ខេត្តស្ទឹងត្រែង ៖ កាលពីរសៀលថ្ងៃទី៩ ខែមីនា ឆ្នាំ២០២០ លោកអង្គវង្ស វឌ្ឍានា រដ្ឋមន្ត្រីក្រសួងយុត្តិធម៌ បានអញ្ជើញជាអធិបតីក្នុងពិធីប្រកាសផ្ទេរ និងចូលកាន់មុខតំណែងព្រះរាជអាជ្ញានៃសាលាដំបូងខេត្តស្ទឹងត្រែង…
ខេត្តស្ទឹងត្រែង ៖ កាលពីរសៀលថ្ងៃទី៩ ខែមីនា ឆ្នាំ២០២០ លោកអង្គវង្ស វឌ្ឍានា រដ្ឋមន្ត្រីក្រសួងយុត្តិធម៌ បានអញ្ជើញជាអធិបតីក្នុងពិធីប្រកាសផ្ទេរ និងចូលកាន់មុខតំណែងព្រះរាជអាជ្ញានៃសាលាដំបូងខេត្តស្ទឹងត្រែង ដោយមានមន្ត្រីរាជការ ព្រមទាំងកងកម្លាំងប្រដាប់អាវុធទាំង៣ប្រភេទចូលរួមផងដែរ។
ពិធីប្រកាសផ្ទេរនិងតែងតាំងចូលកាន់មុខតំណែងព្រះរាជអាជ្ញាខាងលើនេះបានធ្វើឡើង បន្ទាប់ពីព្រះករុណាព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានឡាយព្រះហស្តលេខាលើព្រះរាជក្រឹត្យចុះថ្ងៃទី២០ ខែកុម្ភៈ ឆ្នាំ ២០២០ ត្រាស់បង្គាប់តែងតាំងលោកជេត ខេមរា វីរៈព្រះរាជអាជ្ញាថ្នាក់លេខ១ ជាព្រះរាជ្ញានៃអយ្យការអមសាលាដំបូងខេត្តស្ទឹងត្រែង បន្តតំណែងពីលោកច្រឹង ខ្មៅ ដែលត្រូវផ្លាស់ទៅជាព្រះរាជអាជ្ញាអមសាលាដំបូងខេត្តកំពង់ចាម។
ថ្លែងក្នុងឱកាសនោះដែរ លោក ជេត ខេមរា ព្រះរាជអាជ្ញាថ្មីនៃអយ្យការអមសាលាដំបូងខេត្តស្ទឹងត្រែង បានឡើងប្តេជ្ញាចិត្ត គោរព និងប្រតិបត្តិតាមរដ្ឋធម្មនុញ្ញ នៃច្បាប់កំពូលរបស់ព្រះរាជាណាចក្រកម្ពុជា ប្តេជ្ញារក្សានូវសេចក្តីថ្លៃថ្នូរក្នុងពេលបំពេញវិជ្ជាជីវៈ ដោះស្រាយរឿងក្តីជូនប្រជាពលរដ្ឋអោយបានឆាប់រហ័ស មានប្រសិទ្ធភាព តម្លាភាពប្រកបដោយភាពយុត្តិធម៌ និងចូលរួមប្រឆាំងអំពើពុករលួយផ្សេងៗនៅក្នុងប្រព័ន្ធ។
លោកម៉ុម សារឿន អភិបាលនៃ គណៈអភិបាលខេត្តក៏បានចេញនូវចំណុចសំខាន់ៗធានាអោយបានគុណភាព ប្រសិទ្ធភាព តម្លាភាព និងគណនេយ្យភាព នៃការផ្តល់សេវា និងបង្កើនជំនឿទុកចិត្តពីប្រជាពលរដ្ឋក្នុងវិស័យច្បាប់ និងយុត្តិធម៌អោយកាន់ តែល្អប្រសើរ គឺការផ្តល់សេវាច្បាប់និងយុត្តិធម៌ជូនប្រជាពលរដ្ឋ។
លោកអភិបាលអភិបាលបន្តថា ព្រះរាជអាជ្ញាថ្មីនឹងត្រូវយកចិត្តទុកដាក់បំពេញការងារតាមសមត្ថភាព ជំនាញរបស់ខ្លួនអោយទទួលបានជោគជ័យ ស្របតាមកម្មវិធីនយោបាយរបស់រាជ រដ្ឋាភិបាលអោយបានល្អប្រសើរ។
លោក អង្គវង្ស វឌ្ឍានា រដ្ឋមន្ត្រីក្រសួងយុត្តិធម៌ មានប្រសាសន៍ លើកឡើងដែរថា ដើម្បីឱ្យប្រព័ន្ធយុត្តិធម៌មានប្រសិទ្ធភាព និងជឿទុកចិត្តបានពីសំណាក់ប្រជាពលរដ្ឋ ដោយយើងអនុវត្តតាមអភិក្រមទាំង៥ គឺការឆ្លុះកញ្ចក់ មុជទឹកដុះក្អែល ព្យាបាល និងវះកាត់។
លោករដ្ឋមន្ត្រីក្រសួងយុត្តិធម៌បានបន្តថា ការកកស្ទះសំណុំរឿងជាបញ្ហាចោទ នៅក្នុងវិស័យយុត្តិធម៌ ដែលសំណុំរឿងខ្លះ នៅមានភាពយឺតយ៉ាវនិងអូសបន្លាយពេលយូរឆ្នាំ ក្នុងន័យនេះ លោករដ្ឋមន្ត្រី បានស្នើរសុំ និងក្រើនរំលឹកដល់ប្រធានសាលាដំបូង ចៅក្រម ព្រះរាជអាជ្ញា សូមបន្តយកចិត្តទុកដាក់ខ្ពស់ ជាអាទិភាព គឺពិនិត្យ និងពន្លឿននូវចំណាត់ការនៃសំណុំរឿងទាំងអស់ និងប្រកាសចេញនៃសេចក្តីសម្រេច ជូនភាគីឱ្យបានឆាប់រហ័ស ស្របទៅតាមច្បាប់ជាធរមាន ។
ដោយឡែក បញ្ហាមួយទៀតដែលត្រូវដោះស្រាយ គឺបញ្ហាគ្រឿងញៀន ជាពិសេសខេត្តស្ទឹងត្រែងនគរបាលយុត្តិធម៌ត្រូវមានវិធានការយ៉ាងម៉ឺងម៉ាត់ ចុះបង្ក្រាបតាមតាមគោលដៅ តាមឃ្លឹបកំសាន្ត និងពង្រឹងនៃការត្រួតពិនិត្យតាមច្រកព្រំដែនដើម្បីបង្ការ និងបង្ក្រាបទប់ស្កាត់អោយមានប្រសិទ្ធភាព ដើម្បីចូលរួមរក្សាសន្តិសុខ សណ្តាប់ធ្នាប់ សាធារណៈ ជូនប្រជាពលរដ្ឋ និងសង្គមជាតិ ៕ (កែសម្រួលដោយ ៖ ធីតា)
ចែករំលែកព័តមាននេះ