាល បានឲ្យដឹងថា អាជ្ញាធរកម្ពុជា កំពុងស្វែងរកម្ចាស់កង់បីម្នាក់ ដែលធ្លាប់ដឹក បុរសជនជាតិជប៉ុន ផ្ទុកវីរុស COVID-19 ។
តាមការបញ្ជាក់របស់អ្នកនាំពាក្យក្រសួងសុខាភិបាល ធ្វើឡើងក្នុងកិច្ចប្រជុំជាមួយ ជាក្រុមគ្រូពេទ្យនៅមន្ទីរពេទ្យបង្អែកខេត្តសៀមរាប កាលពីព្រឹកថ្ងៃទី៦ ខែមីនា ឆ្នាំ២០២០ ។
នៅក្នុងនៅកិច្ចប្រជុំជាមួយគ្រូពេទ្យ អ្នកស្រីបានថ្លែងថា អាជ្ញាធរ នឹងមើលកាមេរ៉ាសុវត្ថិភាពតាមផ្លូវនានា ដែលថតជាប់ម្ចាស់កង់បី ដែលដឹកបុរសជនជាតិជប៉ុននោះ ។ អ្នកស្រី លើកឡើងថា បុរសជនជាតិជប៉ុននោះ បានជិះម៉ូតូកង់បី ទៅពិនិត្យសុខភាព នៅមន្ទីរពេទ្យឯកជនមួយ ក្នុងខេត្តសៀមរាប ៕
ចែករំលែកព័តមាននេះ