រាជធានីភ្នំពេញ៖ ក្នុងពេលវិស័យទេសចរណ៍កំពុងជួបវិបត្តិដោយសារ ការរាលដាលនៃ វីរុស កូវីដ-១៩ រដ្ឋាភិបាលកម្ពុជា បានសម្រេចលើកលែងពន្ធដល់អាជីវកម្មសណ្ឋាគាររយៈ ពេល ៤ខែ គឺពីខែកុម្ភៈ ដល់ខែឧសភា ឆ្នាំ ២០២០ សម្រាប់តែខេត្តសៀមរាប មួយប៉ុណ្ណោះ ។ ក៏ប៉ុន្តែអាជីវករក្នុងវិស័យសណ្ឋាគារបានស្នើដល់រដ្ឋាភិបាលគួរតែលើកលែងពន្ធដល់ សណ្ឋាគារទូទាំងប្រទេស ។
លោកស្រី ក្លេខៃ ចិន្តា ប្រធានសមាគមសណ្ឋាគារកម្ពុជា បានមានប្រសាសន៍ថា ក្នុងពេល ដែលវិបត្តិនៃវិស័យទេសចរណ៍បែបនេះ ក្នុងនាមជាអាជីវករក្នុងវិស័យសណ្ឋាគារ និងជាប្រ ធានសមាគមសណ្ឋាគារ សូមស្នើសុំដល់រដ្ឋាភិបាលមេត្តាលើកលែងពន្ធ ដល់អាជីវកម្ម សណ្ឋាគារទូទាំងប្រទេសផង ហើយនិងពន្យារដល់ខែតុលា ២០២០ ដើម្បីឱ្យម្ចាស់សណ្ឋា គារទាំងអស់អាចមានលទ្ធភាព ក្នុងការបន្តអាជីវកម្ម និងត្រៀមខ្លួនសម្រាប់ទទួលភ្ញៀវ ឡើងវិញនៅរដូវភ្ញៀវខ្ពស់ ( High Season ) ពីខែវិច្ឆិកា ចុងឆ្នាំនេះ ។ លោកស្រីបន្តថាប៉ះពាល់នៃវិស័យសណ្ឋាគារនាពេលនេះ មិនមែនមានតែក្នុងខេត្តសៀម រាប មួយប៉ុណ្ណោះទេ ពោលគឺវាបានរងផលប៉ះពាល់ទូទាំងប្រទេស គ្រាន់តែនៅក្នុងខេត្ត សៀមរាប មានសណ្ឋាគារច្រើនជាងគេ ដូច្នេះហើយបើមើលពីទំហំនៃការផ្អាក និងបិទ គឺ សមាមាត្រប្រហាក់ប្រហែលនឹងគ្នាដែរ ។
លោកស្រីថា៖ «សៀមរាប មានសណ្ឋាគារតូចធំរាប់រយសណ្ឋាគារ ដូច្នេះបរិមាណនៃការ បិទក៏មានច្រើន ។ ដូចគ្នានេះដែរ ខេត្តផ្សេងទៀតមានសណ្ឋាគាររាប់សិបសណ្ឋាគារ ដូច្នេះ បើបិទតែបួនដប់សណ្ឋាគារ គិតជាអត្រា ភាគរយគឺប្រហាក់ប្រហែលគ្នា មិនលើសគ្នាប៉ុន្មាន នោះទេ» ។
លោកស្រីបន្ថែមថា បច្ចុប្បន្ននេះ ផលប៉ះពាល់ទៅលើវិស័យសណ្ឋាគារ មិនថាតូច ឬធំ ឡើយ សុទ្ធតែប៉ះពាល់ដូចគ្នាហើយមិនថា ក្នុងលំដាប់ផ្កាយប៉ុន្មាននោះទេ ។ ជាក់ស្ដែង សណ្ឋាគារធំៗមានបន្ទប់ ១០០ហើយបើបន្ទប់ទំនេរ ៧០ គឺស្មើនឹង ៧០ភាគរយ ដូចគ្នានេះ ដែរសណ្ឋាគារតូចៗឧទាហរណ៍ថាមានបន្ទប់ត្រឹម ១០ បើបាត់តែ ៧ ក៏មានន័យថា ៧០ភាគរយដូចគ្នាដែរ ហើយផលប៉ះពាល់នេះដែរ វាមានគ្រប់ខេត្តទៅហើយ មិនថាសៀម រាប ព្រះសីហនុ ឬខេត្តនៅចុងកាត់មាត់ញកនោះឡើយ ពួកគាត់សុទ្ធតែបាត់បង់ចំណូល ក៏ប៉ុន្តែដោយសារតែបរិមាណសណ្ឋាគារនៅខេត្តផ្សេងមានតិចតួច ដូច្នេះហើយទើបមើល ឃើញពីទំហំនៃការប៉ះពាល់តូច ។
