ស្តេចក្រែមលាបមាត់ លី ជាឈី រកចំណូលបានច្រើនលានដុល្លារក្នុងមួយថ្ងៃ
លោក លី ជាឈី (Li Jiaqi) ឬ អូស្ទីន លី (Austin Li)…
លោក លី ជាឈី (Li Jiaqi) ឬ អូស្ទីន លី (Austin Li)…
លោក លី ជាឈី (Li Jiaqi) ឬ អូស្ទីន លី (Austin Li) មានឈ្មោះហៅក្រៅថា ស្ត្រេចក្រែមលាបមាត់ ដែលជាអ្នកលក់គ្រឿងសម្អាងជោគជ័យជាងគេក្នុងប្រទេសចិន ។ គ្រាន់តែប្រើប្រាស់កម្មវិធីទូរស័ព្ទ Taobao លោកលក់ក្រែមលាបមាត់បានដល់ទៅ ១៥,០០០ដើមក្នុងរយៈពេល ៥នាទី ។
លើកម្មវិធីមួយទៀតដែលមានឈ្មោះថា Douyin លោកមានអ្នកគាំទ្រជិត ៤០លាននាក់ទៅហើយ ដែលអនុញ្ញាតឲ្យលោកធ្វើការ Live បង្ហាញ និងនិយាយពីផលិតផលផ្សេងៗជាប្រចាំ ។ សារព័ត៌មានក្នុងប្រទេសចិនបានរាយការណ៍មកថា ប្រាក់ចំណូលរបស់លោកក្នុងឆ្នាំ ២០១៩ មានលើសប្រាក់ចំណូលរបស់ក្រុមហ៊ុនជាច្រើនក្នុងប្រទេសថែមទៀតផង ។
ក្នុងកំឡុងពេលមានការរីកត្បាតនៃមេរោគ កូរ៉ូណា ក្នុងពេលថ្មីៗនេះ ក្រុមហ៊ុនមួយចំនួនរួមទាំងក្រុមហ៊ុន Danshenliang បានស្នើទៅកាន់លោក លី ឲ្យជួយលក់ផលិតផលរបស់ពួកគេផងដែរ ។ លោក លី បានចាប់ផ្តើមមានប្រជាប្រិយភាពតាំងពីពេលលោកចាប់ផ្តើមធ្វើការ Live លើ Taobao កាលពីឆ្នាំ ២០១៧ តែលោកស្រាប់តែល្បីល្បាញខ្លាំងកាលពីឆ្នាំមុន ។ បុរសវ័យ ១៧ឆ្នាំនេះមានទ្រព្យសម្បត្តិរួមប្រមាណរវាងពី ១លានដុល្លារទៅ ៥លានដុល្លារ ។
ក្រៅពីសមត្ថភាពក្នុងការលាបក្រែមបានលឿន និងស្អាតហើយ លោក លី ទាក់ទាញអ្នកគាំទ្រដោយប្រើប្រាស់វិធីសាស្ត្រក្នុងការនិយាយរបស់លោក ។ លោកប្រៀបបានជាមនុស្សដ៏គួរឲ្យទុកចិត្តមួយដែលធ្វើឲ្យទស្សនិកជនគាំទ្រ ។ ក្រៅពីនេះទៅទៀត លោកមិនទុកមុខឲ្យក្រុមហ៊ុនធំៗទេប្រសិនបើផលិតផលរបស់ពួកគេមិនល្អគ្រប់ស្តង់ដាររបស់លោក លី ។ លោករិះគន់ក្រុមហ៊ុនជាច្រើនដែលរួមមានប្រេន Chanel ដ៏ល្បីល្បាញជុំវិញពិភពលោកផងដែរ ។
កាលពីថ្ងៃទី ១១ខែវិច្ឆិកា ដែលត្រូវជាថ្ងៃលក់បញ្ចុះតម្លៃពិសេសលើ Taobao លោក លី ទាក់ទាញទស្សនិកជនឲ្យមើលការ Live វីដេអូរបស់លោកបានដល់ទៅ ៣៦លាននាក់ និងរកចំណូលពីការលក់បានដល់ទៅ ១៤៥លានដុល្លារ ។
នៅកំឡុងពេលបុណ្យចូលឆ្នាំចិន លោក លី បានធ្វើការ Live ដូចធម្មតាដែរប៉ុន្តែមិនមែនដើម្បីលក់ផលិតផលណាមួយទេ តែលោកបានស្នើការបរិច្ចាគពីទស្សនិកជនដើម្បីជួយដល់ការទប់ស្កាត់នឹងមេរោគដែលកំពុងតែរាតត្បាតជុំវិញពិភពលោក ។ លើសពីនេះទៅទៀត លោកក៏បានបរិច្ចាគម៉ាស់ប្រមាណ ៤ម៉ឺនម៉ាស់ផងដែរទៅទីក្រុងវូហាន របស់ប្រទេសចិន ៕ កែសម្រួលដោយ ៖ សុឃាក់
ចែករំលែកព័តមាននេះ