រាជធានីភ្នំពេញ ៖ ក្នុងសារលិខិតអបអរសាទរពិធីបុណ្យទន្លេលើកទី៦ នៅខេត្តបាត់ដំបង សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានបញ្ជាក់ថា ភាពសម្បូរបែបនៃសក្ដានុពលទេសចរណ៍តាមដងទន្លេបាន និងកំពុងរួមចំណែកធ្វើឱ្យកម្ពុជាក្លាយជាគោលដៅទេសចរណ៍ប្រកបដោយឧត្តមភាព…
រាជធានីភ្នំពេញ ៖ ក្នុងសារលិខិតអបអរសាទរពិធីបុណ្យទន្លេលើកទី៦ នៅខេត្តបាត់ដំបង សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានបញ្ជាក់ថា ភាពសម្បូរបែបនៃសក្ដានុពលទេសចរណ៍តាមដងទន្លេបាន និងកំពុងរួមចំណែកធ្វើឱ្យកម្ពុជាក្លាយជាគោលដៅទេសចរណ៍ប្រកបដោយឧត្តមភាព និងភាពទាក់ទាញខ្ពស់ ។
សម្ដេចតេជោបានឱ្យដឹងថា សក្ដានុពលនេះក៏បានចូលរួមចំណែកសម្រេចចក្ខុវិស័យអាស៊ាន ជាគោលដៅទេសចរណ៍លំដាប់ថ្នាក់ពិភពលោក និងប្រកបដោយភាពកក់ក្ដៅ ស្របពេលដែលទេសចរណ៍តាមដងទន្លេ ជាពិសេសទេសចរណ៍ទន្លេមេគង្គបានក្លាយជាផលិតផលទេសចរណ៍សំខាន់មួយសម្រាប់កម្ពុជាក៏ដូចជា តំបន់អាស៊ានផងដែរ ។ សម្ដេចតេជោនាយករដ្ឋមន្ត្រីបានបន្តថា ទឹកទន្លេជាប្រភពនៃការចិញ្ចឹមជីវិតជាទីកន្លែងដែលបណ្ដុះបណ្ដាល និងពូនជ្រុំនូវវប្បធម៌ និងអរិយធម៌ ។ ទន្លេជាអំណោយពីធម្មជាតិបានផ្សាភ្ជាប់ប្រទេសនានា ដែលទទួលទានទឹករួមគ្នា ឱ្យក្លាយជាសហគមន៍វាសនារួមគ្នា ប្រកបដោយសមភាពភាពស្មោះត្រង់ និងស្និទ្ធស្នាលដូចជា មនុស្សក្នុងគ្រួសារតែមួយ ។
ក្នុងបរិការណ៍នេះ រាជរដ្ឋាភិបាលកម្ពុជាបានកំណត់ប្រារព្ធពិធីបុណ្យទន្លេដែលបានក្លាយជាព្រឹត្តិការណ៍ទេសចរណ៍ថ្មីមួយទៀតដែលមិនត្រឹមតែចូលរួមចំណែកក្នុងការផ្សព្វផ្សាយពីសក្ដានុពលទេសចរណ៍នៃខេត្តជាប់ដងទន្លេរបស់កម្ពុជាប៉ុណ្ណោះទេ ហើយយកចិត្តទុកដាក់អភិវឌ្ឍន៍តំបន់តាមដងទន្លេ ប្រកបដោយនិរន្តរភាព និងការទទួលខុសត្រូវ ជាពិសេសការជំរុញការអភិវឌ្ឍសេដ្ឋកិច្ចមូលដ្ឋាន ការការពារ និងអភិរក្សធនធានធម្មជាតិ ដោយឈរលើការប្ដេជ្ញាចិត្តរួមមួយច្បាស់លាស់ ក្នុងការរក្សាតុល្យភាព រវាងផលប្រយោជន៍សេដ្ឋកិច្ច សង្គម បរិស្ថាន និងវប្បធម៌ ។
សូមជម្រាបថា ពិធីបុណ្យទន្លេលើកទី៦ នៅខេត្តបាត់ដំបងនេះនឹងធ្វើឡើងចាប់ពីថ្ងៃ១៣-១៥ ខែមីនា ឆ្នាំ២០២០ ក្រោមប្រធានបទ «ទន្លេនៃសន្តិសុខ ទន្លេនៃវិបុលភាព» ៕
ចែករំលែកព័តមាននេះ