ខេត្តបាត់ដំបង ៖ យ៉ាងហោចណាស់ មនុស្សចំនួន៥នាក់ត្រូវបានកម្លាំងជំនាញនៃការិយាល័យព្រហ្មទណ្ឌកំរិតស្រាលឃាត់ខ្លួន ដែលពាក់ព័ន្ធនឹងការធ្វើចរាចរណ៍ប្រាក់ដុល្លារ និងប្រាក់បាតថៃក្លែងក្លាយ កាលពីវេលាម៉ោង១១ថ្ងៃត្រង់ថ្ងៃទី១០ មីនា ខណ:ពួកគេកំពុងប្រមូលផ្ដុំគ្នានៅចំណុចបន្ទប់ជួលមួយកន្លែង នៅក្នុងភូមិកម្មករ…
ខេត្តបាត់ដំបង ៖ យ៉ាងហោចណាស់ មនុស្សចំនួន៥នាក់ត្រូវបានកម្លាំងជំនាញនៃការិយាល័យព្រហ្មទណ្ឌកំរិតស្រាលឃាត់ខ្លួន ដែលពាក់ព័ន្ធនឹងការធ្វើចរាចរណ៍ប្រាក់ដុល្លារ និងប្រាក់បាតថៃក្លែងក្លាយ កាលពីវេលាម៉ោង១១ថ្ងៃត្រង់ថ្ងៃទី១០ មីនា ខណ:ពួកគេកំពុងប្រមូលផ្ដុំគ្នានៅចំណុចបន្ទប់ជួលមួយកន្លែង នៅក្នុងភូមិកម្មករ សង្កាត់ស្វាយប៉ោ ក្រុងបាត់ដំបង និងបានរឹបអូសក្រដាស់ប្រាក់ក្លែងក្លាយទាំង២ប្រភេទនេះបានយ៉ាងច្រើនសន្ធឹកសន្ធាប់ ជាមួយនិងវត្ថុតាងដទៃទៀត។
យោងតាមរបាយការណ៍បឋមដែលកោះសន្តិភាពទទួលបានពីការិយាល័យនគរបាលព្រហ្មទណ្ឌកម្រិតស្រាលបានឱ្យដឹងថា ជនសង្ស័យទាំង៥នាក់នោះ ១-ឈ្មោះសារ៉ម លី អាយុ៣៨ឆ្នាំ នៅភូមិដាំស្ពៃ សង្កាត់ស្លាកែត ក្រុងបាត់ដំបង ២-ឈ្មោះយៀន រតនៈ អាយុ២៨ឆ្នាំ នៅភូមិកម្មករ សង្កាត់ស្វាយប៉ោ ក្រុងបាត់ដំបង ៣-ឈ្មោះសុប រ៉យ៉ា អាយុ៣០ឆ្នាំ នៅភូមិដាំស្ពៃ សង្កាត់ស្លាកែត ក្រុងបាត់ដំបង ៤-ឈ្មោះ សាន់ សំខាន់ អាយុ២៤ឆ្នាំ នៅភូមិបោះពោធិ៍ ឃុំអូរដំបង១ ស្រុកសង្កែ និង៥-ឈ្មោះវ៉ាន់ វីរៈ អាយុ២០ឆ្នាំ នៅភូមិក្រពើជើង ឃុំភ្នំសំពៅ ស្រុកបាណន់។
ជាមូយនឹងការឃាត់ខ្លួនជនសង្ស័យមួយសំបុកនេះ សមត្ថកិច្ចក៏បានដកហូតនូវវត្ថុតាងរួមមាន៖ ប្រាក់ថៃ ដែលមានក្រដាស១,០០០បាត, ៥០០បាត, ១០០បាត និង ក្រដាស៥០បាត សរុបចំនួន៥១,៥០០បាត និង ប្រាក់ដុល្លាអាមេរិក ដែលមានក្រដាស១០ដុល្លារហូតដល់ក្រដាស១០០ដុល្លា សរុបចំនួន១៨,៧៣០ដុល្លា។ ក្រៅពីក្រដាសប្រាក់ទាំង២ប្រភេទខាងលើនេះ ក៏នៅមានវត្ថុតាងដទៃទៀតដូចជា៖ ទូរស័ព្ទដៃចំនួន០៧គ្រឿង, ជញ្ជីងសម្រាប់ថ្លឹងថ្នាំញៀនចំនួន០១គ្រឿង, ម្សៅក្រាមពណ៌ស ICE (ម៉ាទឹកកក)ចំនួន០៧ថង់, ថង់សំរាប់ច្រកគ្រឿងញៀនមួយចំនួន, កាំបិតកែច្នៃចំនួន០៣ដើម, ដំបងឈើមានដែកគោលរុំស្គុតពណ៌ខ្មៅ០១ដើម និង ម៉ូតូចំនួន០២គ្រឿង រួមទាំងវត្ថុតាងពាក់ព័ន្ធមួយចំនួនទៀត។
លោកឈឿង គឹមសុង ប្រធានការិយាល័យព្រហ្មទណ្ឌកំរិតស្រាល បាននិយាយថា ជនសង្ស័យទាំង៥នាក់នេះ ត្រូវលោកស្នងការខេត្ត លោកស្នងការរងទទូលបន្ទុក ដែលមានការឯកភាពពីតំណាងអយ្យការផង បញ្ជាឱ្យកម្លាំងជំនាញរបស់លោកធ្វើការស្រាវជ្រាវឃាត់ខ្លួនបានជាបន្តបន្ទាប់ ក្រោយពីទទូលបានព័ត៌មានអំពីសកម្មភាពពួកគេធ្វើចរាចរណ៏លុយក្លែងក្លាយ។
លោកគឹម សុង បានបញ្ជាក់ថា ក្រដាសប្រាក់ដុល្លារ និងក្រដាសប្រាក់បាតទាំងអស់ ដែលកម្លាំងជំនាញរបស់លោកដកហូតបានពីក្រុមជនសង្គមងងិតខាងលើនេះ គឺសុទ្ធតែជាក្រដាសប្រាក់ក្លែងក្លាយ ដែលពួកគេបំរុងធ្វើចរាចរណ៍ក្នុងឱកាសបុណ្យទន្លេខាងមុននេះ តែសំណាងល្អដែលកម្លាំងជំនាញការិយាល័យរបស់លោកបង្ក្រាបបានមុនដោយជោគជ័យ។ បច្ចុប្បន្ន ជនសង្ស័យរួមទាំងវត្ថុតាងខាងលើ ត្រូវបានបញ្ជូនបន្តទៅកាន់ការិយាល័យជំនាញ ដើម្បីចាត់ការតាមនីតិវិធីហើយ ៕
ចែករំលែកព័តមាននេះ