លោក តុប សុភ័ក រដ្ឋលេខាធិការ និងអ្នកនាំពាក្យក្រសួងទេសចរណ៍កម្ពុជា បានមាន ប្រសាសន៍ថា ដោយសារតែបញ្ហា កូវីដ-១៩ នៅខេត្តសៀមរាប ធ្វើឱ្យមានសណ្ឋាគារមួយ ចំនួនបានផ្អាកដំណើរការ និងមួយចំនួនបានបិទទ្វារ ។ យោងតាមរបាយការណ៍ដែល ក្រសួងទេសចរណ៍ទទួលបាន មានសណ្ឋាគារចំនួន ១០ សណ្ឋាគារបានផ្អាកដំណើរការ និង ១០ សណ្ឋាគារបានបិទទ្វារ ហើយក៏មានអាជីវកម្មមួយចំនួនទៀតបានបិទ និងផ្អាកដំណើរការដែរ ក៏ប៉ុន្តែមិនមានរបាយការណ៍ជាក់លាក់ ។លោកបន្តថា ក្នុងស្ថានភាពដ៏លំបាកនេះ ក្រសួងបានផ្សព្វផ្សាយទូលំទូលាយ ទាក់ទងទៅ នឹងប្រតិបត្តិករទេសចរណ៍ដែលបម្រើការងារក្នុងវិស័យទេសចរណ៍ ជាពិសេសសណ្ឋាគារ ផ្ទះសំណាក់ និងភោជនីយដ្ឋាន ដើម្បីរួមគ្នាជំរុញការងារនេះឱ្យទៅមុខបន្តទៀត ព្រោះថា នេះជាផលប៉ះពាល់ធំមួយទូទាំងពិភពលោកមិនមែនមានតែកម្ពុជា ។
ការរកឃើញករណី កូវីដ-១៩ នៅខេត្តសៀមរាប ក៏មិនមានជាករណីភ្ញាក់ផ្អើល ឬលើកដំបូងសម្រាប់កម្ពុជាដែរ ជាក់ស្ដែងកាលពីកន្លងទៅ កម្ពុជាក៏បានរកឃើញករណី កូវីដ-១៩ នៅខេត្តព្រះសីហនុ ដែរ ទៅលើជនជាតិចិនម្នាក់ ហើយកម្ពុជាក៏បានព្យាបាលជា និងបញ្ជូនត្រលប់ទៅវិញផងដែរ ។លោកបន្ថែមថា ពាក់ព័ន្ធនឹងការលើកលែងពន្ធដល់អាជីវកម្មសណ្ឋាគារ និងផ្ទះសំណាក់ នៅខេត្តសៀមរាប ដោយសារតែខេត្តនេះជាខេត្តគោលដៅទេសចរណ៍ និងមានផលប៉ះ ពាល់ធ្ងន់ធ្ងរជាងគេ ដូច្នេះហើយទើបរដ្ឋាភិបាលសម្រេចលើកលែងពន្ធសម្រាប់តែ ខេត្តសៀមរាប ។ ដោយឡែកនៅខេត្តផ្សេងទៀតមិនមែនថាមិនប៉ះពាល់ទេ ក៏ប៉ុន្តែជាក់ ស្ដែង ដូចជានៅខេត្តភូមិភាគឦសាន ក៏នៅតែមានភ្ញៀវទេសចរទៅកម្សាន្តជាហូរហែរមិនស្ងប់ស្ងាត់ដូចនៅសៀមរាបឡើយ ។
លោកថា៖ «ក្រសួងទេសចរណ៍មិនបានព្រងើយកន្តើយចំពោះបញ្ហាដែលកើតឡើងចំពោះ មុខនេះទេ ។ ក្រសួងបានត្រៀមរួចហើយក្នុងការរៀបចំព្រឹត្តិការណ៍ទាក់ទាញទេសចរនានា នៅខេត្តសៀមរាប ក៏ប៉ុន្តែក្នុងកាលៈទេសៈនេះមិនទាន់អាចធ្វើបានទេ ដោយរង់ចាំស្ថាន ភាពស្ងប់ស្ងាប់ទៅវិញបន្តិចសិន» ៕ កែសម្រួលដោយ ៖ សុឃាក់
ចែករំលែកព័តមាននេះ