ខេត្តស្ទឹងត្រែង ៖ ផ្ទះប្រជាពលរដ្ឋចំនួន៣ខ្នងត្រូវអគ្គិភ័យឆាបឆេះជាបន្តបន្ទាប់ បណ្តាលឱ្យផ្ទះមួយខ្នងត្រូវភ្លើងឆេះម៉ត់រួមទាំងទ្រព្យសម្បត្តិទាំងស្រុង ចំណែក២ខ្នងផ្សេងទៀតត្រូវភ្លើងឆាបឆេះរងការខូចខាតអស់មួយចំនួន ។
ហេតុការណ៍ខាងលើនេះបានកើតឡើងកាលពីវេលាម៉ោង៨និង១០នាទីយប់ថ្ងៃទី៩ មីនា ឆ្នាំ២០២០ ស្ថិតនៅភូមិសៀមប៉ាង ឃុំសេកុង ស្រុកសៀមប៉ាង។
តាមប្រភពព័ត៌មានអោយដឹងថា នាវេលាម៉ោងកើតហេតុខាងលើ គេបានឃើញអណ្តាតភ្លើងឆាបឆេះចេញពីក្នុងផ្ទះទី១ ភ្លាមៗនោះក៏មានការភ្ញាក់ផ្អើលស្រែកឆោឡោឡើង និងនាំគ្នាពន្លត់ រួចរាយការណ៍ទៅរថយន្តពន្លត់អគ្គិភ័យនៃអធិការដ្ឋាននគរបាលស្រុកដើម្បីឱ្យចុះមកជួយអន្តរាគមន៍ ដោយមានការសហការជាមួយរថយន្តពន្លត់អគ្គិភ័យឯកជន ព្រមទាំងបូមទឹកដោយម៉ូទ័របាញ់ពន្លត់ដែរ តែមិនរលត់ទាំងស្រុងនោះទេ ។
លោក ជឹម អេន អធិការនគរបាលស្រុកសៀមប៉ាងអោយដឹងថា លំនៅស្ថានប្រជាពលរដ្ឋចំនួន៣ខ្នងខាងលើមានម្ចាស់ផ្សេងៗគ្នា ត្រូវអគ្គីភ័យឆាបឆេះជាបន្តបន្ទាប់ ក្នុងនោះផ្ទះមួយ ខ្នងត្រូវរងការខូចខាតអស់ទាំងស្រុង ចំណែកពីរខ្នងផ្សេងទៀតរងការខូចខាតអស់មួយចំនួន ។
លោកអធិការនគរបាលស្រុកបានបន្តថា ករណីអគ្គីភ័យខាងលើនេះបង្កឡើងដោយភ្លើងធូបដែលកូនម្ចាស់ផ្ទះទី១ដុតរួចទុកចោលហើយដើរចេញពីផ្ទះ ទើបបង្កជាអគ្គិភ័យបែបនេះតែម្តង ។
តាមប្រភពពីមន្ត្រីនគរបាលប៉ុស្តិ៍រដ្ឋបាលឃុំសេកុង ស្រុកសៀមប៉ាង បានអោយដឹងថា ផ្ទះរងគ្រោះទី១ មានម្ចាស់ឈ្មោះ ហឿង ថងខៀន ជាស្ត្រីមេម៉ាយ អាយុ៤៤ឆ្នាំ មុខរបរជាមន្ត្រីនគរបាលនៃអធិការដ្ឋាននគរស្រុកសៀមប៉ាង ។ ផ្ទះមួយខ្នងនេះរងការខូចខាតអស់ទាំងស្រុងមានទំហំទទឹង១៥ម៉ែត្រ និងបណ្តោយ១៨ម៉ែត្រ បាំងជញ្ជាំងក្តារ ដំបូលប្រក់ស័ង្កសី ចំណែកសំភារៈក្នុងផ្ទះដែលរងការខូចខាតរួមមានលុយចំនួន១.៦៦០.០០០រៀល, ម៉ាស៊ីនមួយគ្រឿងម៉ាកហុងដាកម្លាំង១៣សេស, ម៉ូតូ១គ្រឿង, ទូរទស្សន៍២គ្រឿង, ឌីធីវី២គ្រឿងព្រមទាំងរបស់របរប្រើប្រាស់ទាំងអស់។
ផ្ទះរងគ្រោះទី២មានម្ចាស់ឈ្មោះ យី សារ៉ាត់ ភេទប្រុស អាយុ៣៨ឆ្នាំ ផ្ទះនេះមានទំហំទទឹង៨ម៉ែត្រ និងបណ្តោយ៩ម៉ែត្រ ត្រូវភ្លើងឆេះអស់មួយចំនួន និងផ្ទះរងគ្រោះទី៣ មានម្ចាស់ ឈ្មោះកង់ ប៊ុនយុង ភេទប្រុស អាយុ៣៤ឆ្នាំ ផ្ទះនេះមានទំហំទទឹង៤ម៉ែត្រ និងបណ្តោយ៥ម៉ែត្រ រងការខូចខាតអស់មួយចំនួន ។
ពាក់ព័ន្ធនឹងករណីខាងលើនេះ លោក ជឹម អេន អធិការស្រុកសៀមប៉ាងបានបញ្ជាក់ថា ករណីអគ្គីភ័យខាងលើនេះមិនបណ្តាលអោយមនុស្សណាម្នាក់រងគ្រោះថ្នាក់ឡើយ៕ (កែសម្រួលដោយ ៖ ធីតា)
ចែករំលែកព័តមាននេះ